Paulo La Ginigini Baisa
MINA GALETIA
MINA GALETIA
Kabovitouula
Bidubadu tomota gala mina Yudia ilagaisi Bulogala Bwaina paila Yesu, e deli si mwasawa idubumaisi. Mitaga mimilisi ininayuwasi avai bubunela ibudoki todubumi, kaina ibodi bikatumkulovaisi dubumi e bikabikuwolaisi Mosese la Karaiwaga. Paulo eilivala nanola mwada gala bibodi makawala. Paulo eikamituli kidamwa Yaubada bikabwailida paila wala tadubumaisi Keriso. Mitaga mimilisi tomota ititavinaisi mapilana mina Roum si valu olumoulela Esia, yagala Galetia, e mapilana isilibodaisi Paulo e ivitulokisi mina Galetia ibodi bikatumkulovaisi dubumi baisa Keriso, kidamwa tuvaila bikabikuwolaisi Mosese la Karaiwaga, mwada oluvi Yaubada bikabwaili matausina.
Mapaila Paulo eigini miyana Paulo la ginigini baisa mina Galetia, kidamwa bipilasi matausina availa availa eibokulaisi makwaina vituloki sasopa, kidamwa bikaimilivau matausina bidubumaisi e bibubunasi duwosisia wala.
Ikugwa Paulo ikamituli la aposetolo, ammakawala eibani kala naga. Ikamituli mimilakatila kidamwa ibani kala dou metoya baisa Yaubada, gala metoya baisa tomota, e deli kidamwa Yaubada inagi matauna bikamituli Bulogala Bwaina baisa matausina gala mina Yudia. Oluvi ikamituli ammakawala Yaubada bikabwaili tomota paila uula wala si dubumi. Okala vigimkovila miyana leta Paulo ivituloki kidamwa totapwaroru si bubunela uulela makwaina yebwaili avaka ikaloubusi metoya wa dubumi baisa Keriso.
Buki kala katumimisa
Kala vitouula 1.1-10
Paulo kala naga kala dou paila aposetolo 1.11—2.21
Bulogala Bwaina paila Yaubada la mitakwai 3.1—4.31
Avai bubunela bibudoki totaneku paila uula Keriso 5.1—6.10
Kala vigimkovila 6.11-18
1
1 Yeigu Paulo aposetolo.aMatauna isim kala karaiwaga bililivala deli biuvagi metoya ola karaiwaga matauna kala towitala; kugisi makasana Biga Kala Katumiki. Tomota gala idouwaigu mwada bamila aposetolo, e gala abani agu dou metoya oninasi tomota. Mitaga abani agu dou metoya baisa Yesu Keriso, deli Tamadasi Yaubada, matauna eitokowoi Yesu imovavau. E mapaila lagini miyana mi leta. 2 Komwaidosi sedaiasi baisa, e deli yeigu, kawitalaisi ma bigasi bobwailila baisa yokomi toekalesia mapilana Galetia.
3 Anigada baisa Yaubada Tamadasi deli Guyau Yesu Keriso kidamwa bimitukwaiyaimi e bitalaguva lupomi.
4 Keriso itugwali titoulela okaliga paila da mitugagasi kidamwa bitanekwaidasi metoya tuta baisa kala gaga, e makawala ikabikuwoli nanola Yaubada Tamadasi. 5 Baisa Yaubada kala yakaula gala biwokuva, bikanigaga wala. Emeni.
Bulogala Bwaina kwetinidesi wala
6 Wa! Iyowa lopogu sainela. Ammakawami? Tuta pikekita wala lokusalausi, e saina nanakwa kuligaimwaisi Yaubada, matauna eidouwaimi metoya ola mitakwai Keriso, e kuluvapelasiga kuiyosisi bulogala bwaina ituwoli! 7 Mitaga gala isisu avai bulogala bwaina ituwoli. Lalivala makawala paila mimilisi tomota itateyasi ninami e mwada bikatumapwaisi Bulogala Bwaina paila Keriso. 8 Kalubikoya availa yakamaisi e kaina goli anelosi metoya wa labuma, bikamituli bulogala bwaina ituwoli baisa yokomi, e gala makawala Bulogala Bwaina avaka kakamitulibogwi baisa yokomi - ka, ibodi matauna biboda kala kamwaga e bisuvi wa Eli. 9 Bogwa kalukibogwimi makawala, e tuta baisa yeigu alivilivau. Kidamwa availa bikamituli avai bulogala bwaina ituwoli baisa yokomi gala makawala makwaina avaka bogwa lokukwauwaisi ibodi matauna biboda kala kamwaga e bisuvi wa Eli.
10 E ammakawala baisa avaka lalilivala? Ki, kudokaisi yeigu anainevi ammakawala tomota bikavisaigusi? Gala goli! Yeigula magigu wala Yaubada bikavisaigu. Ammakawalaga? Ki, kudokaisi magigu tomota biyakawolaigusi? Ka, kidamwa magigu tomota wala biyakawolaigusi, e yeigu gala basisu towotetila paila Keriso.
Paulo ibani kala dou
11 E segwaia, sitana balivala baisa yokomi. Makwaina Bulogala Bwaina avaka akakamituli, gala metoya baisa tomota. 12 Gala akau vituloki metoya baisa avai tau deli gala goli availa ivitulokaigu. Mesinaku wala Yesu Keriso titoulela eikimitali baisa yeigu.
13 Bogwa kulagaisi ammakawala yeigu omitibogwa labububuna tutala akakabikaula baisa mina Yudia si tapwaroru. Lokulagaisi ammakawala lalamidadi Yaubada la ekalesia. Gala anokapisi matausina, mitaga asalau mwada bamtuli. 1.13 VA 8.3; 22.4-5; 26.9-11 14 Yeigu saina asalau ulo kabikaula baisa ma tapwarorusi mina Yudia, e tuta komwaidona yeigu goli atomgwaga salau odubasi kama tubwasi matubona, e yeigu wala aluluwai aiyosi kasi gulogula tubumaiasi. 1.14 VA 22.3
15 Mitaga Yaubada Tomitakwai inigibogwaigu igau inagu gala iunaigu, e idouwaigu kidamwa bawotitali matauna. 1.15-16 VA 9.3-6; 22.6-10; 26.13-18 16 Mapaila Yaubada inagi biyomitali Latula baisa yeigu kidamwa bakamituli Bulogala Bwaina paila matauna baisa matausina gala mina Yudia. E tuta matutona goli gala awokaia avai totapwaroru mwada biteya nanogu. 17 E gala alokaia mapilana Yerusalem mwada bagisi aposetolo tobubogwa. Kaimapula wala asaitaula ala Arebia e oluvi akaimilavau ama Damasiko. 18 E igau taitu kwaitolu eiwokuva e alokaia Yerusalem kidamwa matauna Pita bilukwaigu mimilisi vavagi, e deli lakasisu kwaiyu wiki wala. 1.18 VA 9.26-30 19 E gala goli abodi avai aposetolo tuvaila, mesinaku wala Yemesa, matauna Guyau bodala.bMatauna tokugwala ekalesia mapilana Yerusalem (kugisi VA 15.13).
20 Baisa ulo ginigini bogwa lakamokwita. Yaubada omatala, gala alivala biga sopa.
21 Oluvi alokaia mimilisi valu oluwalaisi mapilasina Siria deli Silisia. 22 Mitaga tuta komwaidona toekalesia mapilana Yudia gala eibodaigusi avai tuta. 23 Inikolaisi wala avaka mimilisi ililivalasi, kawasi, “Matauwena omitibogwa ilamidadaimasi, ka, tuta baisa ikikamituli bigala tapwaroru, makwaiwena omitibogwa mwada bikodidaimi.” 24 E mapaila iyakawolaisi Yaubada paila uula yeigu.
a1:1 Matauna isim kala karaiwaga bililivala deli biuvagi metoya ola karaiwaga matauna kala towitala; kugisi makasana Biga Kala Katumiki.
1:13 1.13 VA 8.3; 22.4-5; 26.9-11
1:14 1.14 VA 22.3
1:15 1.15-16 VA 9.3-6; 22.6-10; 26.13-18
1:18 1.18 VA 9.26-30
b1:19 Matauna tokugwala ekalesia mapilana Yerusalem (kugisi VA 15.13).