46
Itipita imama okabilia mapilana Kakemisi
1 Guyau ilukwaigu paila bulogasi boda ituwoli ituwoli, 2 ivitouula Itipita. Baisa makawala avaka eilivala paila Neko guyoula Itipita la tokabilia matauna goli Nebukadinesa guyoula Babilonia eikalisau mapilana Kakemisi katitaikinela Waya Yupereiti olopola kwevasila kala taitu Yeoyakim eiguguyau Yuda. 46.2-26 Ais 19.1-25; Isi 29.1—32.32
3 “Mina Itipita si kumatoula ikawotasi kawasi,
‘Kukwauwaisi mi vayaula e kukwatuwakedasi
bukulousi kukwabiliasi!
4 Kukwatubiasaisi mi wosa e kusilasi
e kusikomasi kami kulupewa e kukwatudelisi!
Kusimataisi mi kaiyala!
Kusikomasi tabodala uwomi!’ ”
5 Mitaga Guyau ikaibiga kawala, “Avaka lagigisi?
Matausina deli wala kasi kokola eiuvayumilasi.
Si tokabilia bogwa eikau kaikesi;
kokola wala ikatumati, isakaulasi saina gigibula,
gala ibodi bivakulokolasi.
6 Matausina mina gigibula gala ibodi bisakauligilaisi tilaula;
tokabilia komwaidona gala ibodi bikwalasi.
E opiliyavata wa Waya Yupereiti,
matausina isilubeibeusi ikapusisi.
7 Ka, avai boda mabudona eikovaiguwasi leimaisi makawala Waya Naili bititayelu,
kaina makawala kadatala waya eisuluwi papala komwaidona?
8 Mavilouna goli Itipita eikovaiguwa leima makawala Waya Naili bititayelu,
kaina makawala kadatala waya eisuluwi papala komwaidona.
E Itipita ikaibiga kawala, ‘Bogwa bakoveiguwa bama e bakuboli valu watanawa;
yeigu bakatudidaimi valu komwaidona deli tomotala.
9 Kukwaraiwogaisi wosa bivaloulasi
e waga kaibibiu bisakaulasi!
Kuwitalaisi tokabilia metoya Sudani deli Libia matausina tokwabisi vayoula
deli mina Lidia kasi tovagi luvalova kaiyala bilosi.’ ”
10 Yam makwaina Guyau Giyouveka Topeuligaga la yam.
yam lagaila bikeula kaimapu
deli bimipuki kala tilaula.
Matauna la puluta bikoma kala tilaula tatoula wala bilatali,
e buyavisi bimomom wala tatoula bilakoli kaiyola.
Yam lagaila mapilana opiliyavata opapala Waya Yupereiti
matauna Topeuligaga bivigaki kala tilaula makawala lula kala gabu.
11 Mina Itipita, kulosi Giliadi
kunevisi kaituva!
Komwaidona mi kaituva gala dimlesi;
gala wala ibodi bikatumovaimi.
12 Boda komwaidona bogwa einakaigalaisi kami mmosila;
tomota komwaidona bogwa eilagaisi mi valam.
E taitala tokabilia bisilibeibeu bilokaia sola ikanuvateta,
e kasitaiyu wala bikapusisi bilosi ikanawaisi opwaipwaia.
Nebukadinesa leima
13 Avai tuta Nebukadinesa guyoula Babilonia leima bikabilii mapilana Itipita e Guyau ilukwaigu kawala, 46.13 Yer 43.10-13
14 “Baisa bukukwamituli mapilasina viluwela Itipita,
mapilasina Migidoli, Mempisi deli Tapanesi.
Kawam, ‘Kukwatubaiasasi paila kabilia.
Mi vavagi komwaidona bogwa bidadaimi metoya baisa.
15 Avaka uula Apisi matauna mi yaubada topeuligaga eikapusi?
Ka, Guyau bogwa leiwaiya ikapusi ila opwaipwaia!’
16 Mi tokabilia eisilibeibeusi ikapusisi.
Taitala taitala iluluki sola kawala,
‘Nani, nani! Bitakaimilavausi bitalokaiasi da tomotasi,
e bitakwalasi metoya osi kema tilaula!’
17 “Matauna guyoula Itipita ibodi bitadoki igavau goli.
Ka, bitadoki ‘Tokamnomwana Minimani Ikitumou La Tuta’.
18 Yeigu goli Guyau Topeuligaga, mayeigula guyau.
Yeigu Yaubada Tomomova.
Koya Teibo dabala ikalisau koya komwaidona,
e deli Koya Kamela itotubuloki walakaiwa odabala bolita.
E makawala goli matauna igau bikabiliaimi la peula bikalisauwaimi.
19 Yokomi mina Itipita,
kukwatubaiasasi paila bogwa bilauwaimi okatupipi!
Mempisi bimila viloupakala,
bidadaimi e gala availa bisiki mavilouna.
20 Itipita makawala natana bulumakau saina naminabwaita,
mitaga natana mdukovivia metoya opiliyavata leima biyokavati minana.
21 Makawala vavila isakaula, tokabilia imaisi
mitaga matausina makawala bulumakau nagugwadi gala si peula;
matausina gala ivakulokolasi paila bikabiliasi,
komwaidosi itovilasi isakaulasi.
Yamla kasi katudoum bogwa eiviloubusi,
matutona goli tutala kasi kodadaimi.
22 Itipita bisakaula, makawala natana keiyuna bisuyagila bila,
avai tuta tilaula biuvalapulasi.
Matausina ikatumataisi mavilouna metoya wa kema,
makawala tauwau ilukubalaisi kai ikikapusisi
23 e ipwailisi kwaitala ulaka.
Si tokabilia saina bidugaga gala gagabila bitakalau,
matausina ikalisauwaisi nipawa kasi bawa.
24 Bogwa eiyomsilaisi tomotela Itipita,
tomotela opiliyavata bogwa eitomgwagasi odabasi mina Itipita.
Yeigu goli Guyau bogwa lalivala.”
25 Guyau Topeuligaga matauna mina Isireli si Yaubada ikaibiga, kawala, “Yeigu igau makateki bamipuki Amona minana si yaubada mina Tebesi, deli goli mapilana Itipita toyo minasina la yaubada deli gweguyala. Bogwa bayosi guyoula Itipita deli komwaidosi availa availa idubumaisi matauna, 26 e batugwali matausina bilosi oyumasi matausina availa availa magisi bikatumataisi, matausina goli guyau Nebukadinesa deli la tokabilia. Mitaga igau oluvi tomota bisikaisi mapilana Itipita, makawala eisisuaisi omitibogwa. Yeigu Guyau bogwa lalivala.
Guyau bikoli la tomota
27 “Ulo tomota, ka, gala bukukokolasi.
Yokomi mina Isireli gala wala bukukukoluvagasi.
Yeigu bakolaimi metoya mapilana valu saina kaduwonaku,
mapilawena goli tokatupipi wala kusisuaisi.
Bukukwaimilavausi bukumaisi omi valu tatoumi e biluva uwomi bukusisuaisi.
Yokomi bukusibwabwailasi e gala wala availa biyokukolaimi. 46.27-28 Yer 30.10-11
28 Yeigu bamakaiami e bakolaimi.
Bogwa bakodidaimi komwaidona boda
ambaisa lakalibutaimi lokulosi.
Mitaga gala wala bakatudoumwaimi.
Ka, gala goli baligaiwa kami mipuki,
mitaga avai tuta bamipukwaimi kami mipuki duwosisia wala.
Yeigu Guyau bogwa lalivala.”