10
Yeigu bogwa eisomitaki wowogu sisu ovalu watanawa.
Mwa, kunakaigali ulo kominimani mwau.
Mwa Yaubada, gala bukukwamogaigu.
Mwa, kulukwaigu! Avai vavagi lavagi e lokutabinakaigu agu pakula?
Ki kudoki baisa bwaina paila bukuvakatutukwaigu makawala?
Deli avaka lokububuloki yamam bukuvigaki gala wala dimlela?
E oluvi kugigili avaka tomitugaga si nanamsa eininamsaisi.
Yoku m gigisa gala makawala ma gigisa kadai?
E m momova isim kala kalitutila makawala yakamaisi kaina?
E avaka paila bukunainevi wala bukuvinaku komwaidona ulo mitugaga
deli bukusisavali wala bukuvinaku komwaidona agu pakula?
Mwa, bogwa kunikoli yeigu gala isim ulo sula,
e gala wala availa bikolaigu metoya baisa yoku.
 
Metoya oyamam kububulaigu deli kusaili katupwaila wowogu,
mitaga baisa tuta, mayumalela makweyasina lokububulaigu bukukwatumataigu.
Ka, kululuwai yoku kububulaigu metoya pwaipwaia.
Ki baisaga tuta bukukwatumataigu e bakaimilavau bamili pwaipwaia tuvaila ke?
10 Yoku kukwatupewoli tamagu paila biunaigu;
e igau wala inagu olopola yoku kuvitubwaigu.
11 Yoku kububuli totuwanegu deli wotunula wowogu yavakaveka
e kukwapoli totuwanegu metoya viliona deli kanavina.
12 Yoku bogwa kusakaigu ulo momova, deli m yebwaili ikanuvagasi baisa yeigu,
e kuyamataigu asisu wala tomomova.
13 Mitaga baisa tuta bogwa lanikoli tuta komwaidona
yoku kukium wala m nanamsa mwada bukuvisilagaigu.
14 Yoku tuta komwaidona kuiyausaigu wala mwada bukubanaigu bamitugaga,
e yoku bukupaiki gala bukuligaiwa ulo mitugaga.
15 Momwela wala bamitugaga, yeigu bogwa lasula baisa yoku,
mitaga avai tuta bavagi avaka duwosisia, gala wala sitana agu yakaula.
Yeigu saina mmayuyu nanogu e agu mmosila itabodaigu wala.
16 E avai tuta sitana bakamnumonaigu,
yoku kuuwaigigu makawala laiyoni eiwawaiga kala mauna.
E kuyogagaigu metoya om kabutuvatusi kuuvagi.
17 Yoku tuta komwaidona kubani tosilasola bikamitulaigusi e bikagagaigusi.
Kam leiya baisa yeigu tuta komwaidona biyouloveka wala;
e tuta komwaidona kunainevi avai keda avai keda paila bukuvisilagaigu.
 
18 Mwa Yaubada, avaka paila lokutagwala inagu leiunaigu?
Ibodi wala bakaligabogwa oluviga tomota bigisaigusi.
19 Kala bwaina gala bagisakola valu,
wa sekuya wala basaitaula wa laka.
20 Mwa, taga kuyokaikai wowogu.
Ki, kaina ulo tuta bogwa eivilalamila ke?
Avaka ulo tuta mmwaisala eisisu, ibodi wala bamwasawa.
21 Yeigu makateki migigu bitamwau e gala wala avai tuta bakaimilavau,
balokaia oviluwela dudubila saina dubilikitakita,
22 viluwela dudubila, kaikonigula deli kabotakainowa,
mapilana valu kala lumalama ivigaki dudubila wala.