30
1 Mitaga baisa tuta tubovau bikikatudeuwaigusi wala!
Matausina tumisia tuta komwaidona gala wala dimlesi,
e yeigu gala wala ibodi batugwali matausina bipilasaisi
ulo kaukwa paila biyamatasi sipi.
2 Matausina budotala tomamama
saina mama uwosi gala gagabila bipilasaigusi.
3 Matausina saina tonamakava,
deli bigigadi wala molu
avai tuta bibogi ovilouwokuva,
e mwada kailawalisi kai bivigakaisi kʹasi.
4 E avai vavagi wala bisususinasi oviloupakala
matausina ivigakaisi kʹasi,
deli goli avai vavagi
gala takamkoma matausina bikomasi wala!
5 E tomota komwaidona ikawotasi ikaliyabaisi matausina,
makawala wala kasi kavilaki toveilau.
6 Matausina isipepunisi wa lagi kaina onobwala
eikelaisi opapala dibodebula.
7 Olumoulela udila matausina bigougwausi
makawala mauna bigougwausi,
e bikanapitukwaisi wala gulitinidesi olawodila.
8 Matausina gweiluva deli gala wala dimlesi
gala bitadoki tauwau,
bogwa eikaliyabaisi matausina.
9 Mitaga baisa tuta matausina imaisi e igigilaigusi wala;
ivigakaigusi si kaboyousokana wala.
10 Matausina ikayuwaigusi;
si nanamsa mwada avaka si lamamada baisa yeigu
ivigakaisi si kabomwasawa sainela,
deli goli imaisi igiuwaisi migigu.
11 Paila Yaubada bogwa eiyomami wowogu mamawokuva wala,
mauula deli kasi leiya ilamidadaigusi.
12 Tomota mabudona ikabiliaigusi e ikalisalaigusi;
matausina ikatuliloiyaigusi wala;
e ikatubaiasasiga avaka si nanamsa kala vigimkovila paila yeigu.
13 Matausina ivabodaisi ulo keda mwada bikatumataigusi;
e gala wala availa bisibodi matausina.
14 Ambaisa lavigaki ulo kabokwala matausina ikodidaimsi,
e iwokaiagusi wala ikanakailagusi;
15 e kokola wala ikatumataigu;
yeigu ulo sisu walakaiwa iwokuva makawala myala yagila, bimya wala bima, bimyeia;
deli goli ulo kaisisu kala bwaina eitamwau makawala lowalowa, bibeu wala bimai e bilau.
16 Mapaila makateki wala bakaliga;
paila gala wala sitana abani agu yovaiwasi
metoya agu mmayuyu.
17 Avai tuta bibogi totuwanegu komwaidona bikamkumku
wala biwokuva metoya gidageda makwaina,
gala iukuwokuva, tuta komwaidona bigweimilaigu wala.
18 Yaubada ilitaki agu kwarekwa okaigadugu;
e ikodidaimi wala dadaimiwokuva miyasina.
19 Matauna ilavaigu ala opwadidiweta;
e agu gigisa gala tagiligali makawala wala pwadidiweta.
20 O Yaubada, adou baisa yoku,
mitaga gala wala avai tuta kuvitakaulokaigu;
e avai tuta banigada gala wala kulilagi ulo nigada.
21 Yoku kuvakatutukwaigu saina mmayuyu;
deli kulamidadaigu metoya om peula komwaidona.
22 Yoku kutugwali yagila biyuvisauwaigu;
deli kukwatuvivilaigu wala metoya outuyagila.
23 Bogwa lanikoli makateki bukuvakaligaigu,
e balokaia oviluwela kaliga,
baisa goli lokukwatubiasi paila tomota komwaidona.
24 Mwa, avaka paila kuyomiyuyu tau matauna togweiluva,
matauna goli gala kali yeiwau mesinaku binigada wala
baisa yoku paila bukunokapisi matauna?
25 Ki kudoki gala auvilam tomota
matausina eibudobodasi mwau,
deli anokapisi tonamakava?
26 Yeigu lapikwaku babani ulo mwasawa deli babani lumalama
mitaga kaimapula abani mwau deli dudubila.
27 Ninamwau deli mmayuyu bogwa wala eiyogagaigu,
yam kwaitala kwaitala agu mmayuyu isisiniveka wala.
28 Yeigu baliloula todubiyou wala, gala sitana subusobula wowogu;
yeigu batowala omitasi e bakayubabai paila pilasi.
29 Kaigagu butula saina kakapisi lula makawala kaigala
natana ugiwagi bigougwau; kaina makawala kasuwari bigilagela.
30 Kanuvinegu bogwa eivabwau;
e kuluyuviyavi eilulu wala olumoulegu.
31 Igau otobwailagu ulo kaisisu saina bwaina,
e gita deli loloni butusi kabomwasawa,
mitaga baisa tuta ninamwau deli valam eiyogibwaigu tuta komwaidona.