1 Baisa makawala Eroni sola Mosese veyala, tuta matutona Guyau eibigitoni Mosese wa Koya Sinai. 2 Eroni litula kasitaivasi, kuluta Nadaba, eisakaili Abiu, Eleasa, e kasusu Itama. 3.2 Baw 26.60 3 Matausina bogwa eikiwotaisi deli eikabomaisi bivagisi tolula, 3.3-4 Tol 10.1-2; Baw 26.61 4 mitaga Nadaba sola Abiu ikaligasi paila uula Guyau kala lula leigabwaisi metoya kovamakava wala mapilana Sinai Viloupakala. Matausina gala pesisi, mapaila igau wala Eroni tomomova Eleasa sola Itama eiwotetilasi tolula wotitalela.

5 E Guyau iluki Mosese kawala, 6 “Ka kuluki Libai dalela bimaisi e kusaiki kasi karaiwaga biwotetilasi deli Eroni tolula. 7 E avai wotetila isisu paila ulo Buliyoyova wotitalela matausina bivagaisi, deli biwotitalaisi tolula deli goli tomota komwaidona. 8 Tuvaila matausina biyamataisi komwaidona guguwala ulo Buliyoyova, deli biwotetilasi paila komwaidona mina Isireli. 9 E si wotetilaga mokwita biwotitalaisi Eroni deli litula. 10 Ka, yoku ibodi bukunagi Eroni deli litula biwotitalaisi tolula wotitalela, e kidamwa availa bivigikoni mwada bivagi wotetila makwaina bukukwatumataisi wala.”

11 E Guyau iluki Mosese kawala, 12-13 “Ka, tuta baisa mina Libai ulo vavagi tatougu. Avai tuta lakatumati mina Itipita si kuluta tauwau komwaidona, e wa tuta matutona yeigu akatupali mina Isireli si kuluta tauwau komwaidona deli goli si mauna kuluta, komwaidona wala ulo vavagi. Mitaga ka, mwada mina Isireli si kuluta tauwau lakatupali paila yeigu, taga kaimapula mina Libai bogwa lavigaki ulo vavagi tatougu. Yeigu goli Guyau. 3.12-13 Sun 13.2

14 E mapilana Sinai Viloupakala Guyau ikaraiwogi Mosese bisonukuli mina Libai avaka kasi bawa metoya odalesi deli veisia titoulesi, 15 bikalau komwaidona tauwau kasi tubukona natana kaina ikalisau, 16 e Mosese ivagi makawala. 17-20 Libai litula taitolu. Gerisoni, Kowati, Merari, matausina tubusia paila dala madalasina isim yagasi makawala baisa. Gerisoni litula taiyu, Libini sola Simei; Kowati litula taivasi. Amram, Isa, Ebironi, Usieli; Merari litula taiyu. Mali sola Msi. Matausina tubusia paila dala madalasina yagasi makawala baisa.

21 Dala Gerisoni budoyu goli, Libini veyala, Simei veyala. 22 E komwaidona tauwau kasi tubukona natana kaina ikalisau eisonukulaisi kasi bawa iboda 7,500. 23 Madalana ibudaisi si kabosikaiwa opilikwaibwaga osisunela Guyau la Buliyoyova, 24 dala madilana tomoyela Eliasapi matauna Laeli latula. 25 Dala madalana si koni Buliyoyova kwemwaidona biyamataisi, katuvala miyasina yayu olumoulela deli okoukweda, e miyana tabodala paila kabosusuvi. 26 E miyasina tabodala leitapapaisi Buliyoyova kwemwaidona deli kabogwabu lula, e deli miyana paila tabodala kabosusuvi matabudona olumoulela. E komwaidona taboda miyasina matausina si koni paila biyamataisi.

27 Dala Kowati isisu, Amram veyala, Isa veyala, Ebironi veyala deli Usieli veyala. 28 E komwaidona tauwau kasi tubukona natana kaina ikalisau eisonukulaisi kasi bawa iboda 8,600. 29 Dala madalana ibudaisi si kabosikaiwa opilibolimila opapala Guyau la Buliyoyova, 30 e dala madalana tomoyela Elisapani matauna Usieli latula. 31 Matausina si koni biyamataisi Kabutu Didawogala, tebeli, kaitapa la kabototu, makwaisina kabogwabu lula, deli guguwala komwaidona tolula leivigakaisi paila si wotetila olumoulela matabudona Bomikikila, deli miyana tabodala kabosusuvi matabudona Bomikikila Sainela. Komwaidona guguwa makwaisina matausina si koni paila biyamataisi.

32 Dala Libai tomoyela Eleasa matauna Eroni tolula latula. Matauna ikaraiwogi availa availa matausina iwotetilasi olumoulela Guyau la Buliyoyova matabudona Bomikikila.

33 Dala Merari budoyu, Mali sola Msi veisia, 34 e komwaidona tauwau kasi tubukona natana kaina ikalisau eisonukulaisi kasi bawa iboda 6,200. 35 Dala madalana ibudaisi si kabosikaiwa opiliyavata opapala Guyau la Buliyoyova. Dala madalana tomoyela Surieli matauna Abiaili latula. 36 Matausina einagaisi biyamataisi komwaidona youdulela Guyau la Buliyoyova, ketuwolela kokolela, ulilaguvala, deli goli youdulela komwaidona. Matausina si koni biyamataisi komwaidona guguwa makwaisina. 37 Tuvaila biyamataisi kokolela, ulilaguvala, kenubilumala, deli yuwoyoulela taboda miyana eitavinaisi eitapataisi Buliyoyova.

38 E Mosese, Eroni deli litula komwaidosi wala ibudaisi si kabosikaiwa opilibomatu omatala Guyau la Buliyoyova. E komwaidona matausina si koni paila biwotetilasi olumoulela matabudona Bomikikila paila mina Isireli. E kidamwaga availa mwada bivigikoni wotetila makwaina, matauwena bikatumataisi. 39 Baisa Guyau la karaiwaga makawala, Mosese isonukuli komwaidona mina Libai tauwau kasi tubukona natana kaina ikalisau, kasi bawa dala madalana iboda 22,000.

40-41 Guyau iluki Mosese kawala, “Komwaidona mina Isireli si kuluta tauwau matausina ulo vavagi. Mapaila kugini komwaidona yagasi mina Isireli kuluta tauwau, kasi tubukona natana kaina ikalisau. Mitaga kaimapusi mina Isireli si kuluta tauwau deli si mauna kuluta, mina Libai deli goli si mauna kuluta baisa bogwa ladoki ulo vavagi! Yeigu goli Guyau!” 42 Mapaila Mosese ikabikaula igini komwaidona yagasi mina Isireli si kuluta tauwau 43 natana kasi tubukona kaina ikalisau, e kasi bawa iboda 22,273.

44 Tuvaila Guyau iluki Mosese kawala, 45 “Tuta baisa kukwabomi mina Libai matausina ulo vavagi goli kaimapula mina Isireli si kuluta tauwau, deli kukwabomi mina Libai si mauna kuluta kaimapula mina Isireli si mauna kuluta. 46 Omitibogwa mina Isireli si kuluta tauwau kasi bawa ikalisau mina Libai kasi bawa, kasi kakalawa matausina kesa iboda 273.fKugisi mailela 39. Mauula ibodi yoku bukugimolivau matausina kesa. 47 E taitala taitala matausina bimapu paila titoulela kwailima siliba, makawala avaka kasi karaiwaga bimapusi, 48 e mani magulona kusaiki Eroni deli litula.” 49 E Mosese ivagi makawala, ikau 50 magulona 1,365 siliba 51 isaiki Eroni deli litula.