5
Tau
1 Ve, lubaigu, yoku kagu vaigwadi
yeigu bogwa lala ogu bagula,
e akouguguli vana deli mro.
E lakamkwam agu kitorina deli kaboiyousala
e lamomom agu waini deli agu nunu.
Vivila komwaidosi
Lubemaiasi kukwamsi deli kumomsi tatoula wala bibwaimi kabotutu som lubaim!
Pilivasila Wosi
Vivila
2 Avai tuta lammasisi, akupakopita wala,
e amimi mwada lubaigu leinopipisi wa lulu.
Tau
Ve lubaigu, yoku nambwailigu deli ulo bubuna kutugwalaigu basuvi.
Paila sikukula bogwa leiyopututu dabagu
e numla bogwa leikatoguna okulugu.
Vivila
3 Mwa, bogwa lakatulovi agu kwarekwa;
avaka dimlela basikamvau miyasina karekwa?
Bogwa lawini kaikegu;
avaka dimlela bayopigigatu tuvaila?
4 Mapaila lubaigu ilitaki yoyu,
e iyowa lopogu adoki lubaigu bogwa leivakatitaikina.
5 E asimalaula adoki baulaim yoyu paila matauna bisuvi.
E matutona lalitaki woyai paila baulaim yoyu,
yamagu bogwa wala lakeputumi mro,
e misikwaikwegu ivakasau bulamila mro.
6 E aulaim yoyu paila lubaigu bisuvi,
mitaga lamokaia bogwa leila.
Saina magigu balagi sitana kaigala!
Mapaila anevi matauna, mitaga gala gagabila babani.
Adoukoli matauna, mitaga gala wala sitana anakaigali mapula.
7 E matausina toyausa eiyuuyausasi valu igisaigusi,
e iwaigusi deli ikatubuyavaigusi.
E matausina eiyuuyausasi okalila valu,
ikisaisi miyana kagu seikeula.
8 Veve, yokomi vilemi Yerusalem,
kukwatotilasi baisa yeigu,
kidamwa bukugisaisi lubaigu,
bukulukwaisi matauna kawami,
“Lubaim namwaidona wala nakaliga baisa yoku.”
Vivila komwaidosi
9 Ve, yoku saina wala kutubosaki,
vivila komwaidosi kasi kaimatala wala yoku.
Ki, avaka kala tuwoli metoya baisa lubaim deli tauwau komwaidosi ke?
Ki, kudoki wala itubosaki
e bukulukwaimasiga mwada bakakatotilasi baisa yoku.
Vivila
10 Lubaigu tomatabwaila deli topeula,
Matauna migila ikalisuwoli lakatuluwovila tauwau migisi.
11 Migila kwedudubuna deli subusobu,
kulula yasisiai deli yabubwabwau
makawala digulesi bulibuli bwabwaula.
12 E matala kwegigigia makawala bubuna mitasi minasina eitotusi opapala waya,
kala migileu tadoki wala tavakakai wa nunu,
deli itotusi opapala waya.
13 Matauna kimwala kala bwaina makawala kwaitala bagula,
ivakasau lokwai deli vana ituwoli ituwoli.
Bilubalola makawala bwaimwara,
giula makawala mro bulamila.
14 Yamala saina kweyamanabwaita
e kala kakalougwa lesisikoma isim katububulela,
wowola kala dudubuna makawala doga dudubunela,
makaina ikatububulaisi deli dakuna yagala sapaya.
15 Kwaipiapala kala gigisa makawala kokola leiyoudulaisi metoya dakuna alabasita,
makaisina si kabototu goula wala.
Matauna itubosaki, makawala Koyala Lebanoni
kaila makaisina kweisila itubosakisi.
16 Bitavayaula owodola saina sumokainia,
e kala kaibisibasi komwaidona ikikau wala nanogu.
Ka, yokomi vilemi Yerusalem,
baisa makawala lubaigu kala gigisa.