1 Âgofâc-nane, no ŋoŋerao fisirâ ŋic Mârohec dâŋ jajazane i wemocko ŋazazapo? Aricne, ŋic Mâro tâmiric jajazane i Kristore ɋiefâc ŋoŋe ŋazapo. 2 No nânâ sanaŋne mi ŋarehuc susu sawa gumec-ŋopapo, nânâ sanaŋne wemocko nanšapiŋ. Erâ šiŋuczia nânâ sanaŋne nâniŋte sâc wâc mi eŋgopieŋ. 3 Ŋoŋe Mârohec sâcne mi embiŋ. E tâmiric juhuc hâcne iiriac â kikisâ bâfuahuc ŋic omane jaŋe iŋucne jueŋgopieŋ. 4 Ŋoŋe “no Paulore ŋic”, “no Apolore ŋic” mueŋgopieŋte ŋic iŋucne ŋoŋe ŋic omane hâcne muŋarezo.

5 Apolo e mo? Á Paulo no mo? Nâhe kiŋaŋ qaqa sawazi miti ŋazapere manambiŋ. Erâ Wofuŋzi gie munâctewec sâc bapec. 6 No he sarac epo, Apolo e hofâ gie bawec, â Wofuŋzi ine jambuŋkeme fârine fuawec. 7 Irec he sarac eekac ere mi muzo, â hofâ gie baekac ere mi muzo, jambuŋkeme fârine fuaekac, Anutu hâcne ere mocjaha muzo. 8 He sarac eekac â hofâ gie baekac jahe sâcjekic mocjaha, furine ine gie-jekicte sâc bârâwiŋ ronicmu. 9 Nâŋe Anuture babafic, ŋoŋe ine Anuture gie â Anuture fic.

10 Anutuzi gie tahacnuwec sâc no ficbapa fârinezi simeŋ wâtuŋ râepe huwec. Eme irec fainao ŋic moczi fic šuhuckerâ baekac. Iŋucnezi mana manahuc bazejec. 11 Wâtuŋ huwec domakac, Jesu Kristo hâcne, e unucke behec erâ moc râepene huhune mi fokac. 12 Eme wâtuŋ irec fainao moczi goì siliwa me qânâ sanaŋzi, me pipisac sopâc bacrehaczi šuhuckerâ baocmu, ine juku fic bapa-ticnere fuŋne taniŋkeocmu. 13 Juku dameŋ sâkoo hâcne fuŋne taniŋkeocmu. Ira šocsâko bâruŋkeocmu, eme šoc izi hâcne ficgiere fuŋne bataniŋkeocmu. 14 Ŋic moczi wâtuŋ faio fic baocmu, i šoczi šâipieme furine roocmu. 15 Á ŋic mocte fic šoczi šafâreme furine tâmiric juocmu, e jahacne ine akickezo, akickehuc šockonec batarazo.

16 Ŋoŋe Anuture miti ufuŋ, â Anuture Mârozi maŋŋeŋicko ŋeŋe juju eekac, i mi manaŋgopieŋ me? 17 Ŋic moc e Anuture ufuŋ ima baocmu e Anutuzi wâc ima baocmu. Anuture miti ufuŋ i furu mukicne, eme ufuŋ-ticne i ŋoŋe hâcne. 18 Ŋoŋe maŋŋeŋic mi eatuckenšepieŋ. ŋoŋeraonec moc e ŋicdâŋ mana maŋ ehuc mamana-ticnere maname fefene eocmu, iŋucnezi mamana i qikiŋnehuc mutucne erâ mamana fârine bâfuazejec. 19 Mâreŋte maŋɋârâŋ dâŋ i Anutuzi maname fârimâc eekac. Dâŋqâreŋ šiŋuc hâcne fokac: “E ŋic maŋɋârâŋhec jaŋe maŋsioc gie bahapie somâc-jopame somâmaŋ-ticnao hueŋgopieŋ.” 20 Erâ moc šiŋuc: “Wofuŋ e ŋic maŋɋârâŋhec jaŋere dâŋ maname racne eekac.” 21 Irec ŋoŋe mâreŋŋic nâŋere muhuc maŋfefe mi enšepieŋ. Wiac sasawa i ŋoŋere biŋe. 22 Paulo â Apolo â Kefa nâŋe ŋoŋere biŋe. Erâ mâreŋko wiac sasawa, juju me hâhâmo, šiŋuczia fofone â juku fufuane, i ŋoŋere biŋe sasawa. 23 Ŋoŋe ine Kristore biŋe â Kristo eki ine Anuture biŋe.