Paulo La Ginigini Yamatala Baisa
MINA TESALONAIKA
MINA TESALONAIKA
Kabovitouula
Tesalonaika baisa valu viloumatala oluwala makwaina mina Roum si valu Masedonia. E igau tutala isilavi Pilipai, Paulo eitavi tumilela ekalesia budotala olumoulela mina Tesalonaika. E Paulo eikamituli Bulogala Bwaina baisa matausina gala mina Yudia, e bidubadu eidubumaisi. Mapaila mimilisi mina Yudia isim si pogi e isilibodaisi Paulo. E mapaila Paulo eiboda lamadada mwau e isilavi Tesalonaika ilokaia Beria. Igau tuta matutona Paulo iviloubusi Korinita, e sola Timoti ima ikamituli bulogasi toekalesia mapilana Tesalonaika. Paila Timoti deli Paulo eiwotetilasi mapilana paila Yesu Keriso.
E oluvi Paulo eigini miyana Paulo La Ginigini Yamatala Baisa Mina Tesalonaika. Uula Paulo magila bikatululuti bikatupewoli totapwaroru mapilana valu. Ikugwa inokagutoki baisa Yaubada paila eilagi bulogala si dubumi deli si yebwaili. Ikatululuwai mina Tesalonaika ammakawala eipaisewa tuta makwaina eisisu olumoulesi, e oluvi imapu mimilisi si katupoi, avaka avaka totapwaroru eikatupoisi paila yam makwaina Guyau Yesu bikaimilavau. Paila leikatupoisi, kawasi, “Kidamwa igau tuta matutona Keriso gala bikaimilavau e taitala todubumi bikaligabogwa, ammakawala? Gagabila matauna bibani makwaina momova kwaivau avaka Keriso bimai?” E tuvaila kawasi, “Avai tuta goli matauna Keriso bikaimilavau?” Paulo iluki matausina ibodi bimanumsi bipupaisewasi e deli si pikwaku bitutulaisi yam makwaina Keriso bima.
Buki kala katumimisa
Kala vitouula 1.1
Paulo inokagutoki iyakawoli Yaubada 1.2—3.13
Ikatululuti mina Tesalonaika bibubunasi bwaina
e biyomwasalaisi Yaubada 4.1-12
Ivituloki paila yam makwaina Guyau bima 4.13—5.11
Ikatumkulovi kasi katuloluta 5.12-22
Kala vigimkovila 5.23-28
1
1 Yeigu Paulo, e deli SailasaaMatauna taitala Paulo sola deli kala topilasi (kugisi VA 15.22—18.5). sola TimotibMatauna taitala Paulo sola deli kala topilasi eititavina deli matauna; kugisi VA 16.1-3. lakaginisi miyana mi leta yokomi toekalesia mapilana Tesalonaika.cMapilana Masedonia la viloumatala. Liliula tuta kwematala Paulo eiviloubusi baisa isisu VA 17.1-9. Yokomi goli la tomota Yaubada Tamadasi deli Guyau Yesu Keriso. 1.1 VA 17.1
Kanigadasi baisa Yaubada kidamwa bimitukwaiyaimi e bitalaguva lupomi.
Mina Tesalonaika si kaisisu deli si tapwaroru
2 Tuta komwaidona kanokagutokisi baisa Yaubada paila yokomi komwaidomi e tuta tuta oma nigadasi kakavitagaisi yagami. 3 E tutala kanigadasi omatala Yaubada Tamadasi, kaluluwaisi mi dubumi, mi yebwaili e mi pikwaku. Paila lakagisaisi mi dubumi uvagila, deli kaluluwaisi ammakawala lokupaisewasi peula paila uula mi yebwaili. Tuvaila kaluluwaisi ammakawala mi pikwaku paila da Guyausi Yesu Keriso gala biyega. 4 Segwaia, bogwa kanikolaisi Yaubada iyebwailimi deli inagaimi kidamwa yokomi la tomota. 5 Paila bogwa lakamiakaimi makwaina Bulogala Bwaina. Gala bigawokuva wala, mitaga lakavitulokaimi Bulogala Bwaina kala peula metoya baisa Baloma Tobumaboma. E tuta makwaina kanikolaisi wala makwaina Bulogala Bwaina bigala mokwita. Bogwa kunikolaisi ammakawala kabubunasi tutala deli tasisuaisi. Avaka avaka kavagaisi, mwada bakapilasaisi mi tapwaroru. 6 E yokomi kukwavisakaimasi deli goli kukwavisakaisi Guyau. Kalubikoya lokulumkolaisi mmayuyu sainela, lokuyosisi Bulogala Bwaina deli mi mwasawa, e mwasawa makwaina leima metoya baisa Baloma Tobumaboma. 1.6 VA 17.5-9 7 Mapaila lokuvigakaimi si kabogigisa komwaidosi todubumi baisa mapilasina Masedonia deli Akaia. 8 Paila Bulogala Bwaina paila Guyau isunapula metoya baisa yokomi ilokaia mapilasina Masedonia deli Akaia. E gala Masedonia deli Akaia wala, mitaga bulogala mi dubumi baisa Yaubada eilokaia ambaisa ambaisa. E mapaila gala avaka ibodaimasi bakalivalasi paila baisa. 9 Komwaidosi tomota matausina ibigatonasi ammakawala lokuvakoulaimasi tuta makwaina lakavakawolaimi deli ammakawala lokuligaiwaisi tokolu lokuninavilasiga baisa Yaubada kidamwa bukuwotitalaisi Yaubada Tokamokwita deli Tomomova. 10 Deli ibigatonasi ammakawala kututulaisi Latula igau bima metoya wa labuma. Matauna Latula goli Yesu, Yaubada eitokowoi e imovavau. E deli matauna bikolaidasi metoya Yaubada ola ninamwau paila mitugaga, tuta igau bima.
a1:1 Matauna taitala Paulo sola deli kala topilasi (kugisi VA 15.22—18.5).
b1:1 Matauna taitala Paulo sola deli kala topilasi eititavina deli matauna; kugisi VA 16.1-3.
c1:1 Mapilana Masedonia la viloumatala. Liliula tuta kwematala Paulo eiviloubusi baisa isisu VA 17.1-9.
1:1 1.1 VA 17.1
1:6 1.6 VA 17.5-9