14
Waigigi mapilana Yuda
1 E Guyau ilukwaigu paila waigigi makwaina kawala,
2 “Ka, Yuda bogwa eiuvalam,
e viluwela bogwa eikikaligasi.
E tomotala ikanubilabalasi opwaipwaia deli si ninamwau,
deli Yerusalem eidoudou paila pilasi.
3 Matausina si guguwa bidubadu iuwitalaisi si towotetila bilolosi paila bikikasopisi.
E towotetila bilosi outuwotu,
mitaga gala wala bibubanaisi sopi.
E mapaila matausina bikikaimilavausi yaukuwokuva wala kasi lukwava.
E matausina bisilumwagudusi wala,
deli kala mama ninasi, e deli si ninayuwa.
4 E matausina tobigubagula ibulokatuwoli goli,
e bisikulukululusi wala,
paila uula gala kuna,
e pwaipwaia bogwa eibidapakala.
5 E minana dia navalulu
biligaiwa wala latula osaivau,
paila uula gala wala kasi mnumonu.
6 E ase nabubolodila bilosi itowaisi odabala koya
e bipuluyakayakasi makawala ugiwagi.
E mitasi bogwa eibiliuya
paila uula gala isim kasi.
7 E ulo tomota idousi baisa yeigu kawasi,
‘Guyau, ilagoli ma mitugagasi bogwa eibanaimasi,
mitaga kanigadaimsi bukupilasaimasi, makawala goli bogwa lokukwatotila.
Yakamaisi saina sivabidubadu katotubulokaimsi,
e yakamaisi bogwa lakamitugagasi omatam.
8 Mwa! Yoku goli kammwaleta lokukolaimasi metoya okabosilagi komwaidona,
mapaila yakamaisi mina Isireli ma pikwakusi baisa wala yoku kammwaleta.
Mwa! Avaka uula lokuvigakaim makawala taitala tomitawasi oma valusi,
kaina makawala taitala tokwaidadina bima e bivaiwasi kwaitala wala bogi ke?
9 Avaka uula lokuvigakaim makawala taitala tonakaka,
kaina makawala taitala tokwabilia gala isim la peula paila bipilasi, kadai?
Mitaga Guyau, yoku deli yakamaisi!
Yakamaisila m tomota,
e taga kusilavaimasi!’ ”
10 E Guyau ilivali livalesi matausina tomota kawala, “Matausina iyebwailisi bisisakaulasi metoya baisa yeigu, deli gala wala bikaraiwogaisi titoulesi. Mapaila gala sitana imwamwasila nanogu baisa matausina. E bogwa bikatululuwaiyaigu vavagi gaga makwaisina bogwa eivagaisi e yeigu bamipuki matausina paila si mitugaga.”
11 E Guyau ilukwaigu kawala, “Gala bukunigadaigu paila bapilasi matausina tomota. 12 Ilagoli kaina biposumasi, mitaga yeigu gala wala balagi si dou paila pilasi. E ilagoli kaina bigabwaisi lula, kaina goli bisemakavaisi kaula baisa yeigu, mitaga gala wala biyomwasalaisi nanogu. E kaimapula, yeigu bakatumati matausina metoya okabilia deli molusaula deli wa lelia.”
13 E oluvi alivala kawagu, “Guyau Yaubada, yoku bogwa kunikoli tovitoubobuta komwaidosi eilulukwaisi tomota mwada gala tuvaila kabilia, kaina molusaula, paila uula yoku bogwa lokukwatotila mwada vakota wala bisisu oma valusi.”
14 Mitaga Guyau ivitakaula kawala, “Ka, tovitoubobuta matausina isisasopasi wala livala oyagagu. Yeigu gala awitali matausina, kaina basaiki avai karaiwaga, kaina avai biga baluki matausina. E kilisala makwaisina eililivalaisi, gala metoya baisa yeigu. E si vitoubobuta komwaidona wala gala dimlesi, paila vavagi makwaisina baisa oninasi wala idokaisi avaka bikaloubusisi. 15 Ka, yeigu Guyau balukwaim avaka bavigaki matausina tovitoubobuta sasopa. Gala awitali matausina, mitaga ililivalasi oyagagu deli eilivalasi mwada kabilia deli molusaula gala wala bimakaia valu makwaina. Mitaga ka, yeigu eimati bakatumati matausina okabilia deli goli molusaula. 16 E availa availa matausina bogwa eilagaisi si biga matausina tovitoubobuta sasopa, matausina eimati bikaligasi makawala goli matausina tovitoubobuta. E uwosi biluvimakavaisi wala okadumilagela Yerusalem, e gala wala availa bibaku matausina. E vavagi makwaina bikaloubusi baisa komwaidosi wala - deli goli si kukova, litusia tauwau deli vivila. E baisa bavigaki mapula si mitugaga.”
17 E Guyau ikaraiwogaigu kidamwa baluki tomota paila ulo ninamwau e baisa makawala baluki, kawagu.
“Ibodi mitilagigu bititayelu goli omatagu yam deli bogi,
e gala ibodi avai tuta basimla.
Paila ulo tomota kasi tatavi saina tavakaveka,
deli kasi lewa saina novakaveka.
18 Avai tuta wala basunapula bala aliloula osaivau,
bogwa wala bagigisi tomata, eikatumataisi okabilia.
E avai tuta bala olumoulela valu,
bogwa wala bagigisi tomota ikikaligasi metoya molusaula.
E matausinaga tovitoubobuta deli tolula iuvagaisi wala avaka si wotetila,
mitaga gala inikolaisi avaka eiuvagaisi.”
Tomota ikayubabaisi baisa Guyau
19 Mwa Guyau! Ki, bogwa wala mokwita lokupaiki Yuda ke?
Ki, bogwala tokukolom mina SaiyonixMapilana Yerusalem. ke?
Mwa! Avaka uula lokuwogigai uwomaisi
e gala ibodi bakabwainasi ke?
Ka, yakamaisi kanainevisi paila vakota, mitaga gala wala avaka kala bwaina ikaloubusi.
E yakamaisi kapikwakusi paila katumova, mitaga kaimapula kabokokola wala isunapula.
20 Mwa Guyau! Bogwa lakamitugagasi baisa yoku.
Kakamitulaisi ma mitugagasi titoulemasi
deli goli si mitugaga tubumaiasi.
21 Ka, kululuwai m biga katotila, e taga kukwaluwouwaimasi.
Taga kuyomsili Yerusalem,
makwaina viluwela m takaikaia kweguyugwayu.yKaina Bwala Kwebumaboma kainaga makaina Kabutu Didawogala (kugisi Yer 3.16).
E taga kukodidaimi kabutu makwaina lokuvagi deli yakamaisi.
22 Mwa Guyau! Ma Yaubadasi yoku. Ma pikwakusi kammwaleta wala yoku.
Paila uula gala avai tokolu metoya avai valu ibodi biwitali kuna,
e labuma titoulela gala ibodi bivagi valu bisigula.
Mitaga yoku wala kammwaleta ibodaim bukuvagi vavagi makwaisina.