21
Yobi
1-2 Kunakaigali avaka balivali;
ulo nigada baisa yoku mesinaku wala kuyominumwaigu.
3 Ibodi bukukwapatu e balivalaga sitana,
e kidamwa bavenoku livala,
ibodi wala bukuyosokanaigu kidamwa magim.
4 Baisa ulo kominimani gala deli tomota;
ulo bigatona isim uula mapaila gala wala ibodi baminumki.
5 Mwa kugisaigu! Agu gigisa bogwa leibodi
bukumitakavataigu e biyowa lopom!
6 Avai tuta baninamsi avaka bogwa eikaloubusisi baisa yeigu,
bimitaki wala wowogu, bitulukwedudu wowogu deli wala titavaigu.
7 Avaka paila Yaubada itugwali tomitugaga bisisuaisi tommomova,
tatoula wala bitommoyasi e bikobaluluva si kaisisu?
8 Matausina biunaisi litusia e bibanaisi tubusia
mitaga isisuaisi wala iuvatubwasi magudisina tatoula wala bitovakavekasi.
9 Yaubada gala wala itagwala kabomwau bikaloubusi osi kaukweda;
e gala wala bikokolasi metoya osi sisu.
10 Matausina ivitubwaisi si bulumakau
e avai tuta minasina bivalulusi gala wala kwaitala mwau ibodasi.
11 Litusia bisakauluvivilasi wala immwasawasi makawala minasina lam
12 e avai tuta bilagaisi butusi gita deli loloni e deli wala kaiwosisi.
13 Osi tuta komwaidona si sisu bwaina wala
e avai tuta bikaligasi manumwokuva wala gala bilumkolaisi mmayuyu.
14 Tomitugaga ilukwaisi Yaubada taga biyokaikai uwosi;
matausina gala magisi binikolaisi nanola matauna paila si momova.
15 Si nanamsa mwada gala wala dimlela si wotetila baisa Yaubada,
kaina avai vavagi bwaina bibanaisi metoya osi nigada.
16 Matausina ilivalasi mwada metoya osi peula titoulesi eipapeulasi,
mitaga yeigu gala wala ibodi nanogu avaka si nanamsa.
17 Sivavila tomitugaga si kaitapa bimitamata?
Ki sitana taitala matausina iboda kabomwau avai tuta?
Ki, kudoki avai tuta Yaubada bimipuki tomitugaga metoya ola gibuluwa
18 e biyuvisau matausina makawala yogilumwamwaisa biyuvisau wa yagila,
kaina makawala tubumyou utuyagila biyuvisau?
19 Yoku kulivala mwada Yaubada bimipuki guditala gwadi paila tamala la mitugaga.
Mwa akatulokaim gala makawala; ibodi wala Yaubada bimipuki tomitugaga titoulela;
ibodi Yaubada bivituloki bivagi makawala paila uula si mitugaga.
20 Mapaila ibodi wala tomitugaga bilumkolaisi mokaila si mitugaga;
ibodi wala bilumkolaisi Yaubada Topeuligaga la ninamwau.
21 Kidamwa avai tuta taitala tau bogwa eikaliga,
ki kudoki sitana ikaiki wowola ammakawala litula eiligaim si mwasawa kaina?
22 Ki kudoki availa gagabila bivituloki Yaubada,
matauna goli gweguya kasi toyakala?
23-24 Mimilisi tomota gala wala igigadi gidageda isisuaisi wala tatoula ikaligasi.
Matausina si kaliga bwainawokuva wala bilosi imanum uwosi,
gala ibusi uwosi makasi kaitubwa wala kaligasi ikaligasi.
25 Mitaga mimilisi gala wala sitana si mwasawa ibinikolaisi,
tommomova avai tuta bikaligasi deli wala si ninamwau.
26 Mitaga komwaidodasi wala makawala bitakaligasi bibakwaidasi;
komwaidodasi wala bipusokaidasi mwatemwata.
27 Mwa, m nanamsa komwaidona anikoli wala iwokuva.
28 Yoku m kwatupoi kawam, “Tau matauna todabala la bwala ambaisa eititoki baisa tuta,
matauwena goli tomitugaga?”
29 Mwa, ki gala sitana kubigitoni tomota matausina tokwaidadina?
Ki gala kulilagi bulogala si kwaidadina ililivalaisi?
30 Ka, wa yam makwaina Yaubada bigibuluwa e bimipuki,
baisa tau matauna tomitugaga tuta komwaidona eisisu tomomova.
31 Gala wala availa ibodi bitabinaki taitala tomitugaga
kaina bikaimapu baisa matauna avaka komwaidona leivagi.
32 Avai tuta bilupaisi bilauwaisi wa laka bisetuwolaisi wala bilauwaisi,
okala laka makwaina isim toyamatela,
33 lakatuluwovila tomota bilokaiasi paila kala visalili matauna,
e pwaipwaia goli biyobobu matauna.
34 Mwa, yoku kuvigikoni mwada bukupilasaigu mitaga bigimakava wala!
Ka, ulo biga komwaidona lokummapu kulilivala sopawokuva wala.
Si bigatona sivitolula
(22.1—27.23)