37
Utuyagila ivigaki ibulukukolaigu
e kukugu gala wala ibodi bitobu.
Komwaidomi - ka, kunakaigalaisi Yaubada kaigala,
matauna kaigala pilapala butula.
Matauna ivigaki kavikavila ivisigili labuma,
metoya kabulotala valu watanawa ila kabuloyuwela.
Oluvi kaigala butula iyoulapula makaigana
kaigibumaboma metoya pilapala obutula.
E komwaidonaga tuta kavikavila ikavila.
Metoya Yaubada ola karaiwaga vavagi kabokatubau iyoumatilasi,
e makwaisina saina kabokatubau gala ibodi bitakatetasi.
Metoya walakaiwa matauna ikaraiwogi sinou bikapusisi ovalu watanawa,
deli iwitali kuna saina kunoveka ivigaki valu idadoya.
Tomota si paisewa matauna ivigaki bisaimwaisi;
matauna iyomitali titoulela metoya ola paisewa.
Mauna nabubolodila isuvisi okasi lagi.
Utuyagila iuu metoya opilibolimila
e numla saina tula ima metoya opiliyavata.
10 Metoya Yaubada ola yagisa ivigaki bolita itula,
e ikivili ivigaki sopi kwekulokula.
11-12 Makawala Yaubada nanola, kavikavila ikavilasi metoya olowalowa,
e makawala Yaubada la karaiwaga ibubeusi,
ambaisa ambaisa ovalu watanawa komwaidona.
13 Yaubada iwitali kuna paila bivinumli pwaipwaia.
Mimilisi tuta bivigaki kasi mipuki tomota,
e mimilisiga tuta biyomitali la mitakwai baisa matausina.
14 Mwa Yobi, kwapiekwati, e kunakaigalaigu
ibodi bukuninamsi vavagi saina kabokatubau
avaka avaka Yaubada bogwa leivagi.
15 Ki bogwa kunikoli ammakawala Yaubada
eikaraiwogi kavikavila ikavila, metoya olowalowa?
16 Ki bogwa kunikoli ammakawala lowalowa ibubeu wa labuma,
baisa goli Yaubada la kimidagi saina kabokatubau?
17 Adoki gala wala kadai!
Mesinaku wala yoku bukulumkoli kam mmayuyu
metoya yuviyavila bolimila bipeididi e biyogagi valu.
18 Ki ibodi bukupilasi Yaubada bukukwatuvakai labuma
e bukuvigaki bipeula makawala tanumnumta kwevivivila kala peula?
19 Mwa kulakasi ma bigatonasi ammakawala bakalivalasi baisa Yaubada;
paila yakamaisi ninamaisi bogwa eitaboda
e gala wala kayosisi avaka bakalivalaisi.
20 Gala paila bakatuwasa mwada kamataiyu Yaubada bakabigatona.
Avaka uula bayomituli agu pakula e bikatumataigu?
 
21 Ka, tuta baisa lumalama wa labuma saina guyugwayu,
saina visigala ikalipoki matila gala ibodi bitagisi,
e labuma yagila eikatumigileu.
22 E metoya opiliyavata lumalama visigala saina guyugwayu
iuvisigili kala vau digadegila,
e baisa Yaubada la guyugwayu ivigaki da katubausi goli.
23 Yaubada la peula saina vakaigaga
gala ibodi bitalokaiasi katitaikinela matauna.
Matauna tomitakwai deli la karaiwaga duwosisia
avaka avaka bivigaki mina watanawa.
24 E ka, baisa goli uulela komwaidodasi
isim da katubausi paila matauna,
e baisa uula matauna bitakainau availa availa matausina
ikamitulaisi titoulesi mwada tokabitam.