130
Nigada paila pilasi
1 Mwa Guyau! Bogwa lakitumou ulo pikwaku komwaidona,
e adoudou baisa yoku.
2 Mwa Guyau! Kulagi ulo dou.
Bukunakaigali ulo dou paila pilasi.
3 Kidamwa yoku bukululuwai ma mitugagasi,
e availaga gagabila bipeula otutala yakala?
4 Mitaga yoku kuligaiwa ma mitugagasi,
e mapaila ibodi goli bakatemmalaimsi sainela.
5 Atutuli Guyau, akamamalu deli ulo vinagai mwada bipilasaigu,
e adubumi la biga matauna.
6 Yeigu atutuli Guyau,
e ulo kamamalu ikalisau toyausa si kamamalu tutala itulotulasi mwada nani biyam.
Ka, ulo vinagai ikalisau toyausa si vinagai tutala itulotulasi magisi nani biyam.
7 Mina Isireli, bukudubumaisi Guyau,
paila la yebwaili ikanuvagasi goli,
e tuta komwaidona itagwala paila bikatumova.
8 Bogwa bikatumovi la tomota mina Isireli
metoya osi mitugaga komwaidona. 130.8 Md 1.21; Tt 2.14