1 Kweluvala taitu otutala milamala e tuta makwaina gweguya bilosi okabilia, e Yowabi ivisunupuloi tokabilia e iyouli valu Amoni. Mitaga guyau Debida isisu wala Yerusalem. E matausina isiulaisi isipataisi vilouveka Raba, isugigayaisi mavilouna deli ikodidaimisi. 20.1 2 Sml 11.1 2 E mina Amoni si tokolu yagala Moleki kala kulupewa makwaina goulawokuva wala kala mokaila makawala lima yuwa petala kaula (34 kg). E olumoulela makwaina isisu kwaitala kala katububula, dakuna saina mwau mapula. Debida ikau dakuna makwaina isaili okala kulupewa titoulela. Matauna tuvaila ikau saina bidubadu guguwa metoya valu mavilouna. 3 E matauna ivayouli tomotala ivigaki bikabisi sowa, daima, deli legisa. Matauna ivigaki makawala wala baisa viluwela Amoni komwaidona. Oluvi matauna deli la tokabilia ikaimilavausi Yerusalem.

4 Oluvi kabilia itokaia tuvaila deli mina Pilisitia mapilana Gesera. Baisa eikaloubusi tuta matutona Sibekai tolela Usa ikatumati taitala kala vakaila makawala mabudona dokanikani yagala Sipai, e itomgwagasi odubasi mina Pilisitia. 20.4 1 Sml 17.4-7

5 E kwaitala tuvaila kabilia itokaia deli mina Pilisitia, e Elanani matauna Yairi latula ikatumati Lami matauna bodala Golaiati tolela Gata. Matauna la kaiyala kaitobuluvala kala poupou makawala kaitala kaisilolia.fBaisa saina poupou makawala kaitala kawala kauloyagila bibodi bitatolasi masawa.

6 E tuvaila kwaitala kabilia itokaia mapilana Gata, e baisa isisu taitala mabudona dalesi dokanikani misikwaikwela oyamala kweyalima kweyatala e okaikela kweyalima kweyatala. Matauna dalela mabudona dokanikani tobubogwa. 7 Matauna iyokukoli mina Isireli, e Yonatani matauna latula Samma Debida bodala ikatumati matauna.

8 Matausina kasitaitolu dalesi mabudona Gata dokanikanila, e Debida deli la tokabilia ikatumataisi.