98
Yaubada biguyoi valu watanawa
Tawosisi wosi pilavau baisa Guyau.
Matauna ivagi vavagi saina kabokatubau!
Metoya ola peuligaga kwebumaboma
matauna bogwa leitomgwaga.
E Guyau ikamituli la tomgwaga,
e iyomitali la katumova kwaipapeula binikolaisi boda ituwoli ituwoli.
Matauna ivagi makawala la biga katotila baisa mina Isireli,
deli la ninatotila e la mitakwai paila matausina.
E komwaidona tomota ambaisa ambaisa bogwa eigisaisi la tomgwaga da Yaubadasi.
 
Komwaidodasi mina watanawa, tawosisi deli yakaula baisa da Guyausi.
Tayakawolaisi matauna metoya wa wosi deli govala mwasawa!
Tawosisi kala yakaula Guyau!
Tawaiyasi butula metoya wa gita!
Tayuvaisi tauya deli taudoudou,
deli tagougovasi deli mwasawa baisa Guyau, da Guyausi goli.
 
Yoku bolita, kukwaipolu deli komwaidona bubuli kwemomova olumoulem.
E yoku valu watanawa, kuwosi deli komwaidona avaka avaka isisuaisi odabam!
Yokomi waya, kukwatupatusi yumami,
e yokomi koya, kuwosisi gulitinidesi deli mi mwasawa omatala Guyau,
paila matauna leima kidamwa biguyoi valu watanawa.
Matauna biguyoi tomota ovalu watanawa
metoya ola karaiwaga duwosisia deli la kibobuta.