Buki Pilabumaboma Kabutubogwa Deli Kabutuvau MADIU 3

Yoni Tobapitaisi la kamituli

(Mk 1.1-8; Lk 3.1-9,15-17; Yn 1.19-28)

1 Tuta baisau Yoni Tobapitaisi ima Yudia oviloupakala,v ikikamituli, 2 kawala, “Kuninavilasi, paila Labuma Karaiwogalaw bogwa ivakatitaikina.” 3 Aisea tovitoubobuta eilivala paila matauna Yoni, kawala,

“Taitala idoudou oviloupakala,

‘Kukwatubiasaisi la keda Guyau,

kukiduwosisiaisi la keda.’ ”

4 Yoni isikam kala kakapula iwoliki unuunula kameli, palitulax yatala kanuvinela bulumakau; e kʹala, kilili toyo kitorina. 5 Mina Yerusalem toyo mapilana Yudia komwaidona, toyo viluwela Yoridani komwaidona ilokaiasi matauna; 6 ikamitulaisi si mitugaga, e Yoni ibapitaisi matausina wa Waya Yoridani.

7 Tutala igisi bidubadu Parisi toyo Sadusiy imaisi paila bapitaiso, iluki matausina, kawala, “Tubula mitugaga yokomi, availa ilukwaimi bukusakaulasi metoya omi sula mapula igau Yaubada biwitali? 8 Kuvagaisi avaka bivituloki mi ninavila. 9 Taga kuvitokaimi oninami, ‘Matauna Eberaam tabudasi.’ Paila alukwaimi, gagabila Yaubada bikau dakuna makwaisina bivigaki tubula Eberaam. 10 Baisa tuta kema eikatubiasaisi mwada biteyasi kai ouula. Mapaila avai kai gala biuwa kaiuwala bwaina biteyasi bilavaisi bila wa kova.

11 “Yeigu abapitaisaimi metoya wa sopi bivituloki mi ninavila, mitaga matauna iyeikulaigu imaima, matauna bibapitaisaimi metoya baisa Baloma Tobumaboma deli kova. Matauwena ikalisauwaigu, katubukolela kaikela gala ikwanaigu bakeula.z 12 Iyosi la kabokila oyamala bikatukili witia kalagila deli kanuvinela. La witi bikedidagi ola bwaima, mitaga kanuvinela bigabu wa kova gala bimata.”

Yesu ibapitaiso

(Mk 1.9-11; Lk 3.21-22)

13 Wa tuta matutona Yesu isilavi Galili imakaia Waya Yoridani mwada Yoni bibapitaisi matauna. 14 Mitaga Yoni mwada bisilibodi matauna, kawala, “Ibodaigu bukubapitaisaigu, taga yoku kumakaiagu ke?”

15 Yesu ivitakauloki matauna, kawala, “Kutagwala tuta baisa, ibodaida bitavagi komwaidona avaka Yaubada magila.” E Yoni itagwala.

16 Yesu bogwa ibapitaiso, e nanakwa ivalaguva metoya wa sopi, e ka, labuma ikivi, igisi Bilomala Yaubada italakapusi makawala bubuna itoula baisa matauna. 17 E, kaigila metoya wa labuma, kawala, “Matauna Latugu Tombwailigu, saina iyomwasalaigu.”

MADIU
<
3
>

u3:1 Matauna Yoni Tobapitaisi ivitouula kakamatula wa taitu makwaina 27 AD; kugisi Lk 3.1-3.

v3:1 Mapilana isisu wa Waya Yoridani mapilana opilikwaibwaga katitaikina Milaveta Pilamata.

w3:2 Kugisi makasana Biga Kala Katumiki.

3:2 3.2 Md 4.17; Mk 1.15

3:3 3.3 Ais 40.3

x3:4 Miyana yabeiyaya bisipu okuvalila mwada bisipukikita kala karekwa, e tuvaila ivigaki kauyala la mani deli avai guguwa. Omitibogwa matauna tovitoubobuta Ilaitia bisikam kala karekwa deli palitula makawala.

3:4 3.4 2 Gwe 1.8

y3:7 Kugisi makasana Biga Kala Katumiki.

3:7 3.7 Md 12.34; 23.33

3:9 3.9 Yn 8.33

3:10 3.10 Md 7.19

z3:11 Wotetila makwaina bibodi taitala la ula saina towatanawa bivagi; baisa makawala Yoni eilivala mwada wotetila makwaina saina watanawa, mitaga avai tau bivagi baisa matauna saina ikalisau Yoni.

a3:12 Tobigubagula mina Yudia otutala tayoyuwa biyavi witi opwaipwaia bivapupoi, e oluvi metoya okabokila bilavi walakaiwa e yagila biyuvisau wawa mitaga wititoula kwemomwau bikapusivau bim opwaipwaia. Oluvi bikaidodigasi wala.

3:17 3.17 Vit 22.2; Sam 2.7; Ais 42.1; Md 12.18; 17.5; Mk 1.11; Lk 9.35