16
1 Niaame oyae meda palima kone ima yaere Adaa Aa-me epe ta-ga pipa tea-da pamina.
2 Niaana pema oyae luaburi Gote-na ini agaa mada redepo ta kone ima.
Go yapare Adaa Aa nipumi niana kone waru mea ruma adoa rekepua makuaaya.
3 Neme yae meda pulalo pali-daare Adaa Aa nipuna ki-nane aba saape.
Goa pali rabu nipumi go yaenu luabu ora ma-epealia.
4 Adaa Aa-me oyae luabu waria kogono padane padane laatapu kata. Go-rupa agu Adaa Aa-me waea peme aanu page nipumi warisa.
Goa pua orope su yaa diayalia rabu nimu koso loa alupaina tea.
5 Adaa Aa-me waea pua nimuna bi minasaeme aanu adape ora gime omea.
Adaa Aa-me nimi pa pupulupa pi-da natea-ga waru adamina. Dia nimu kedaa waru mea katea.
6 Aa medame Adaa Aa mada raana waru omo nipu raapu pogatu piralipiri gore Adaa Aa nipumi go aana wae yae luabu mea rubalia.
Aa medame Adaa Aa-na agaa ratua piralia raburi Adaa Aa-me pupitagi naape kone namasalia. Goa pua nipumi oyae luabu kone rugulalia.
7 Gore aame mo Adaa Aa nipuna raana omea kone luabu ratua nipuna iaanu raapu epe kone sua piralia-rabu Adaa Aa-me rabamua epe onaa raapu mapiraalia.
8 Neme oyae ogesi sa awa Adaa Aa ratulalo pali-ri mo mone akore i mi onaa page rabuawa wae pupitagi no aaya aa page rabunialia.
9 Niaana pape yaenu mada kone penaloa pulalo pema
pare Adaa Aa nipumi niana pamulalo pema yae adoa maredepo yaaya.
10 King pia aa mudumi Adaa Aa-me laketa agaa onaame pagenalo laketa rabu pageme.
Koso pagoa mo agaa mea rumape raburi ora epe redepone koso pagoa mea rumaalia.
11 Adaa Aa-me oyae waru mua epe-rupa redepoya rumainalo kone raapu kata.
Goa pua nimumi onaanu makirari napinalo pea.
12 Aa mudu king piame wae pupitagi kone luabu gimoa epe redeponea pinalo peme.
Gore mo gavman pimi aanumi epea palimi raburi nimu puri mua epe-rupa pitimi.
13 King nipumi ora agaa ria-teme onaa raaname omea.
14 King nipumi aa meda raatu yawaliare go aa nipu tumaomalia.
Go yapare aa meda nipu epe kone i yaliare mo king nipu epe kone mealia rabu lo robaa maepealia.
15 Gore king nipumi aa meda epe lo rabaa kaloa epea palia-re nipumi epe kone sua go aa epe-rupa mapiraalia.
King-na peare yaa madaa i yai lopoa suamaa ope-yaenu eta kata-rupa mada pea.
16 Neme epe kone makuae yae luabu mealiri gol-para silva go yaenu luabu ora rabuaniaye.
17 Epe onaanumi wae yae ratape gimoa waru adoa pameme.
Aa medame nipuna pora waru adoa epe-rupa pamualiare nipu ora epe-rupa piralia.
18 Wae pupitagi noa nena bi minasaawa ne apiyapa te-daare ne wae-rupa malopaalia.
19 Gore aa meda nipuna bipa nipu naara kone sua nipuna bi rabuaniaawa pitiare pupitagi ne aanuna raana meme kone page rabuaaya.
20 Aa medame ne mana-teade agaa waru aina madu pagoa piraliare ne epe-rupa pirali.
Aa medame Adaa Aa madaa kone rulaliare nipu raana adaa mealia.
21 Aa numi makuaeme. Aa meda nipumi epe kone waru makuaalia-re mo teme agaa waru ruma adalia.
Gore nipumi epe kone sua agaa epe-rupa ne aa yaliare aanu luabumi nipuna agaa pagolalo raana waru omalimi.
22 Gore aa meda nipu epe kone i yaliare go aa nipu ipa laipi kagaa pirape yae mua piri aa-rupa piralia.
Wae kone imi aanu-ri nimuna go pemeame wae maeyae aa piralia. Goa pua nipuna bipa nipu ma-oyaalia.
23 Epe kone i aa nipumi kone aba rumaawa epe kumapi agaa orope teme.
Goa pea-pulu nipuna agaa pagolalo raana waru omoa pageme.
24 Epe agaa-re ora epe redepi alubi apaa-para mena midi-lapome adea.
Nipu ora rede waru pua onaa luabu puri kata.
25 Aa medalomame nimuna pema yae luabu epeta kone sua pora pameme pare ota.
Goa pama-pama puare orope nimu omalimi.
26 Kogono peme nakinumi makuaeme.
Nimu kogono waru na palimare nimu eta diayalia kone sua kogono waru peme.
27 Wae au peme onaa luabu maoya tulalo pora rado rado asapeme.
Nipuna agaare repena sulaa ralae nona pua mo onaa luabu ma-oyaawa rabea.
28 Waea pi aame-re onaana rikiraane wae bomo agaa mea lopawa nimu yada-yada waru mapaya.
Makirae agaa-ta aame nipuna adami aanu raapu yada makepeaawa rugulala paya.
29 Yadapi aa-mere nipuna adapi aa omeme pua wae pora-para yola pea.
30 Aa medame aa meda-para ini adupi adupi paliare neme mada makuali mo aa nipumi waea pulalo pea.
Aa meda nipu agaa na-teare nipumi waea pulalo pea. Gore mo nipuna ratu yawe kone muboa waea pulalo pea.
31 Yomagae nimuna kama iri adoa nimumi aba makuaeme. Go yomagae aanu nimumi ora epe kone su epe pora rateme-pulu go kone mada kamaa aya kone-imi.
Goa kone imi rabu nimu adaa bi meme.
32 Ratu ora aipapulu nayawea aamere nipu epe kone sua pea. Go konere puri paloa yada wini peme-rupa mada.
Aa medame nipuna bipa nipu waru surubaliare ada kagure meda yada naminabaeme-rupa mada pea.
33 Kaasa saadu teme aanu-miri akea palua pae loa kone aba meme.
Go yapare Adaa Aa nipumi nimuna kaasa saadu pemeare nimuna imi kone-rupa abuta.