32
Eliu la bigatona
(32.1—37.24)
1 Paila uula Yobi eidubumi titoulela mwada gala wala isim pikolela wowola, mapaila lubaila kasitaitolu ipakaisi gala tuvaila bivitakaulokaisi matauna. 2 Mitaga Eliu itotu katitaikinela Yobi, matauna gala ibodi biyosi kala leiya, paila Yobi eikikabwaili titoulela, e eititabinakiga Yaubada. (Eliu matauna Barakeli latula, e Busa tabula, odalela Ram.) 3 Tuvaila matauna saina igibuluwi matausina kasitaitolu Yobi lubaila. Paila gala avai keda ibodi bibanaisi paila bimapwaisi Yobi la biga, e baisa eivigaki kala gigisa mwada Yaubada eisula. 4 Matauna Eliu molagwadi oluwalaisi komwaidosi, mauula matauna itulotula tatoula wala komwaidosi eivenokusi bigatona. 5 Avai tuta bogwa leigisi kasitaitolu wala gala ibodi bivitakaulokaisi Yobi, e matauna igibuluwa, 6 mapaila ivitouula wala ibigatona.
Eliu
Tauwau, yeigu gwadi e yokomi tobubogwami valu,
e baisa uula akukolaimi wala balukwaimi avaka ulo nanamsa.
7 Yeigu ulo nanamsa mwada yokomila bukubigatonasi,
paila yokomi tobubogwami valu ibodi bukuyomitalaisi mi kabitam.
8 Mitaga ka, Yaubada Topeuligaga la baloma isikaili tomota
e isisaiki matausina si kabitam.
9 Gala paila bitatomoya wala e bivigaki bitakabitam
kaina bipilasaida paila bitanikoli avaka kamokwita.
10 Mapaila baisa tuta magigu bukunakaigalaigusi;
ibodi balukwaimi avaka ulo nanamsa.
11 Ka, yeigu gala mogega amanum wala e alilagaimiga kulilivalasi,
anakaigalaimi kukwalubakakavasi ammakawala bukuvitoubwelakaisi mi bigatona.
12 Gala abigatona aninakaigila wala e alagi kumamasi metoya omi bigatona;
yokomi gala wala kukwagagaisi avaka Yobi la bigatona.
13 Ammakawala ibodi bukulivalasi mwada
yokomi bogwa kubanaisi kabitam?
Yaubada ibodi bimapu Yobi la bigatona,
pailaga yokomi bogwa lokumamasi.
14 Tauwau, Yobi eibigitonimi wala e gala yeigu,
mitaga yeigu gala goli bamapu la biga,
makawala yokomi lokumapwaisi. Wo!
15 Mwa Yobi, bogwa wala meitobu si bigatona,
gala wala avai biga gagabila bimapwaisi m biga.
16 Ki, ammakawala - kaina bibodaigu bakapatu e batulotula ke?
Ka, eitomakavasi wala eitotusi gala avai biga tuvaila bilivalaisi.
17 Gala goli. Mwa, ibodi bamapu m biga baisa tuta
e balukwaim avaka ulo nanamsa.
18 Bigatona bogwa eivakasauwaigu, gala ibodi batulotula.
Gala ibodi bakiyumali biga mabigasina.
19 Ka, kidamwa gala sasa paila babigatona,
yeigu gala wala batulotula bakawota wala balivala,
makawala waini kaiuwala bikopusegi e olumoulela ikasuwoki tovala waini.
20 Gala ibodi baminumki; ibodi wala balivala.
21 Olopola bigatona makwaina yeigu gala ibodi bapii availa;
kaina bakamwani availa.
22 Yeigu gala anikoli kamwana,
e kidamwa bavagi makawala Yaubada saina nanakwa bimipukwaigu.