12
Yobi
1-2 Mokwitala yokomi tomota kaigasi,
avai tuta bukukwaligasi e kabitam deli bikaliga.
3 Mitaga yeigu ulo nikoli vakaila makawala goli yokomi.
Yokomi gala tovakaveka e yeigu budami.
Gala goli. Tomota komwaidona bogwa einikolaisi m bigatona komwaidona avaka lokulilivala.
4 E tuta baisa lubaigwa eivigakaigusi wala si kaboyousokana ilagoli yeigu tomitukwaibwaila deli gala isim pikolela wowogu;
mitaga matausina igigilaigusi wala;
mitaga tuta komwaidona Yaubada immapu wala ulo nigada.
5 Yokomi gala wala isim kami mwau ouwomi, mitaga lokuvigakaigusi wala mi kaboyousokana;
yokomi mi biga kuvigakaisi agu lewa, e makateki wala bukuvakapusiaigusi.
6 Mitaga touveilau deli matausina gala inikolaisi Yaubada si sisu bwainawokuva wala,
ilagoli si peula wala titoulesi eivigakaisi si yaubada.
7 E mauna nayoyowa deli mauna nasigisagina si nikoli ikalisauwaimi e ibodi wala bivitulokaimi;
8 ibodi wala bukukwatupoiyaisi bubuli ovalu deli obolita e bivitulokaimi.
9 Komwaidona bubuli bogwa einikolaisi Yaubada wala matauna kasi tobubuli.
10 Yaubada wala kalamwaleta bubuli komwaidona kasi toyamata,
da momovasi tomota, Yaubada wala kalamwaleta ikaraiwogi.
11 Makawala m gugoveka bukununugwapu kaula,
e makawala m ligibwabwaila biga kwaitala kwaitala.
12-13 Tommoyabogwa si kabitam kabitamveka wala,
mitaga Yaubada la kabitam isim kala peula.
Tommoyabogwa si ninitalapula bogwa wala eibodi;
mitaga Yaubada la ninitalapula deli peula avaka magila bivagi.
14 Kidamwa Yaubada bikodidaimi avai vavagi, availa ibodi bivigivau?
Deli availa ibodi bitaneku taitala tau Yaubada bogwa leikatupipi?
15 Waigigi eiluvalova tutala Yaubada bikibodi labuma;
avai tuta Yaubada bikibolu labuma deli valu watanawa, dadoya bisuluwi wala valu.
16 Yaubada matauna topeula deli tuta komwaidona bikalisau wala kala tilaula;
tolamadada deli availa eilumkoli lamadada, kasitaiyu wala Yaubada ikaraiwogi.
17 Matauna ikipinigu ninasi tokaraiwaga deli ivigaki tokugwa si bubunela makawala toninagowa wala.
18 Matauna ivabu gweguya metoya osi takaikaia e ikatupipi matausina;
19 matauna ivabu tolula deli matausina tubulesi tauwau metoya osi kaisisu.
20 Matauna ivamwau udosi matausina isim kasi dubumi,
e ikipinigu ninasi tommoyabogwa.
21 Matauna iyomsili kaidadala valu
deli isaili kala kalitutila si karaiwaga tokaraiwaga.
22 Matauna iyomitali lumalama ambaisa saina dubilikitakita makawala kaliga dudubalela.
23 Matauna ivigaki boda kwaitala kwaitala bipeulasi deli bibudovekasi
mitaga oluvi ikalisau matausina deli ikatudoum matausina.
24 Matauna ikipinigu kasi tokugwa ninasi
e ivigaki matausina iwausi deli si takainowa.
25 Matausina iuvabakwalisi deli iuvagogeunasi odudubila makawala tomomom sopi kaipeula.