35
1-2 Yobi, baisa gala ibodi bukulivala
mwada yoku gala isim pikolela wowom omatala Yaubada,
3 kaina bukukwatupoi Yaubada kawam,
“Ammakawala kam lumkola kulumkoli paila ulo mitugaga?
Avai vavagi babani kidamwa gala bamitugaga?”
4 Ka baisa tuta bamapu mi biga deli lubaimwa.
5 Ka, kukowanasi wa labuma!
E kugisaisi lowalowa saina walakaiwa!
6 Kidamwa bukumitugaga, e m mitugaga gala wala biyomwau Yaubada.
E kidamwa bukusula yam kwaitala kwaitala,
ki kudoki matauna bilumkoli mokaila m sula? 35.6-8 Yob 22.2-3
7 Ki kudoki m mitukwaibwaila bipilasi Yaubada?
Mwa, gala avai vavagi Yaubada binigadi metoya baisa yoku.
8 Ka, som wala titoulem bilumkoli mmayuyula m mitugaga;
e avai vavagi bwaina kuuvagi bipilasi matauna.
9 Tomota ikayagigilasi avai tuta bibodasi kasi lamadada,
matausina idousi paila availa bikoli matausina.
10 Mitaga gala wala itovilakaisi Yaubada kasi tobubuli;
matauna goli si kabopikwaku
avai tuta bibodasi kasi mwau saina mwaugaga.
11 Matausina gala wala itovilakaisi Yaubada matauna iuvigakaidasi takabitamsi,
da kabitamsi saina vakaigaga
gala makawala avai mauna la kabitam.
12 Matausina idousi paila pilasi,
mitaga Yaubada gala wala ivitakauloki,
paila matausina tokamnomwana deli tomitugaga.
13 Gala wala dimlela bidoumakavasi.
Yaubada Topeuligaga gala igigisi kaina ininakaigali matausina.
14 Mwa, Yobi, yoku lokulivala gala gagabila bukugisi Yaubada;
mitaga ka, kulamam wala kutulotula -
paila avaka kam pakula isisu omatala matauna.
15 M nanamsa mwada Yaubada gala immipuki tomota;
kaina pikekita wala bininamsi paila mitugaga.
16 Mwa, gala wala dimlela bukuyobidubadu bigatona;
ka, ulo ligalega saina mimilakalita
gala wala kunikoli avaka kulilivali.