TIMOTEO II
1
Jambuŋdâŋ
Paulo no Anuture micte, Kristo Jesuzi juju bâfuawec irec biŋedâŋ muiŋnepemurâ Kristo Jesure aposolo epozi Timoteo motec biaŋ-nane gore papia ši qâreŋkekopac. Anutu Mamac â Wofuŋ-nâŋec Kristo Jesu eraonec aki anonoc, uruc jauŋ â wama gorao fotâcnerâ fozejec.
Timoteo mamanasiŋ fârine focnewec
Mamac ŋosafâc-nane jaŋe maŋfâsâc juhuc tuczi tuc Anuture kiŋaŋ qawarekupie ɋâric-jeŋic noni iŋuc jaha eekopaczi daŋge âzâcnehuc nunumuo šušuhuc ŋafe furec manasucguhuc juekopac. Nore ki busâqoc emeŋ, irec manasurâ honecguhuc bubiaŋ sâko manapemurâ enareekac. Erâ mamanasiŋ fârine fogarekac, irec wâc manasuekopac, mamanasiŋ i hâcne mimige Loisi â neŋgocge Eunike jaherao foweczi gorao wâc fotâcnewec fokac i manakopac.
Sasanaŋhec erâ mitire juju gie bazo
Eme no irec hâcne manasu-gararâ mupe: No menane qizecgao râepe Anutuzi jambuŋ tahacguwec i hehâroŋketec šocne fuazejec. Ehuc šiŋuc manasuzemec: Anutu e hâbi-nâŋec goroŋkeocte mâro mi nârewec, tâpirihec â maŋ jauŋhec â maŋsowahec enaŋte nârewec. Irec go Wofuŋ-nâŋecte biŋe mutaniŋkecmurâ mimi gaŋgaŋ mi ezemec, erâ kâpâcwâru ŋicticne nore dâŋ mucmurâ acmeruŋ wâc mi ezemec. Go Anutuzi tâpiri gareme sâc no qâsuecnurâ Biŋebiaŋte erâ šârâ hâriŋ faio juzemec. Eki hâcne bâpiaŋ-nâporâ tiridâŋ-ticnezi hefârec-nâpowec. I biaŋ-nâŋecte mâcne, e jahac maname fowecte aki anonoc-ticnere erâ iŋuc enârewec. I mârâc jaha jâmbâŋ Kristo Jesure erâ biŋe qanârekicne. 10 Eme fârine fufua ine dameŋ ši bâbâpiaŋ-nâŋec Kristo Jesu wahame fua tâcnewec. Eki hâcne hâmoc qâmizierâ juju â wiac fofo sanaŋ Biŋebiaŋko bajaŋgeŋke-nârewec. 11 Eme no irec biŋe mumu â aposolo â qaqazu jupemurâ munarekicne.
Mitire kadahe aimuŋ soŋaŋkezo
12 No irec hâcne šârâ hâriŋ faio juekopac, ehuc mi mimieekopac. No manasiŋkeekopac ere maŋjahec mi eekopac, aricne, no šiŋuc manapaŋkeekopac, e tâpiriheczi šeŋaŋ-nane sâcne soŋaŋke-narehame dameŋ sâko maickezokac. 13 Dâŋ fârine irec biri-ticne qazu-garepo ijaha bâjâpezemec, i Kristo Jesu manasiŋkehuc â maŋzi jauŋkehuc iŋuc ezemec. 14 Tiri Mâro maŋnâŋecko juekac eki neŋgoc ŋegarehame miti kâdoc qârârie-garekicne, i aimuŋ soŋaŋketec fogarezejec.
Onesiforo ere dâŋ
15 Asia mâreŋko behecnu-fârembiŋ i manameŋ, Figelo â Hemogene jahe mâmâc. 16 Wofuŋ e Onesiforo ere wiacfâc maŋuruc qajarezejec. Mamac-jeŋiczi kâpâcwâru ŋic nore mi takickeha bubiaŋ hati qanarehuc juwec. 17 E Roma haeo fisirâ šoɋac basacnuku bâfuacnuwec. 18 Wofuŋzi manaha dameŋ sâko Wofuŋtao uruc jauŋ bâfuazejec. E Efesoo wâc kiŋaŋ qaqa gie wemo afecne bawec i go gahac hone manac emeŋ.