HEBERU
Heberu vega-matagaina kilara
Epepa rai na etaloato talima ta ati ripana. Reketa gekilana Luka na etaloato, reketa gekilana Apolos, pa Banabas, pa Prisila, pa Akwila, pa Paulo na etaloato negetina. Gutuma gekilana Paulo negetina kwalana pepa Paulo gena pepa talo kolemanai getaloato. Epepa rigolo 60 e 70 vekarawarai getaloato, Iesu ekwaregato mulinai.
Epepai golea kamura tenu 1:3; 4:14-16.
Epepa etaloato talimana gena ririwa kamuna:
1) Heberu ekalesiara pene vaikilara, ekalesia magulina taunataunanai pia maguli, a Iuda geria tene rovara e magulira geriana pia laka-gerevagi geriai ragai mapia waikule-wai, maguli vanagivanagi ati nege rawaliana kalinana (2:1; 6:4-6; 10:26);
2) Iesu Keriso pene vega-matagaia, ia Palagu kolemana taunatauna na ematagaito tanoparai;
3) Palagu gena Vekapawai Valiguna Iesu genai etaunataunato gauna pene vega-matagai -namanamaa netiwato.
Epepa evetaina enavugaato:
1. Vevega-ripa kilara (tenu 1:1–10:18)
2. Ekalesia talutaluna magulira (tenu 10:19–13:25)
1
Palagu gena kila Natuna genana
1 Kunenai, toma vogo e raupara gutumai Palagu na peroveta talimara geriana tenera evaikilarato. 2 Na etoma ikarai, Natuna genana ema vaikilarato. Palagu na gaura maparara Natuna eveniato pene gaunara. E ia genana maki Palagu na kupa e tanopara ekalarato. 3 Ia Palagu kolemana e maekana iwavagina evega-matagairana, e ia Palagu gelegele vagina. Ia gena kila tiavuna na gau maparara egapi-tagorana. Ia matotauna na gera rakava guligi-vagira rauparana ekala-gitakauato mulinai, Palagu goloka iwavagi aloripanai evetanu-talito kupai.
Palagu Natuna kamu iwavagi, aneru maki evanagirato
4 Palagu na Natuna evetao-rageato, aneru evanagirato. Kwalana arana eveniato maki verage iwavagi, aneru arara evanagirato. 5 Kwalana Palagu na aneru ta ati evaikilaato, netiwato,
“Goi au Natuku,
toma au goi Tamamu ai paago.”
Pa evetaina maki ati evaikilaato, netiwato,
“Au ia Tamanai pana ago,
e ia maki au Natuku ai pene ago.”
6 E Palagu na Natuna kunena tanoparai mapene vaimaia aonai pene kila,
“Palagu gena aneru maparami na pio aliruputali-venia.”
7 Aneru evaikilarato aonai ekilato,
“Palagu na gena aneru ekalarato agi vetaina,
gena vetugunagi talimara kalova emolena vetaina.”
8 Na Natuna ekilagiana netina,
“Palagu o,
goi gemu vele rakina pene mia-vanagivanagi,
gemu Basileia marorirorimuna na ovaiana.
9 Kala rorirori oririwarana,
na kala rakavara ati oririwarana.
Gaura pakurai, Palagu o,
gemu Palagu na maki taukavamu vekarawarai goi evirigimuto,
repamu ai riga epopoato, verere na evega-vonumuto.”
10 E maevaikilaato, netiwato,
“Vele o, tovotovonai goi na tanopara okalaato,
e kupa maki goi gimamu kalakalana.
11 Ira pia aiki, na goi pono talu;
maparara rapuga vetaira pia rakava.
12 Goi na kouti vetaira pono ikura,
rapuga vetaira kolemara pia irau,
na goi kolemamu ati pene irau,
e goi gemu maguli rigolora maki ati pia ika.”
13 Palagu na aneru ta maki ati evaikilaato,
“Aloripaku ai onoma tanu, pene ago,
goi gevetali-venimuna talimara goi gagemu
panakaura gaunai pana tao-talira.”
14 Aneru maparara vetugunagi palaguramo, Palagu na etugurato raira vevega-maguli pia gapia talimara veakavara ularana.