6
Yobi
1-2 Kidamwa agu mwau deli ulo ninamwau bitavisaikoli okabovisaikola,
3 mokaisi bikalisau mokaila kanakenuva komwaidona obolita,
mapaila gala biyowa lupomi metoya ulo biga minimanila.
4 Yaubada Topeuligaga bogwa eibasaigu okaiyala,
e yayanela la kaiyala bogwa eilukuwoli wowogu komwaidona.
Yaubada tuta komwaidona iuvitukukolaigu wala.
5 Natana ase bikamkwam mnumonu bikomata,
deli natana bulumakau bimanum bikamkwam mnumonu yammatutila.
6 Mitaga availa ibodi bikoma kaula gala deli yona?
Ammakawala pou olumoulela pupwakaula kakamwenala?
7 Yeigu gala wala ibodi bakoma kaula makawala,
avai kaula akamkoma ibulokatuwolaigu wala.
8 Avaka paila Yaubada gala bisakaigu avai vavagi banigadi?
Avaka paila gala imapu ulo nigada?
9 Ibodi wala matauna bikatumataigu!
10 Kidamwa bogwa lanikoli bivagi makawala, yeigu bamwasawa sainela
e gala wala baluluwai ammakawala agu mmayuyu kala vakaila.
Bogwa lanikoli Yaubada matauna tobumaboma;
e yeigu gala kwaitala tuta akoulovi la karaiwaga.
11 Ammakawala ulo peula vakaila bibodi basaitaulaga tomomova?
Avaka paila bibodi bamova kidamwa ulo pikwaku bogwa leiwokuva?
12 Ki, ammakawala? Yeigu wowogu dakunawokuva kaina?
Kaina wowogu kala peula makawala barasi?
13 Yeigu ulo peula bogwa leiwokuva e gala avaka ikesa paila bakolaigu titoulegu;
e gala wala ambaisa ibodi babani pilasi.
14 Kidamwa baboda vavagi mwau makawala baisa,
ibodi wala banevi lubaigwa tokamokwita -
ilagoli kaina bogwa lasilavi Yaubada kaina gala.
15 Mitaga yokomi lubaigwa,
kusipulokaigusi makawala waya makaduyosina pakalela avai tuta gala kuna.
16 Makaduyosina goli ikasuwoki sinou deli sopi kwekulokula,
17 mitaga avai tuta waigigi bilova isosusi wala itamwausi,
e lubulabu wala ikanukwenu.
18 Yuwotala kameli itamwausi
avai tuta inainevisi kasi sopi bimomsi.
Iwowausi e bidoumlabasi wala oviloupakala.
19 Mayuwona kamelila Seba deli Tema inainevisi mitaga gala wala ibanaisi,
20 mapaila si pikwaku ikaliga wala opapala makaduyosina waya kadapakapakala.
21 Yokomi mi sopa kala bidubadu baisa yeigu kala lumkola makawala makaduyosina waya
tutala kugisaisi agu mwau kuvayaitasi wala deli kami kokola.
22 Ki, avai tuta anigadaimi bukusakaigusi bobwailila kaina
bakabiki availa yamala veiguwa paila bipilasaigu
23 kaina goli mwada bikolaigu metoya agu tilaula deli agu tolamadada?
24 O bwaina, kuvitulokaigusi; kulukwaigusi avaka ulo sula.
Yeigu bamanum wala baligalega.
25 Bigatona kamokwita lutula saina peula;
mitaga yokomi mi bigatona gala wala dimlela.
26 Yokomi kudokaisi ulo bigatona gala dimlela makawala wala yagila, kadai!
E avaka uula kummapwaisi ulo biga alilivala metoya okala mwau nanogu?
27 Yokomi bukukowobobutasi paila magudisina weilova bukuvigakaisi mi ula
e bukuvigakaisi mi kaisisu bipeula metoya semia wala otalimi!
28 Ka, kugisaigusi!
Yeigu gala wala basopa.
29 Yokomi bogwa eivakasauwaimi sopa.
Mapaila desi taga kukididogaimi titoulemi.
E gala bukukwamogaigusi.
Yeigu goli tokamokwita.
30 Mitaga yokomi kudokaisi tosasopa wala yeigu, kadai!
Mi nanamsa gala wala gagabila bavitububoti avaka duwosisia e avaka doudoga.