143
Nigada paila pilasi
1 Mwa Guyau! Kulagi ulo nigada!
Om mitukwaibwaila kunakaigali ulo kayubabai,
e kumapu ulo dou metoya om kimadagi.
2 Gala bukuyakalaigu, yeigu m touwata!
Paila gala taitala isisu tobwaila omatam. 143.2 Rm 3.20; Gl 2.16
3 Agu tilaula bogwa leiwaigu lakapusi,
deli bogwa wala eikalisauwaigu.
Bogwa isailigu okatupipi odudubila,
e yeigu makawala matausina bogwa eikaligabogwasi tuta omitibogwa.
4 Mapaila yeigu magigu bapaiki wala,
e ulo pikwaku bogwa leiwokuva.
5 Yeigu bogwa aluluwai yam makwaisina bogwa leiwokuva,
e aninamsi komwaidona avaka avaka bogwa lokuvagi,
e iiluyelu nanogu komwaidona m youdila.
6 Akoulaila yamagu baisa yoku otutala aninigada,
e ulo baloma ikadaka paila wala yoku, makawala lubulabu pwaipwaia.
7 Mwa Guyau! Kumapu ulo nigada tuta baisa wala!
Bogwa lakitumou ulo pikwaku komwaidona.
Gala wala bukukwatupwanaim metoya baisa yeigu.
Kidamwa bukuvagi makawala,
yeigu bogwa basisu deli matausina availa availa bogwa eilosi mapilana Tuma.
8 Kuyoluluwaiyaigu kaukwau kwaitala kwaitala paila m mitakwai,
paila yeigu adubumaim goli.
Ulo nigada imweimwena baisa yoku,
e bukuvitulokaigu avai keda bibodaigu.
9 Mwa Guyau! Bawokaiam paila mwada bukukolaigu,
e kukolaigu metoya baisa agu tilaula.
10 Yoku ulo Yaubada.
Kuvitulokaigu nanom kidamwa bavagi.
Kumitukwaibwailigu,
deli kuvakadaigu keda makadana ambaisa gala basilagi.
11 Mwa Guyau! Kukolaigu makawala m biga katotila.
Om bobwailila kukolaigu metoya komwaidona kagu mwau.
12 Paila uula m yebwaili baisa yeigu,
kukwatumati agu tilaula e deli kukwatumtuwoli agu tolamadada komwaidosi,
paila yeigu goli m touwata.