Ma:tiu
Solo Puwano Matanema:na:wa Wekeye
Ma:tiu puka weyamo matanema:na: sowa wekeye. Yesuyewi sena ilipe hanosene nowa Ma:tiukeye. Ma:tiu unu nowa Lifaikeye. Puwano Ma:tiuyewi Lome kamaniwemi tima:na: tikeye. Eye tima:na: tisewa, ewa takese tisene senakeye. Yesu Ewa Koteyewi Piseikipela: epesita: ta:peya sena Kelesowa Ene ekeye. Sena kesaleyawa aluse matanemita: Ma:tiuyewi puka we momateyakeye. Puwano sepatosene senayawa Keleso inise ketea auma:na:wa sawiwemi momateyakeye. Alake iyewi momateyawa hetetiyapita: potapola: Ma:tiuyewi momateyakeye. Yesuwa hepene falemi hanapita: yapene itapa tepela: Ma:tiuyewi puka we momateyakeye.
Ma:tiu Suluwemi Mou Elakamo Momateya
1:1-17 Epalahameyewi ma:ta: tiye mina emi Yesuwa selatikeye
1:18-25 Yesuwa Selatikeye
1:18-2:23 Yesu selati ikila emi sena nokamoke wapilima:na:pela: minakeye
3:1-12 Hano toluyetiseyewi sena kesale hawemi tolusulakeye
3:13-17 Yoneyewi Yesuwa hawemi toliyetikeye
4:1-11 Seteneyewi Yesuwa poluse seya kamowa Yesuyewi eta: topumakeye
4:12-18:35 Kalili peleya: emi Yesuwa sila:sela: ela: tima:na: tikeye
19:1-20:34 Yesuyewi Kalili peleya:wa iya:pela: Yelusaleme sitiwemi hapakeye
21:1-24:66 Yesuwa Yelusaleme sitiwemi enene ikila emi Yutaseyewi ewa siheleyakeye. Sihelelepita: Yesuwa sukulutiye kotopela: sana kulukeye
28:1-20 Yesuwa tesile hanapita: sena kesale nokamoke ewa papokeye
1
Epalahameyewi Sena Maye Minawa Wekeye
Luki 3:23-38
1 Epalahame sena i maye mina emi Yesuwa hetetiwa wekeye. Yesu Keleso e mei kouwawa Tepitikeye. Tepiti e mei kouwawa epela: Epalahamekeye.
2 Epalahame e sa:wa Aisa:kekeye.
Aisa:ke e sa:wa Yakopekeye.
Yakope e sa:wa Yuta, apula: e ma:ela: kesa:wayakeye.
3 Yutayawa e kesale Temawa tiyapola: sena sala elipei kesa:pekeye. Nowa Selakeye, nowa Pelesekeye.
Pelese e sa:wa Heselonekeye.
Heselone e sa:wa Lamekeye.
4 Lame e sa:wa Aminatapekeye.
Aminatape e sa:wa Nasonekeye.
Nasone e sa:wa Salomonekeye.
5 Salomoneyewi e kesale Lehape tiyapola: sena sala kesa:pewa Poasekeye.
Poaseyewi kesale Luti tiyapola: sena sa: kesa:pewa Opetekeye.
Opete e sa:wa Yesikeye.
6 Yesi e sa:wa Tepitikeye. Tepiti amowa ene piseikipela: enekeye.
Tepitiyewi Yulaiya kesale sopa:lawa tiyapola: sala kesa:pewa Solomonekeye.
7 Solomone e sa:wa Liapohamekeye.
Liapohame e sa:wa Apaisakeye.
Apaisa e sa:wa Asakeye.
8 Asa e sa:wa Yeho:sefatekeye.
Yeho:sefate e sa:wa Yolamekeye.
Yolame e sa:wa Usaiyakeye.
9 Usaiya e sa:wa Yotamekeye.
Yotame e sa:wa Ehasekeye.
Ehase e sa:wa Hesekaiyakeye.
10 Hesekaiya e sa:wa Mana:sakeye.
Mana:sa e sa:wa Amonekeye.
Amone e sa:wa Yosaiyakeye.
11 Yosaiya e sa:wa Yehoiyasine apula: e ma:ela: kesa:pewayakeye. Ikila emiwa Papilone peleya:wemi siliye hapakeye.
12 Papilone peleya:wemi siliye hapalapita:, Yehoiyasine e sa:le kesa:pewa Siatiokeye.
Siatio e sa:wa Selapapeokeye.
13 Selapapeo e sa:wa Apiutekeye.
Apiute e sa:wa Eliakimikeye.
Eliakimi e sa:wa Esolokeye.
14 Esolo e sa:wa Sa:tokekeye.
Sa:toke e sa:wa Akimekeye.
Akime e sa:wa Eliutekeye.
15 Eliute e sa:wa Eliesakeye.
Eliesa e sa:wa Ma:ta:nekeye.
Ma:ta:ne e sa:wa Yakopekeye.
16 Yakope e sa:wa Yosepekeye.
Yosepe ekewa Melikeye.
Meliyewi sala kesilawa Yesukeye. Yesu Ewa Piseikipela: epesita: Koteyewi tila:tesa: apoyanase Ene unu unuwapowa Kelesokeye.
17 Alake, Epalahame sena i maye minawa akeye hanapola:, kena:wa (14) Tepitikeye. Tepiti sena i maye minawa akeye hanapola:, kena:wa (14) Papilone peleya: emi tipolo selama:na:pela: hapa ikila emi sena sa: kesa:pe akeye. Papilone peleya: emi tipolo selama:na:pela: hapa emi ma:ta: tiye akeye hanapola:, kena:wa (14) Kelesokeye.
Yesu Keleso Kesilawa Wekeye
Luki 2:1-7
18 Yesu Keleso kesilawa wekeye. Ene e amawa Meli amowa Yosepeyewi setetima ela: semini enene ikila emi, Meli suwemi Ho Napoyewi sala selawatapita: alelakeye. 19 Alepita: potapola:, Meli semini sena Yosepewa ene o:sulu ela:, solo ele tuwapowa kulu hanose o:sulu hopola enenase eyawa matanese, “Meli sena nowanapulu hapalapo. Aluse, ema sosolo kotokamakiwa sena sopoyawa Ewa ewama:pekise semiwa o:sulu iya:pa:na:keye.” 20 Aluse matanepela: enewemi, uwa koane Piseiki Koteyewi hepene sena inapola: Yosepema selese, “Tepitiyewi sena i Yosepe. Ke kesale Meliwa tima:na:wa tutumanose ipilise iya:tapa. Kine koane Meliwa siliye ha:na:pa:. Ene alela epeya Ho Napoyewi sala ema selawapokeye. 21 Sala amowa sena sa: keisa:taposakeye. Keisa:tapita: Ewa unuwatese Yesu unuwata:pa:. Yesu unuwapo mouwa Isolaiya sena kesalewa ketea olokeyatelawa tiya:sela: sitalapitekiwa, iwa falasima:pekise Eyewi mene siliyaposakeye.”
22-25 Apula:, Yosepe tesile hanose Piseiki Kote hepene senayewi seyawa ta: tiyapola:, Meliwa ene koane siliye hapakeye. Hanapola: Meli sala a kesima:na: enene ikila emiwa, Yosepe ewalapuluwa elipewa mowa eta: hapamakeye. Meli alela ela: sena sa: keisa:tapita: potapola: sala amo unuwatese Yesu unuwapokeye. Yesu minawa, nano ketea amowa sopoke auma:na:no, puwano fa:nemi sepatosene senayewi Kote sowa ta:tapola: pukawemi momateyakeye.
Pukawemi momateyawa wekeye. “Ta:ta:pa:, kesale pola alela elaposakeye. Alela elapepela: sena sa: keisa:taposakeye. Keisa:tapita: Ewa unuwatese Ima:niuele unu unuwata:pa:,” aluse Piseiki Koteyewi selapitekiwa sepatosene senayewi ta:tapola: momateyalakeye. *Aisaia 7:14
Momateyawa heteti epalakeye. Aputa: Ima:niuele unuwapo mouwa, Kotewa niwanapulu elakeye. Aluse unuwapokeye.