KOLOSAI
Kolosai i hae šâŋe jaha, hae i Efeso hae ramicnao ŋewec. Mâreŋ ira Laodikea hae ŋewec wâc. Paulo e jahacne Kolosai haeo mi ra fisiwec (gaŋ 2:1). Motec-ticne Epafara eki hae ira miti gie bame Jesure kikefuŋ fuambiŋ (gaŋ 1:7 â gaŋ 4:12). Filemoŋ e hae ijaha juwec wâc. Paulo e Roma haeo kâpâcwâru ficko ŋehame Epafara e ere busâqoc manarâ ra iqickewec. Iqickerâ hae-ticnaonec miti ŋic ŋokac jaŋere dâŋ binaŋ ecnewec. Jaŋerao mâreŋ mockonec mitiŋic burecne fisirâ maŋ bâsifuc ejarembiŋ. Ehuc šiŋuc mumbiŋ: Ŋoŋe miti maine sawa bajueŋgopieŋ, râpene ine fokac. Nâŋe aŋelozi dâŋ soŋne mufua-nârembiŋ, i qazu-ŋarepene reŋkenšepieŋ. Ehuc aŋelo araŋ bajarenšepieŋ â sowa bâtâc hombaŋ sabata ŋenšepieŋ. Jesu sawa manasiŋkepie mi sâckeocmu. Iŋuc hâcne jazapie Kolosai haeonec miti mamana jaŋe dâŋ irec maŋjahec erâ Epafara ecnepie Paulorao rarâ dâŋ binaŋ ecnewec.
Eme Paulo e dâŋ i manarâ Kolosai ŋic jaŋere papia qâreŋkewec. Ehuc mitire fuŋne kecšiŋuc mutaniŋkewec: Jesu e wiac sasawa irec Wofuŋ. Aŋelo fekicne wahakicne jaŋe ere jujuo fuambiŋ juŋgopieŋ wâc. Á dâŋ soŋne Anuturao fowarehuc fowec, irec fârine Jesuzi bâfuawec. Eme ši dâŋ soŋne moc mi fokac. Erâ Jesu e hâmohuc âgo bacnâpome erea embeŋ. Eme irec fainao wiac šuhuckerâ enaŋte mi munârekicne (gaŋ 1). Gaŋ 2 ira mu qaqazuc dâŋ gâcne gâcne forakac. Mitiŋic burecne jaŋere Paulozi šiŋuc qâreŋkewec: Jaŋe maŋko fuac dâŋ â qâpucdâŋ ŋazapie manarâ Kristo bâsueniŋmu. Jaŋe wiac jawane ŋarehuc boreŋ fâri-ŋeŋic ŋowac rozo muŋgopieŋ. Iŋuc muhuc kime dopec ejarewec. Dâŋ i erâ Efeso ŋic qâreŋke-jarewec irec dâŋ tucne mâmâc qâreŋkehuc âkesiŋ-jopawec (gaŋ 3 erâ 4:1-5). Eme šâhec e jahacne dâŋ binaŋ ehuc papia qâreŋke tarawec (gaŋ 4:6-18). Eme Tikiko râcneme barawec.
1
Jambuŋ â daŋge mumuteŋ dâŋ
1 Paulo no Anuture micte Jesu Kristore aposolo epo, erâ âgo-nâŋec Timoteo, 2 nâhe Kolosai haeonec mitiŋic â âgofâc-nâhec Kristorao qohotaŋgopieŋ ŋoŋe papia ši râe-ŋarekoperec. Anutu Mamac-nâŋec eraonec aki anonoc â wama ŋoŋerao fotâcnerâ fozejec.
3 Nâŋe Wofuŋ-nâŋec Jesu Kristo ere Mamac Anutu hâcne ŋoŋere erâ dameŋ sâc daŋge nunumu ecneeŋgopeneŋ. 4 Ŋoŋe Kristo Jesu manasiŋkeeŋgopieŋ â mitiŋic hae gâcnaonec maŋjauŋ ejareeŋgopieŋ irec mecne, 5 â sambâŋ miti šeŋaŋ ŋoŋere biŋe râekicne irec mâmâc Anutu muteŋkeeŋgopeneŋ. Ŋoŋe miti šeŋaŋte kâuc mi baeŋgopieŋ. Dâŋ fâri qizecne Biŋebiaŋ hâcne ŋoŋerao fuawec irec biŋe mârâc manambiŋ. 6 Biŋebiaŋ i mâreŋ sâc fua bâbâriŋ rahuc fârinehec eekac. Eme Anutu akidâŋ-ticne ŋoŋerao fâme jâmbomacko mana maŋ embiŋ, dameŋ ira ŋoŋerao iŋuc jaha fârinehec ewec. 7 Joroc âgo babafic-nâŋec Epafara, Kristore kiŋaŋ qaqa micrereŋhec, eki qazu-ŋareme manambiŋ hâcne. 8 Erâ ekizia wâc, Mârozi ŋoŋerao maŋjauŋ bâfuawec, irec dâŋ binaŋ enârewec.
Miti mana ɋârâŋke rahuc irec fârine bâfuazo
9 Eme nâŋe dâŋ binaŋ-ŋeŋic manarâ izia fuŋkerâ Anutuzi maŋ mamana-ŋeŋic bâsokame micdâŋ-ticnere â Mârore maŋɋârâŋ dâŋ mana taraniŋte numucne warehuc jueŋgopeneŋ. 10 Wofuŋzi iŋuc hâcne eŋareme ju ju-ŋeŋiczi fuŋne-ticne mutaniŋkeme honec-ŋopame biaŋkezejec. Á mitio gie fuŋne fuŋne fokac, i bahuc irec fârine bâfuanšepieŋ, ehuc Anuture fuŋne mana ɋârâŋke rahuc junšepieŋ. 11 Erâ Anuture tâpiri mu wawarec-ticnehec izi âkesiŋ-ŋopame hâbi sâko hepie hume juhapie fai-ŋeŋicko wiac ŋemâcne feme sâc docke pârâc tâmiric bumâteŋ jaha de domahuc bubiaŋ mananšepieŋ. 12 Erâ Mamac-nâŋec e faic tatamacko merâfâc-ticne râe-nârewec, i mitiŋic nâŋâc ru sâc enaŋte bâmoc-nâpoekacte buafec jaha daŋge âzâcnenšepeneŋ.
Wiac sasawa ŋokâre jujuo fuawec
13 Anutu e dâpac runere tâpirionec batarac-nâporâ joroc Ŋokâ-ticnere uucmaŋko râec-nâpowec. 14 Ŋokâ-ticne eki hâcne sâqocne-nâŋec tâmireote kiwiric-nâŋec rowec. 15 Anutu soŋne ere hawari tâtâc fufua Ŋokâ-ticne hâcne. E wiac sasawa mi fuahame micne barâ juweczi juwec. 16 Ere jujuo wiac sasawa sambâŋko â mâreŋko fua-fârewec, wiac hohonene â mi hohonene, ŋic me aŋelo ɋuŋɋasaŋhec me tâpirihec, fekicne sâko me araŋ bapa-jarene, i mâmâc sasawa ere tâpirio â ere biŋe fuakicne. 17 E wiac sasawa irec juwicnao juwec erâ wiac sasawa irec micne sâko, erâ wiac sasawa ere dope sisiŋko fowarehuc juekac.
Kristo e fekicne sâko-nâŋec
18 Erâ e me sahac-ticne, kikefuŋ-ticne hâcne, nâŋâcne qizec juekac. Erâ fufuŋke ŋic, hâmockonec micne barâ faharewec, ehuc wiac sasawa irec jâcne ewec. 19 Anutu e juju â tâpiri-ticnere rowaŋ Ŋokârao guru fufusuc foocte maname sâckewec. 20 Erâ wiac sasawa sambâŋko â mâreŋko Anutu jahacnehec miriŋ bacnâpoocte mucneme eki hâcne maripoŋko socticnezi wama bâfuahuc iŋuc ewec.
Jesu e hâmoc-ticnezi miriŋ bacnâpowec
21 Ŋoŋe mârâc jaha Anutu râpeckerâ nâme nikecne erâ sâqocne fuŋne fuŋne bahuc maŋšârâhec jujumbieŋ. 22 Eme Kristo sahac biuchec fuarâ hâmoc-ticnezi miriŋ bacŋoparâ Anuture maio furu â maŋɋaɋac â bahac fâsâc juniŋte râec-ŋopawec. 23 Eme irec ŋoŋe mamanasiŋko qiŋ herâ domahuc, Biŋebiaŋzi woworic bâfua-ŋarewec i sifucke-ŋarezacte biric borocne mi enšepieŋ. Biŋebiaŋ i ŋoŋe qazu-ŋarekicne, erâ ŋoŋe sawa mâcne, ŋicne ŋicne mâreŋ sâc jaza rakicne. Paulo no hâcne irec kiŋaŋŋic juekopac.
Anuture dâŋ soŋne fowarehuc juku Jesurao fârinehec ewec
24 No ŋoŋere erâ šâic serereŋ faio juekopac irec ši manape biaŋkeekac. Kristozi me sahac-ticne, kikefuŋ-ticne hâcne, ere erâ šâic serereŋ manawec, šâic irec tofanao šuhuckehuc mamanane fokacte nore sahacko fehuc micne qazejec. 25 No Anutu dâŋbiri-ticnere sâcko kikefuŋte kiŋaŋ qaqa erâ ŋoŋerao micdâŋ-ticnere qaqazu gie batarapemurâ munarekicne. 26 Dâŋ i dameŋne dameŋne soŋne fome mimiŋzi ɋâric mi mamana mâc juwefuhuc jumbiŋ, eme dameŋ šiŋuczia ine mitiŋicfâc-ticne mufua-nârekicne. 27 Erâ qâpuc jaŋerao dâŋ soŋnere mâriri biaŋ sâko fuakac i mitiŋicfâc-ticne mutaniŋke-nârekac. Kristo maŋŋeŋicko juekac e hâcne dâŋ soŋnere fârine â sambâŋ šeŋaŋ irec hozine. 28 Ere fuŋne mutaniŋkehuc ŋicne ŋicne uŋ sawaŋ ejarerâ maŋɋârâŋ dâŋ sasawa jaza qazuc eeŋgopeneŋ, i Kristoo ŋic fârine epie erao guruc-jopanaŋte iŋuc eeŋgopeneŋ. 29 Ere tâpirizi eferenšoŋnume gie i hâcne fotariehuc baekopac.