SAMUE I
SAMUE I â II
Israe ŋic jaŋerao sahackopec â mitiopec wiac irec hata sifuckerâ foha Samue fuawec. Eme Samue e hata i â i mâmâc bâtiŋ‐jofawec. Samue juhame Mumutara Ŋic jaŋere dameŋ tarawec, erâ ŋicwofuŋ juju â guriŋ bapa gie irec dameŋ maickewec. Israe ŋic gurune gurune jaŋe dameŋ ira hâcne ââgo â maŋ mocjaha erâ juju i mocwâc mi juhuc fâuckembiŋ. Erâ micne tâmiric juhuc docke pârâc erâ jumbiŋ. Â taha bapa jaŋe wâc iŋuc jaha gie‐jeŋic biaŋne mocwâc mi bahuc bâsifuckembiŋ. Jaŋerao mâsi iŋuc fuarâ foha Anutuzi Samue rowosâerâ giedâŋ mucneme Wofuŋte kiŋaŋŋic fârine juwec. Ehuc Israe ŋic soŋaŋ‐jopahuc mu bâtiŋ ejareme jaŋe Wofuŋzi hehesic‐jeŋicte behec‐jopawec irec bujeŋic sâqoreme maŋ bâbârisie bâfuahuc qâpuc wiac fuŋne fuŋne bajumbiŋ i behepie Anutuzi mocwâc maic‐jopawec. Erâ juku ʒâhec Israe ŋic jaŋe ŋicwofuŋ‐jeŋic moc fuarâ soŋaŋ‐jopaocte mupie mana‐jareme Samuezi Saulo wokemaŋ ruacnerâ ŋicwofuŋ âkendâŋne‐jarewec. Irec Israe ŋic jaŋerao ŋicwofuŋ juju i Samuezi juha fuawec hâcne. Irec Samuere papia qizec I â II irec maŋnao dâŋ â binaŋ forakac i Samue â Saulo erâ Dawidi jaŋere binaŋ sasawa.
Erâ ʒiŋuc honeŋgopeneŋ wâc: Ŋicwofuŋ juju fuŋkewec dameŋ ira Israe ŋic jaŋerao porofete juju i iŋuc jaha fuŋkerâ fuawec. Samue e mumutara ŋic erâ wâc porofete mâmâc juwec.
SAMUE I
Samue â Saulo jahere binaŋ
Sam I 1—3. Samue ɋie juju‐ticnere binaŋ.
Sam I 4—6. Mumutara ŋic Eli ere binaŋ, â ʒâʒâfic katapare dâŋ.
Sam I 7. Samuezi mumutara ŋic juhuc Israe ŋic micne bajareme Filisa ŋic jopambiŋ.
Sam I 8—15. Samue â Saulo jahere binaŋ.
Sam I 16—31. Samue â Dawidi jahere binaŋ.
Papiare dâŋ neŋgocne sâko i papia gâcnao honeŋgopeneŋ ijaha ʒira fuakac, kecʒiŋuc: Anuturao qohotahuc juju izi wiac biaŋne, â dâŋticne qatararâ juju izi ine sisipiric bâfua‐nâreekac. I Wofuŋ e jahac taha bapa Eli dâŋ ʒiŋuc âzâcneme fua taniŋkekac: “No araŋ banareeŋgopieŋ jaŋere manape fefene eocmu, â araŋ mi banareeŋgopieŋ jaŋere ine manape wawahane eocmu.” (Gaŋ 2:30)
Samue e Anutuzi mocjaha Wofuŋ Sâko‐nâŋec jukac, iŋuc muhuc ŋicwofuŋ jujure mâretec manabâc ewec. (8:6–7) I mâreŋ ŋicwofuŋ araŋ bajarehuc sambâŋ Wofuŋ râpeckeniŋmu muhuc iŋuc ewec. Anutu eki ine sifu ŋic jaŋere dâŋ manaocte Samue âzâcnewec. (8:22) Mâc Anuture manapie feha ŋicwofuŋzi weniŋuc juhuc ŋic soŋaŋ‐jopame biaŋkeocmu irec dâŋ i jaza qâmoc eocte mutâcnecnewec. (2:7–10)
1
Samue fufua‐ticnere binaŋ
Eferaim tiki mâreŋko Ramataim hae ŋewec irecnec ŋic moc juwec ʒâŋene Elikana, e Zufuŋic jaŋere birionec, Jerohamte ŋokâ, â ŋosa‐ticnere ʒâŋe ine Elihu, apa‐ticnere ʒâŋe Tohu â apa ŋiric ŋuruc‐ticne Eferaim ŋic ʒâŋene Zufu hâcne. Ŋic e ŋonâŋ jahec‐ticne jajahec jupic. Ŋonâŋ‐ticne moc ere ʒâŋe Hana â moc ere ʒâŋe ine Penina. Penina e naru motec rocjopawec â Hana e ine arictac.
Ehame ŋic e jara sâc Anutu Tâpiri Ɋuŋɋasaŋ Wofuŋ mai ecnehuc taha bacneocte Silo haeo Elire ŋokâ Hofini â Pinehasi Wofuŋte taha bapa jupic ira fejujec. Elikana e taha bajujec ʒoaŋ ira tahare wiac bâtâc barâ gâcne sâko ŋonâŋ‐ticne Penina â naru motecfâcne jare jujec. E Hanare boc ecnewec, erâ ine Wofuŋzi kogoc fufuare hata hebâzickecnewecte qowi dâkâne mocjaha sawa râcne jujec. Eme mare‐ticnezi maŋbâiŋ ecneme ʒâic boc mana jujec. I Wofuŋzi kogoc fufuare hata hebâzickecnewecte iŋuc hâcne ejujec. Wiac i jara sâc fua jujec. Hana e dameŋ sâc Wofuŋte ufuŋko fejujec i Peninazi aaric bâfuacne jujec. Irec Hana e kiorâ nânâ moc mi nâjujec. Iŋuc eme ŋowe‐ticne Elikanazi âzâcne jujec, “Hana, go wemocte kiokomec? Â wemocte nânâ mi nâkomec? Erâ wemocte buge sâqorekac? No ŋokâ 10 fua‐garenʒapiŋ jaŋere sâc sirickerâ mi jugarekopac me?”
Silo haeo nânâ opâ nâpie tarame Hana e faharerâ Wofuŋte taha ufuŋko fewec. Ehame taha bapa Eli e Wofuŋte taha ufuŋ irec motâc ŋifecnao ŋeŋeo ŋewec. 10 Ehame Hana e ʒâic busâqoc sâko manarâ Wofuŋtao numuhuc kio sâqorewec. 11 Ehuc mumupaŋ moc kecʒiŋuc mupaŋkehuc muwec: “Anutu Tâpiri Ɋuŋɋasaŋ Wofuŋ, go kiŋaŋ naruge nore fific guguriŋ i hone‐jâmbâŋkerâ manasucnuc. Erâ nore mi nikecguha motec moc narecmuo ine bârisie‐garepe juju dameŋ‐ticne foocmu sâc gohec juzejec. Ehame qizec susuc‐ticne moc mi bâtâcnenʒepieŋ.”
12 Ŋokac e Wofuŋte maio ʒuhuckerâ iŋuc numume Elizi bipic‐ticne qiriŋ qawec i sawa honewec. 13 Hanazi saŋucko numuwecte dâŋticne moc mi manahuc mâc micbipic‐ticnezi sawa qiriŋ qame Elizi ʒiŋuc manasuwec: E opâ sanaŋ âmbâŋ nânâ ŋokac moc. 14 Iŋuc manasurâ ŋokac ʒiŋuc âzâcnewec: “Maŋsifuc gie ʒi mo dameŋko behecmu? Go waiŋ nânâ moc behezemec!” 15 Hanazi ine dâŋ ʒiŋuc bâtikiecnewec: “Aricne, bomboŋ‐nane, no ŋokac ʒâic busâqochec. No waiŋ me opâ sanaŋ moc mi napac. No maŋnanere fuŋne Wofuŋtao mufuakopac. 16 Go kiŋaŋ naruge nore manatec ŋokac sâqocne mi ezejec. No dameŋ ŋondeŋ ʒi ʒâic busâqoc â maŋbahac‐nane i mufuapac.” 17 Iŋuc mume Elizi dâŋ ʒiŋuc bâtikiecnewec: “Go wamao rac. Eme Israere Anutuzi nunumugere fârine tahacguzejec.” 18 Eme ŋokaczi muwec, “Kiŋaŋ naruge nore manatec sâckezejec.” Eme ŋokac e waha rarâ nânâ nâwec. Ehame ʒâŋe mai‐ticne busâqoc hawari fowec i omaewec.
19 Eme jaŋe hae fureme furic uupicte faharerâ Wofuŋ muteŋkembiŋ. Iŋuc erâ Rama haeo ficjeŋicko risiembiŋ. Eme Elikanazi ŋonâŋ‐ticne Hanahec juhapire Wofuŋzi ŋokac e manasucnewec. 20 Eme ŋokac e motec moc kiweckerâ dameŋ‐ticne maickeme rowec, ehuc ʒâŋene Samue muwec. E ʒiŋuc muhuctecne iŋuc muwec: “No ere hâcne Wofuŋ numucnepo.”
21 Eme Elikana â ŋokac naru motecfâcne jaŋe jara sâc Wofuŋ taha bacne jumbieŋ iŋuc ehuc mumupaŋ‐ticnere fârine bâfuaocte Silo haeo fembiŋ. 22 Hana e ine ŋowe‐ticne ʒiŋuc âzâcnerâ ŋewec: “Motec e soka sokahame izia jowape rarâ Wofuŋte maio fuarâ ira juhuc juzejec sanaŋ.” 23 Eme ŋowe‐ticne Elikanazi ʒiŋuc âzâcnewec: “Wiac go gahac manatec sâckekac irec sâcko ezemec. Woŋec juhuc motec gume bâsokac ecnezemec. Ehame Wofuŋzi sawa dâŋticne dopeckezejec.” Iŋuc mume ŋokac e ŋerâ motec sokaocte woŋec juhuc gume jowac ecnewec. 24 Gume jowac ehuc juha sokame jowa fewec. Ehuc bulimakao ŋicne jara‐ticne jahec â moc, erâ poroŋ uucne gâcne â waiŋ ʒopo moc mâmâc rowec. Erâ ŋokac e Silo haeo Wofuŋte ufuŋ ŋewec ira motec jowa fewec, motec e ine mi soka tarawec. 25 Eme jaŋe bulimakao ŋicne i qarâ hezupie neŋgoc‐ticnezi motec e Elirao jowa rawec. 26 Ehuc muwec, “O bomboŋ‐nane, go jujâmbâŋkehaŋtec ŋokac no hâcne ʒira gore heririŋko domahuc Wofuŋ numucnepo. 27 No motec ʒirec hâcne numupo. Eme nunumu‐nane i Wofuŋi manawec. 28 Irec no Wofuŋ râcnekopac. E juju dameŋ‐ticne foocmu sâc Wofuŋtao juzejec.” Eme jaŋe mâmâc Wofuŋ muteŋ bâteŋ ecnembiŋ.