PETORO II
Petorore papia II i Petoro e jahac me mitiŋic âgo-ticne moczi Petorore šâŋeo âkehotahuc qâreŋkewec i mi mana sanaŋkeŋgopeneŋ. Petorozi Asia mâreŋ masunao Jesure kikefuŋfâc jurambiŋ jaŋere papia namba I qâreŋkeme mi šorame jaŋerao mitire mumusifuc ŋic fisirâ šiŋuc jazambiŋ: Miti ɋâricnezi akadâŋ âkehockeme arictac ewecte juju kosa juzo. Iŋuc murâ dâŋ moc šiŋuc mumbiŋ: Jesu e mocwâc mi fisizokac e fesanaŋ fewec hâcne. Ere woŋec maŋgâŋko mi juzo, behezo. Mumusifuc dâŋ i muhuc sasec mamakuc embiŋ. Ehuc ŋic ŋokac qazu-jarezo mumbiŋ. Eme Petoro e jahac me mitiŋic moczi irec dâŋ manarâ uŋdâŋ qâreŋke-jarewec hâcne.
Qâreŋŋic e mitire fârine jaŋerao fua ɋârâŋkeocte bufac qajarewec (gaŋ 1:3-11). Ehuc wiac hone manac eweczi miti mana sarickehuc muwec. Eme hâmoc dameŋ-ticne bembeŋkewecte ši mimic uŋ sawaŋ ejarewec (gaŋ 1:12-21). Erâ mumusifuc â sasec ŋic jaŋere fuŋne ritu-jâmbâŋkewec gaŋ 2). Á Wofuŋ fifisi-ticnere fuŋne mujaŋgeŋkehuc qâreŋkewec (gaŋ 3).
1
Mumušâwe â jambuŋdâŋ
Simoŋ Petoro, Jesu Kristore kiŋaŋ qaqa â aposolo noni, Anutu â bâbâpiaŋ-nâŋec Jesu Kristo tiŋne-ticnere erâ mamanasiŋ furi sâko tahac-nâpokicne ijaha ŋare tahac ekicne, ŋoŋe papia ši qâreŋke-ŋarekopac. Ŋoŋe Anutu â Wofuŋ-nâŋec Jesu mana maŋ epie ŋoŋerao aki anonoc â wama ɋaŋɋaŋ ɋâriaŋ fuahuc fozejec.
Mitire fârine bâfua rahuc juzo
Jesu e tatamac â tâpiri-ticnezi hefârec-nâpome hone šâŋitac ecnepene sahacte â maŋte dope sasawa i Anutu tâpiri-ticnezi bâfua-nârewec. Iŋuc erâ dâŋ biŋe fekicne furi sâko nâre tahac ewec, i maŋkepene irec fârine nâŋâcnao fuame mâreŋko sasecte sisipiric fokac i râpeckerâ Anuture hawari qâreŋfâc enaŋmu. Irec ŋoŋe mamanasiŋhec juŋgopieŋte šoɋac epie tiŋne ju ju-ŋeŋic fuazejec, tiŋne jujuzi mamana bâfuazejec, mamanazi maŋte sowa bâfuazejec, maŋte sowazi sasanaŋ bâfuazejec, sasanaŋzi miti nunumure aafec bâfuazejec, miti nunumure aafeczi ââgo juju bâfuazejec, ââgo jujuzi maŋjauŋ bâfuazejec. Wiac i sasawa ŋoŋerao fohuc fua ɋârâŋkeme Wofuŋ-nâŋec Jesu Kristo mana maŋ eniŋte giene bapie fârimâc mi eocmu. Moc e wiac i tâmiric juocmu, ere šiŋuc muzo: E šâŋe tiŋtuŋ â maŋmutuc, mârâc šure bâpiaŋ ecnekicne irec nikeckewec. 10 Âgofâc, ŋoŋe irec hâcne samarierâ, bâwosâec-ŋoparâ hefârec-ŋopakicne i fârinehec eocte sasanaŋ bâfuanšepieŋ. Ŋoŋe iŋuc erâ docke pârâc tâmiric sâcne juniŋmu. 11 Iŋuc epie juku Wofuŋ â bâbâpiaŋ-nâŋec Jesu Kristozi eŋareme ere juju sanaŋte uucmaŋko ququŋke tâmiric hata aaŋko rašiniŋmu.
Petoro e hâmoc-ticnere manawec
12 Ŋoŋe wiac i sasawa qazu-ŋarekicne â dâŋfârio keteŋ-ŋopakicne domaŋgopieŋ, i manahuc sifu dâŋ ijaha heɋâre-ŋarehuc jupemu. 13 Sahac boze-nanehec juhuc sâc dâŋ i manasu-ŋarehuc wiwic-ŋopape sâckeocmu. 14 No boze-nane biac hetarapemu i manakopac, dâŋ i Wofuŋ-nâŋec Jesu Kristozi mufua-narewec. 15 Erâ behec-ŋopape ŋoŋe dâŋ i ɋâreme ɋâre mana rahuc juniŋte emoc bâmoc eŋarepemu.
Petoro e bapa fuŋfuŋ juhuc wiac hone manac ewec
16 Nâŋe Wofuŋ-nâŋec Jesu Kristo tâpiri-ticnere â fifisi-ticnere dâŋ ŋazambeŋ, i nemu binaŋ ŋic mamanao fuakicne mi ŋazambeŋ, nâŋe bapa fuŋfuŋ domahuc Wofuŋ tatamac-ticne fuame honembeŋ. 17 Ine Anutu Mamaczi eri mumuteŋ râcnehame sambâŋ tatamackonec erao dâŋ šiŋuc wahawec: “Joroc Ŋokâ-nane keci hâcne, no hone aŋac ecneekopac.” 18 Nâŋe ehec mâmâc tiri tikio juhapene dâŋ i sambâŋkonec wahame manambeŋ. 19 Eme nâŋe irec porofete jaŋere dâŋ manapene fârine jâmbâŋ eekac, izi šoclambe iŋucne erâ dapâcko tamaeekacte ŋoŋe ira šâŋe fihuc juhapie hae fure-fârezejec â maŋŋeŋicko bâpiŋ sâkozi wefuzejec. 20 Erâ qanaŋ moc šiŋuc mana-hâmonšepieŋ: Findaŋdâŋ miti papiao qâreŋkekicne fokac irec fuŋne i ŋic moczi e jahacne maŋte mi mumune. 21 Findaŋdâŋ i ŋiczi manasu biric erâ moc mi mukicne, ŋic jaŋe Tiri Mârozi fenšoŋ-jopame Anuturaonec dâŋ mu jumbieŋ.