5
Nigada paila kabokwala
1 Mwa Guyau! Kunakaigali ulo bigatona,
e kulagi ulo tiliawai.
2 Mwa! Guyau ulo Yaubada,
kunakaigali ulo dou paila pilasi.
Mwa Guyau! Anigadaim,
3 kaukwau makwaina kulagi kaigagu.
Tutala kalasia iyuwoula anigada baisa yoku,
e atulotula wala paila mapula.
4 Yoku Yaubada gala wala kuyebwaili sula,
e gala kutagwala mitugaga bisisu omatam.
5 Yoku gala magim bukugisi matausina ninasi walakaiwa,
e gala magim matausina tomitugaga.
6 Yoku kukwatumtuwoli komwaidosi toubuwabu
e kukwaluwou matausina togigasisi deli tokatuduvidavi.
7 Yeigu gagabila wala basuvi om bwala
e batapwaroru om Bwala Kwebumaboma,
e bakavagina baisa yoku deli ulo taimamila,
paila wala m yebwaili saina vakaigaga.
8 Mwa Guyau! Saina bidugaga agu tilaula!
Kuvakadaigu avaka nanom bavagi.
Kuvigaki m keda bimigileu baisa yeigu e igagabila babokuli.
9 Avaka agu tilaula bilivalasi, gala wala avai tuta bitadubumi.
Matausina magisi wala bikodadaimisi.
Si biga komwaidona wala kaitayela nona deli madagi,
mitaga ikasewoki wala kabosilagi. 5.9 Rm 3.13
10 Mwa Yaubada! Kukwamogi deli kumipuki matausina.
Ibodi avaka ikikeiwalaisi bivigaki wala si kabosilagi.
Kubokavili bisunapulasi metoya omatam,
paila uula saina bidubadu si mitugaga
deli si kosomapu baisa yoku.
11 Mitaga availa availa matausina ibanaisi kabokwala baisa yoku bimwasawasi.
Matausina tuta komwaidona ibodi biusiwosisi deli mwasawa.
Bukuyamati matausina availa availa iyebwailimsi.
Matausina ibanaisi mwasawa mokwita paila uula wala yoku.
12 Yoku Guyau kumitukwaii matausina availa availa ikabikuwolaimsi,
e m yebwaili bikoli matausina makawala vayoula.