1 Waŋu haihaka imi tecgéyu ni kic hima kua meme uŋa 4 inicba baec waŋgoŋa 4 imuaru namma baecac luhuc 4 imi baeciguc me konduŋiguc me ic hésa hénia héniaiguc ménda qemac niŋ késama naŋgic. 2 Waŋu hémba kaiwe éré éréya igucnec kua meme uŋa méŋnéŋ Anutu kekecyaguc iwac asé kiwiya késama éréma kua meme uŋa 4 baec ʒéma konduŋ mebirimu niŋ kucgina énécmiyu késa kecʒu ionac muru kucnec qacma yomuhuc énézéyec; 3 Ini mambéc naŋgic Anutuac weleŋ qeqe ichéra ionac pakaginaiguc asé kiwiya meénécmini tecgéyuguc baec ʒéma konduŋ ʒéma ic hésa imi mebirimu. 4 Waŋu ic embac asé kiwi hai énécmimia ionac ʒaŋgégina imi Israelac ɋelihéra tuŋa tuŋa ionarunec 144,000 waŋec. 5 Waŋu Yudawac areŋhéra ionarunec imi 12,000, Waŋu Rubenac areŋhéra ionarunec imi 12,000, Waŋu Gadeac areŋhéra ionarunec imi 12,000 waŋec, 6 Aseriac areŋhéra ionarunec imi 12,000, waŋu Naftaliac areŋhéra ionarunec imi 12,000, waŋu Manaseac areŋhéra ionarunec imi 12,000 waŋec. 7 Waŋu Simeonac areŋhéra ionarunec imi 12,000, waŋu Lewiac areŋhéra ionarunec imi 12,000, waŋu Isakawac areŋhéra ionarunec imi 12,000 waŋec. 8 Waŋu Ʒabulonac areŋhéra ionarunec imi 12,000, waŋu Yosefeac areŋhéra ionarunec imi 12,000, waŋu Benʒaminac areŋhéra ionarunec imi 12,000, imuhuc asé kiwigina hai énécmimia waŋec.

9 Haka imi hémba baera baera ʒéma ic séwigina hénia hénia ʒéma hénaoriŋ hénia hénia ʒéma acgina hénia hénia igucnec ʒaŋgégina yanda méŋnéŋ méŋ olommuac séc qahac imuhucyanéŋ maleku horua lalacnec héima méraginaiguc samae ic hawa meemma ic kewu tatac imuac wésiaiguc ʒéma rama merawa iwac wésiaiguc naŋgic. 10 Namma kucnec qacma yomuhuc ʒégic; aŋgéŋ titi imi ic kewu tataciguc tacʒac neŋaŋ Anutu i ʒéma rama merawa iorac muru hezac. 11 Imuhuc ʒégic kua meme uŋa ic kewu tatac ʒéma galeŋ ʒéma yaŋ kekecginaguc imi lelecgéma naŋgic imi mocʒoŋ ic kewu tatac imuac wésiaiguc simiŋ héima kic tanecgina memama baeciguc héidacma mepésimigic. 12 Mepésimima yomuhuc ʒégic; Hélacnec mepé qepési ʒéma ʒézé bipi ʒéma niŋtegic qiŋtegic ʒéma ewa hia ac ʒéma ee héihéi ʒéma kuc ʒéma medac medac wandac wandacnéŋ Anutunina iwac muru nalé tetecgia qahac hema emma hemac. Hélacnec!

13 Ʒégic ic kuneŋ ionarunec méŋnéŋ nuac yomuhuc ʒéyec; Séwi usu horua lalacguc imi méré méré eneŋ, waŋu dimuacnec hagic? 14 Qesi néŋu ac yomuhuc melemma ʒéyi, miŋna geŋgaoc ninʒaŋ. Waŋu inéŋ nézéma ʒéyec; Imi eneŋ ʒéra waiya qeria igucnec hagic. Waŋu rama merawa iwac sawanéŋ séwi usugina imi ʒuacyacgégic lalacnec wandacʒac. 15 Hénia imuac niŋac yomi eneŋ Anutuac ic kewu tatac imuac wésiaiguc kecanʒu. Waŋu iwac ocmuŋ téréyaiguc siŋi kaiwe séc Anutu mepésimigic ic kewu tataciguc tacʒac inéŋ ionac qacginu hali ésécnec waŋ énécmimac. 16 Waŋu muŋguc tomeŋgina héla qahac ménda wamma déméŋgina muŋguc doku niŋac qaŋgararaŋ ménda qemac. Waŋu kaiwe me iwawai geriwagucnéŋ ménda kasoŋi énécmimac. 17 Hénia imi yomuhuc; Ic kewu tatac imuac namuŋaiguc rama merawa nanʒac inéŋ mia galeŋgé énécmima, doku hogocya kekecyaguc imuaru qindiŋi énécmima kemmac. Waŋu Anutunéŋ kic masigina mocʒoŋ kicgina igucnec ʒuacénéc midacmac.