21
Manasezi ŋicwofuŋ juwec
(Bin II 33:1–20)
1 Manase e jara‐ticne 12 bazurâ fuŋkerâ ŋicwofuŋ ehuc Jerusalem haeo juhame jara 55 tarawec. Neŋgoc‐ticnere ʒâŋe Hefiziba. 2 Manase e Israe ŋic jaŋe ŋic gurune gurune jaŋere mâreŋko raʒiniŋte Wofuŋzi mâreŋ rune jopa jâpec ejarewec jaŋere eebapa repicne i Wofuŋte ʒâŋe faio ebac ewec. 3 Erâ mamac‐ticne Hisikiazi furu mâreŋ hetâtie‐fârewec i mocwâc heɋârerâ barawec. Ehuc Israe ŋicwofuŋ Ahabazi ewec irec sâc ehuc Baali nemure alata barawec â Asera nemuɋâŋ herâ âkendâŋnehuc sambâŋko bâpiŋ guru dindiŋ jaŋe dape‐jarehuc kiŋaŋ qajarewec. 4 Erâ Wofuŋte ufuŋko alata bame ŋerawec. Alata iŋucnere hâcne Wofuŋzi ʒiŋuc muwec: “Jerusalem haeo nore ʒâŋezi sawa fozejec.” 5 Erâ Wofuŋte ufuŋ irec hae ʒoŋa jajahec ira sambâŋko bâpiŋ guru dindiŋ jaŋere alata bame ŋerawec. 6 Erâ ŋokâ‐ticne qâhâmorâ taha bâzi rikewec. Erâ faŋfaŋ â sowidâŋ mumu i ebac ehuc faŋfaŋdâŋ mumu â qaŋgec bapa ŋic jaŋehec muc manac ewec. E Wofuŋte ʒâŋe faio hehesic boc ehuc Wofuŋ maŋbâiŋ ecnewec. 7 Wofuŋ e Dawidi â ŋokâ‐ticne Salomo ufuŋte dâŋ ʒiŋuc jasawec, i Manasezi qâsuahuc Asera nemure ɋâŋ qâqâtâc baakic erâ ufuŋko heme ŋewec: “Ʒâŋe‐nanezi ufuŋ â hae ʒira raŋɋa foocte Israe ŋic gurune gurune jaŋeraonec Jerusalem hae bâwosâepo. 8 Erâ no Israe ŋic apa ŋosafâc‐jeŋic mâreŋ jarepo ʒirecnec ejarepe kosa rac warec mocwâc mi eniŋmu. Jaŋe wiac sasawa mutâcne‐jarepo irec sâcko aimuŋ jaha ebac ehuc kiŋaŋŋic‐nane Mosezi sâcmutâc ejarewec i mana rereŋ eniŋmuo ine iŋuc hâcne fuaocmu.” 9 Eme jaŋe sifu dâŋ irec hazec mi râembiŋ. Ehuc Wofuŋ e Israe ŋic jaŋere maio ŋic gurune gurune bâsirowec‐jopawec jaŋere hehesic i Manasezi bâdoc‐jopame sirickehuc eŋɋârâŋkembiŋ.
10 Eme Wofuŋzi kiŋaŋŋicfâc‐ticne porofete jaŋere micko dâŋ râehuc ʒiŋuc muwec: 11 “Juda ŋicwofuŋ Manase e Amori ŋic juwicnao jumbiŋ jaŋe wiac ebac embiŋ i sirickehuc wiac hehesicne â repic qapicne ʒi ebac eekac. Ehuc Juda ecneme ɋâŋ qâqâtâc‐ticnao siŋkehuc sindaŋ eekac. 12 Eme irec Israere Wofuŋ Anutu e ʒiŋuc mukac: Manaŋgopieŋ, no Jerusalem mecne â Juda kikefuŋ mecne jaŋerao wiac hâhâwicne bâfuape moc e irec biŋe manarâ fâfâreocmu. 13 No Ahaba uucmaŋ‐ticnere fuŋne bataniŋkehuc â Samaria mâreŋte sâc bapa muc fârepo ijaha Jerusalem haeo fârepemu. Ehuc ŋic moczi oto wiac‐ticne ʒure bâkereŋ eekac irec sâc noni hae i ʒure bâkereŋ erâ herisiepemu. 14 Erâ biŋefâc‐nane ʒanʒaŋne jaŋe behec‐jopa sanaŋkehuc kisâfâc‐jeŋic jaŋere meo râec‐jopapemu. Iŋuc ejarepe jaŋe ʒikare biŋe ehuc kisâfâc‐jeŋic jaŋere nânâ enʒepieŋ. 15 Wiac i apa ŋosafâc‐jeŋic jaŋe Aigita mâreŋkonec wefumbiŋ irecnec fuŋkerâ juwarehuc mai‐naneo wiac hehesicne ehuc maŋbâiŋ enarembiŋzi enareeŋgopieŋte iŋuc hâcne fua‐jarezejec.”
16 Manase e bahacmâcko soc mâretec hoŋkeme Jerusalem hae qaŋeŋne ŋifeckonec ŋifec qatarawec. Erâ ekizia wâc Juda kikefuŋ ejareme Wofuŋte ʒâŋe faio hehesic bâfuambiŋ.
17 Eme Manasezi wiac sasawa ebac ewec â hehesic bâfuawec, i sasawa Juda ŋicwofuŋ jaŋere Binaŋ Qâhâc papia qizecko qâreŋke‐fârekicne. 18 Manase e juku apa ŋosafâc‐ticne jaŋerao ʒuhuckehuc hâmome e jahacne fic heririŋko Uʒare gie fowec ira duckembiŋ. Ehame ŋokâ‐ticne Amoŋzi tucticne qarâ ŋicwofuŋ juwec.
Amoŋzi ŋicwofuŋ juwec
(Bin II 33:21–25)
19 Amoŋ e jara‐ticne 22 bazurâ fuŋkerâ ŋicwofuŋ ehuc jara jajahec Jerusalem haeo juwec. Neŋgoc‐ticne ʒâŋene Mesulemi Jotiba haeonec ŋic moc ʒâŋene Haruzi ere otâ. 20 Amoŋ e mamac‐ticne Manasezi ewec irec sâc jaha ehuc Wofuŋte ʒâŋe faio wiac mamakâcne ewec. 21 E mamac‐ticnezi hata âtehuc ɋâŋ qâqâtâc kiŋaŋ qajarewec ijaha âte‐fârehuc kiŋaŋ qajarewec â araŋ bajarehuc dape‐jarewec. 22 E apa ŋosafâc‐ticne jaŋere Wofuŋ Anutu ere hatao mi rahuc e jahacne wâc râpeckewec. 23 Eme kiŋaŋ qaqafâc‐ticne jaŋe kamierâ râsi rocnehuc ŋicwofuŋ e ficticnaoa qâhâmombiŋ. 24 Eme ŋic ŋokac jaŋe ŋicwofuŋ Amoŋ kamierâ râsi rocnehuc qapie hâmowec ŋic i jaŋe wâc qâhâmoc‐jopambiŋ. Ehuc ŋokâ‐ticne Josiazi tucticne qarâ ŋicwofuŋ juocte âkendâŋnembiŋ. 25 Eme Amoŋzi wiac sasawa ebac ewec irec binaŋ i Juda ŋicwofuŋ jaŋere Binaŋ Qâhâc papia qizecko qâreŋke‐fârekicne. 26 Eme Amoŋ e hâmome e jahacne ʒâŋeruŋ gufukicne Uʒare gieo fowec ira duckembiŋ. Ehame ŋokâ‐ticne Josiazi tucticne qarâ ŋicwofuŋ juwec.