10
1 Esiga tei telaga odoo emegei, ayo mo sooloo ma kuloduga Isalael odoo halo Godee mapoo takolone badeliso, dia gie badeli pidilame. 2 A gooleedooso, Isalael odoo diba Godeeye goomoga goo ee dadalame diya goomegeliso. Esino Godeeye goomoga goo ee, diba medee kibiya gooleedele. 3 Osoloso Godeeye o howo woola odoo tekepo dolone egee do goo onosee, diba gooleedele. Esino dieso nediliyo kitulugu maga Godeeyo howo woola odoo tekepo dalame, dibada tei magoo ee dodolone egee do oso diba koo pidili. Goo egeesi maga diayo Godeeyo goo maga o howo woola tekepo dabalai goo ee talai, diba gowooso. 4 Esino Kelisoye goo moodoo maga, edebeeyo Godeeyo howo woola tekepo doloso badalame, tei magoo Godeeye Moses mapoo tenee diayo ee dadalai ee bei mauwe. Bei, edebeeyo Keliso mapoo tei toga, nei Godeeye o howo woola yo odoo tekepo dalaiso.
To tekepo oso gie badeli pidili
goo ee tosimiso
goo ee tosimiso
5 Lev 18:5Tei magoo ee deedee maga edebeeyo Godeeyo howo woola tekepo badeli goo maga Moseseeye egeesee hoguguso, “Edebeeyo gie badeli talai goomogoga, yo tei magoo susuga ee dodolone ka badebee,” diso. 6 Deut 30:12-14Esino tei too goo maga Godeeyo howo woola tekepo badeli odoo oso egeesee takalaime, “Odoo agayo Keliso ido meilame Kei mi mapoo ka palaisomo?” diso. 7 Osoloso odoo ogoso see egeesee takalaime, “Odoo agayo Keliso ta maga hogadilame, odoo wediayo dioso debeli mi mapoo ka meileisomo?” dee takalaime.*To hageeyo bei ee egeesi moloso. Godeeyo howo woola tekepo badeli odoo oso egeesee takalaime. Bei, diayo tei too goo maga, Keliso yo dibolo hodobo olo badoga. Osoloso Keliso yo ta maga hogadi goo ee, diayo tei too goo maga diba gooleedooso. 8 Esino hedebe Keliso mapoo tei teli goo oso gie badeli pidili goo ee ka tosibili. Bei, Keliso mapoo tei telaga odoo oso Moseseeye taka egeesee takalai teiba,
“Godee o to ee nama koolapoo moloso.
Osoloso to egee nee maga mapoo, osoloso nee sooloo ma kulodu moloso.”
To hagoso Keliso mapoo tei toloso badeli goo ee eligiliso. Egeesi ma kulodu to hebebe hagonosee iyo odoo abo mapoo ka takomo silesiboso.
9 Esiga nayo takolone, Yesu yo Wiligi Odoo doloso yiligebuguloso, see yo Godeeye ta maga hogadi goo mapoo nee sooloo ma kulodu tei toga, nee gie badeli pidileiso. 10 Bei, nee sooloo ma kuloduga tei too goo maga, Godeeye o howo woola no odoo tekepo dolone ka badoso. Osoloso nee magaso takolone Yesu yo Wiligi Odoo doloso yilige bugu goo maga nee gie badeli pidileiso. 11 Isa 28:16Bei, Godeeyo to booka mapoo hogugu oso egeesee takooso,
“Edebeeyo Keliso mapoo tei toga, goo omaga goohele sabolo badalaime. Bei, goo hagoso goo mauwe malaime,” deeso.
12 Diye 15:9Goo egeesi ma kulodu iyo ogoso, Yu odoo sabolo osoloso Yu odoonee sabolo hedebe. Bei, Lodee hedebe yo odoo susuga dia wiligi odoo. Goo egeesi maga odoo susuga oso diba pidilame yimapoo woosolone egee do mapoo, yayo goo tekepo susuga ka tenemoloso. 13 Joel 2:32Bei, Godeeyo to booka mapoo hogugu oso egeesee takooso,
“Edebeeyo yo Lodeeye pidilame yimapoo takooga,
o gie badeli pidileiso.”
14 Esiga edebeeyo Lodee mapoo tei telega doga, diba pidilame yimapoo kasee woosalaisomo? Osoloso o goo ee dulega doga, diayo yimapoo kasee tei talaisomo? Osoloso odoo heeso to tekepo dimapoo takelega poogooga, diba kasee duleisomo? 15 Isa 52:7Osoloso to tekepo hagee takalame diye dilega poogooga, diba to hagee kasee takalaisomo? Godeeyo to booka mapoo hogugu oso egeesee takooso,
“To tekepo takomo silesibili odoo oso to tosiboga ogoloso odoo susuga diya goomegeliso.”
16 Isa 53:1Esino ee ma kulodu haga odoo susuga oso tei tele. To hamaga Aisayaye Godeeyo to booka mapoo egeesee hoguguso,
“Lodee, ibada to mapoo odoo agayo ka tei toowo?”
17 Esiga edebeeyo Kelisowo goo ee takomo silesibi goo maga, odoo aboso o goo duliso. Osoloso diayo o goo du maga, yimapoo tei teliso. 18 Psa 19:4Egeesi ma kulodu ayo Isalael odoo dia goo maga ka woosowa. Diba to tekepo olo dusomo? O. Diba olo dulugaso. Bei, Godeeyo to booka mapoo hogugu oso egeesee takooso,
“Dia to*Dia to ee odoo agamo towo? Osoko, giwo, osoloso a oso Godeeye kitulugu ee woola yilige bigiliso. Esiga dia to masi oso mi susuga mapoo dudobuguso. mi susuga mapoo dudobuguso.
Esiga odoo susuga oso to hagee duso.”
19 Deut 32:21Esino Isalael odoo oso to tekepo hagee duloso gooleedoosomo? O. Diba gooleedooso, esino medee kibiya tei tele. Osoloso Moseseeye egeesee hoguguso,
“Godeeye egeesee takaso,
‘Ayo mo tei magoo gooleedele poogoo Yu odoonee ee pidiga,
nei Isalael odoo niyo dimapoo koolone kamana sabolo dabalaiso.’ ”
20 Isa 65:1Osoloso Aisayaye Godeeye taka to hagee ebilega egeesee takaso,
“Odoo a esilega poogoo oso a egeiso.
Osoloso odoo amaga woosele poogoo mapoo ayo mo goo ee dimapoo yilige buguso.”
21 Isa 65:2Esino Godeeye Isalael odoo dia goo maga egeesee takaso,
“Ayo biame susuga diba gilimalame mopoodoo doloso badebeiso.
Esino diba gowoolone mo to duloso mesile poogooso.”
10:5: Lev 18:5
10:6: Deut 30:12-14
*10:7: To hageeyo bei ee egeesi moloso. Godeeyo howo woola tekepo badeli odoo oso egeesee takalaime. Bei, diayo tei too goo maga, Keliso yo dibolo hodobo olo badoga. Osoloso Keliso yo ta maga hogadi goo ee, diayo tei too goo maga diba gooleedooso.
10:11: Isa 28:16
10:13: Joel 2:32
10:15: Isa 52:7
10:16: Isa 53:1
10:18: Psa 19:4
*10:18: Dia to ee odoo agamo towo? Osoko, giwo, osoloso a oso Godeeye kitulugu ee woola yilige bigiliso. Esiga dia to masi oso mi susuga mapoo dudobuguso.
10:19: Deut 32:21
10:20: Isa 65:1
10:21: Isa 65:2