5
Mamoe Natuna e talotalo pepana mogana
1 Ne apoeto, voteronai etanu-tagowai talimana gimana ripanai talotalo pepana mogana ta agitaato. Vopepa kava ruala matalotalona, gepinuato, e vega-taulatoi kwapuna gekara-gavuato. Gekara-gavurato kapura maparara rova vegailiana getaoato. 2 Tiliga rakavarakava aneru na ta agitaato, karona ati keikeina kamu iwavagi evopatato, ekilato, “Rai gelegele ekumukumu rovana pene gaivagia ripa, e epepa mogana matalotalona pene kala-pakaa?” 3 Na talima ta kupai pa tanoparai pa tanopara kapulenai ati gelegele vagi vopepa pene kala-pakaa e aonai pene poe-rigo. 4 Ne atagi-rakavarakavato, kwalana talima taa vagi maki ati gerawaliato, vopepa mogana matalotalona pene kala-pakaa e aonai pene poe-rigo. 5 Ne vovegitatago talimara kamura taa na evaikilakuto, netiwato, “Ragai ono tagi! Ono poe-ago! Iuda kwaluna geria liona, Davida Natuna ono gitaa, ia ekwalimuto. Ia na nepepa mogana matalotalona pene kala-pakaa, e gekumuato kumukumura rovara taulatoi kwapuna maki pene gaivagira.”
6 Ne apoe-agoto, Mamoe Natuna agitaaato. Ia terona nugana tumakenai eruga-tagowai, vomaguli gaura vativati (4) e vegitatago talimara kamurana geruga-gegelagiato. Mamoe Natuna gitagitana noo reketana gevagi-kwaregaato. Ia varuna taulatoi kwapuna e matana maki taulatoi kwapuna. Voo Palagu palaguna taulatoi kwapuna ekilagirana. Ira Palagu na tanopara maparanai etugu-agorato. 7 Mamoe Natuna eagoto, ne teronai etanu-tagowai talimana gimana ripanai vopepa mogana matalotalona gauna egapiato! 8 Pepa mogana matalotalona egapiato aonai, maguli gaura vativati e vegita-tago talimara kamura gagala ruala vativati (24) Mamoe Natuna wailanai gevetiu-talito. Ira kwapurakwapura mageria hap (kita vetaina) e kolo gulora aorai mulamula kovuna maponara. Vokovu maponara voo Palagu gena talima veagara geria rapali kilara. 9 Ne ira na mari valiguna ta evetaina gemariato,
“Goi na pepa mogana matalotalona pono gapia gelegele,
e ia kumukumu na rovara maki pono kala-pakara gelegele,
kwalana goi gevagi-kwaregamuto,
e goi ralamu na maru e gare Palagu gena ovoi-vagirato
kwalu maparara geriana, e karo maparara geriana,
e pete maparara e tanopara maparara na.
10 Goi na ira Palagu gena Basileia kwaluna talimarai ovega-agorato,
e Palagu vetugunagina pia ago-veni ulanana Rupu Veaga velerai ovega-agorato.
Ira tanopara maparana atanai pia vekuneagi.”
11 Apoe-agoto, aneru karora galagala-vagi akamonagirato. Voaneru gutuma galagala-vagi ati vega-agi-venira. Ira na terona e maguli gaura vativati e vegitatago talimara kamura geruga-gegelagirato. 12 Emari gemari-rakukuato,
“Mamoe Natuna, gevagi-kwaregaato gauna,
magena rorirori, tiavu pene gapia,
e rinaga vogo, e aoneka, e kwalimu pene vaia!
E ia magena rorirori taunilimalima maparara na
pia kupa-ragea, e pia vega-ragea e pia vone-lagi-agia!”
13 Ne Palagu na ekalarato gaura maparara kupa aonai, tanopara atanai, tanopara kapulenai, e rawapara aonai gaura maparara na emari gegapi-itiato akamonagiato,
“Teronai etanu-tagona Palagu na e Mamoe Natuna,
tauria ruala na vega-rage, vekuparage, ralema iwavagina,
e tiavu pia gapira, pene ago vanagivanagi ati ikana!”
14 Ne maguli gaura vativati na gevega-taunataunaato, gekilato, “Amen!” E vegitatago talimara kamura gagala ruala evativati (24) gevetiu-talito, Palagu gealiruputali-veniato.