EƷEKIE
Eʒekie e Jeremia juwec dameŋ ijaha Judaŋic jaŋere porofete fârine moc juwec, erâ e taha bapa jaŋere guruoneczi taha ufuŋko taha bapa gie bahuc juwec wâc. E porofetezi taha bapa jaha juhuc taha ufuŋte â tiŋne jujure dâŋ boc mujujec. Papia‐ticnao dâŋ forakac i Jeremiare papiao dâŋ woseŋgopeneŋ hawarine iŋucnea.
Judaŋic jaŋe dameŋ ira sindaŋ ehuc Anuture uŋdâŋ mana‐bipiehuc mumusifuc kecʒiŋuc bâfuarâ boc mujumbieŋ: “Anutuzi Jerusalem hae‐nâŋec ŋezickekacte râsi jaŋe fisirâ iŋuc me iŋuc sâcne mi ecneniŋmu.” Eme Eʒekie e mumusifuc dâŋ i qatara‐jarehuc uŋ sawaŋ hâhâwicne ejarewec â maŋjeŋic bârisieniŋte jazahuc juwec. Jerusalem hae i tâtie‐jâmbâŋkeocmu, irec dâŋ â hawari wiac fuŋne fuŋne i maŋʒâŋe‐ticnezi hone manac erâ hae rune mufua‐jarehuc uŋ sawaŋ ʒoɋachec ejarehuc juwec hâcne.
Eme juku dâŋticne fârio qawec. Anutuzi manaha Babilonia ŋic jaŋe râsi fisirâ Jerusalem hae somâckerâ Judaŋic jopa qâtâtiec ejareku tiwâne Babilonia mâreŋko bacjopa rahuc Eʒekie e mâmâc barambiŋ, ine jara dameŋ 597 B. C. ira.
Eme Eʒekie e Babilonia mâreŋko juhame, mârâc findaŋdâŋ muhuc juwec i fârinehec eme gie‐ticne ʒuhuckerâ bame piticne moc ewec. I fuŋne kecʒiŋucte: Anuturaonec okacne fisi‐nârewec hâcne, Judaŋic jaŋe kâpâcwâru ficko ŋehuc iŋuc mana tarapie juju‐jeŋicte manamaŋ bahac ejareme maŋjeŋic wahame busâqoc boc manahuc jumbiŋ. Ehuc Eʒekie ficticnao iqickehuc mu bâmunaŋ ejareocte numucnembiŋ. Irec porofete e mu bâmiriŋ â maŋ babaafec ejarehuc neŋgoc ŋesiŋ â rucbapa‐jeŋic erâ juwec. Erâ hone maiŋ ejarehuc bâbâpiaŋ‐jeŋic â Jerusalem hae heheɋâre fua‐jareocte hata heʒâwe‐jarewec.
Eʒekie e porofete gie‐ticne bahuc juhame jara 22 mecne tarawec. Jerusalem haeo fuŋkewec, erâ Babilonia mâreŋko jara 16 mecne ʒuhuckerâ bawec. Babilonia mâreŋko juhame Anutuzi mâsi sâko bame Eʒekie e ʒâŋene fitâcnerâ Anuture huriri qâreŋ honewec. Ehuc wiac qeŋ bipinehec fuŋne fuŋne hone ʒâirewec. Eme Anutuzi porofete gie râcnehuc dâŋ mutâcnecnewec sâc reŋke‐fârewec.
Eʒekiere papia maŋnao gaŋne gaŋne dâŋ forakac ine kecʒiŋuc:
Gaŋ 1—24. Râsi jaŋe fisirâ Jerusalem hae hetâc qâtâtieniŋmu irec findaŋdâŋ. Eme wiac fuaocmu sâc i Eʒekiezi maŋʒâŋe‐ticnezi honerâ findaŋdâŋ muwec hâcne.
Gaŋ 25—32. Ira ine ŋicguru gâcne Israe ŋic râsi ejarehuc jumbiŋ jaŋe okacne fisi‐jareocmu wâc, irec findaŋdâŋ qâreŋkekicne fokac.
Gaŋ 33—37. Gaŋ wiac irec maŋnao ine Jerusalem hae heheɋârere, â Israe ŋicguru babafaharec‐jopa irec findaŋdâŋ forakac.
Gaŋ 38—39. Gaŋ jajahec irec maŋnao ine juku wiac gâcne fuazokac irec findaŋdâŋ qâreŋkekicne fokac. Qâpuc ŋicguru faic mâreŋko juŋgopieŋ jaŋere sisipiric dameŋ maickeocmu.
Gaŋ 40—48. Ira findaŋdâŋ gâcne gâcne, erâ Mesiare uucmaŋte dâŋ, taha ufuŋ ɋâricnere dâŋ â taha ufuŋ maŋnao gie bapa irec sâcmutâc dâŋ, iŋuc forakac.
1
Porofetezi Wofuŋte huriri qâreŋ honewec
No jara‐nane 30 irec mosa 4‐re ʒoaŋ gie bapa 5 ira kâpâcwâru ŋic jaŋere ŋondeŋko Kebara opâo juhape maŋʒâŋe‐nane tâcneme sambâŋ aŋkeha Anuturaonec wiac fuame honepo. Eme ŋicwofuŋ Jojakiŋ e kâpâcwâruo ŋehame jara 4 â mosa 3 erâ gie bapa 4 tarawec. Tarame ʒoaŋ gie bapa 5 ira Wofuŋtaonec dâŋ Buʒire ŋokâ taha bapa Eʒekie no Kaldea ŋic jaŋere mâreŋko Kebara opâo juhape fua‐narewec. Erâ no ira juhape Wofuŋzi basanaŋnuwec.
No ʒâŋe fipe rame mâŋâŋ ɋicwânʒâŋnehec â karorac ɋâfoŋne, tatamac sâkozi orâŋkehuc fowec i faic mâreŋkonec ware fisime honepo, ehame ʒoczi tamaehuc fowec. Eme ʒoc irec maŋnao wiac moc aeŋ bâbâroŋzi bâricnehuc tamaeekac irec sâc tamaewec. Eme irec maŋnaonec wiac gâcne i wiac jujune 4 iŋucnezi wefu fisimbiŋ, jaŋere hawari i ŋic hawari iŋucne. Ʒâŋe mai‐jeŋic ine ru sâc jahec â jahec â fafakec‐jeŋic iŋuc jaha jahec â jahec fojarewec. Kike‐jeŋic i sorondoŋ â kike tape‐jeŋic i bulimakao motecnere kike râqâc iŋucne, jaŋe aeŋ bâbâroŋ ʒâmupie bâruŋkeekac irec sâc bâruŋkembiŋ. Fafakec‐jeŋicte rurumaŋko wiac moc ŋicme hawari iŋucne fojarewec, erâ ʒâŋe mai‐jeŋic â fafakec‐jeŋic irec fuŋne ine ʒiŋuc: Jaŋe fafakec‐jeŋic iitic efâreha sâckoa birihec rafârehuc foc fotikic mi embiŋ. 10 Ʒâŋe mai‐jeŋicte hawari ine ʒiŋuc fojarewec: Jaŋe ru sâc mai‐jeŋicko ŋic hawari, ŋaki ŋifeckopec laioŋ hawari, ŋaki ŋifeckopec bulimakao ŋicnere hawari â râpeopec tucwipe hawari iŋuc fojarewec. 11 Wiac jujune jaŋe ru sâc fafakec 4 fojarewec. Fafakec jajahec jahe faicpec qaratiehuc fakec gâcne jaŋehec iitic epic â fakec jajahec jahe ine ombâŋ‐jeŋic qofackehuc fopic. 12 Eme mârozi baafec‐jopame ʒâŋe mai‐jeŋic fowec sâc tikic fotikic tâmiric dândâŋne rafârembiŋ. 13 Wiac jujune jaŋere ŋondeŋko ine wiac moczi ʒocmimiŋ me waha bâruŋkeekac iŋuc bâruŋkehuc rac warec ewec, erâ mâretec bâruŋkeha maŋnao bâbâric fuawec. 14 Ehame wiac jujune jaŋe bâricnehuc rac warec embiŋ.
15 Eme no wiac jujune 4 jaŋerao fipe rame jaŋere heririŋko ʒafeŋgâŋ 4 jaha mâreŋko ŋepie honec‐jopapo. 16 Ʒafeŋgâŋ i jaŋe hawari‐jeŋic mocjaha sasawa, erâ qânâ furi sâko iŋucne bâricnembiŋ, erâ wâc ʒafeŋgâŋ mocte maŋnao ʒafeŋgâŋ moc râekicne tinac ewec. 17 Jaŋe faic â juwic, ŋifec â ŋifec rahuc tikic fotikic tâmiric dândâŋnea rafârembiŋ. 18 Ʒafeŋgâŋne 4 jaŋe mecqaŋeŋ‐jeŋichec â biriŋ‐jeŋichec sasawa, ehame mecqaŋeŋ‐jeŋicko ʒâŋe hândâŋ bocjahazi sâcke‐fârerâ ŋerawec. 19 Wiac jujune jaŋe hata rapie ʒafeŋgâŋ jaŋe heririŋ‐jeŋicko mâmâc rambiŋ, me wiac jujune jaŋe mâreŋkonec faharerâ sawao fepie ʒafeŋgâŋ jaŋe mâmâc faharembiŋ. 20 Eme mârozi jowa qataŋ ejareme sâc rambiŋ, ehame ʒafeŋgâŋ jaŋe mâmâc rambiŋ, wiac jujune jaŋere mârozi ʒafeŋgâŋ jaŋehec mâmâc juwec irec. 21 Ine hâcne wiac jujune jaŋere mârozi ʒafeŋgâŋ jaŋehec mâmâc juwecte wiac jujune jaŋe rapie sâc ʒafeŋgâŋ jaŋe mâmâc rambiŋ, jaŋe domapie sâc mâmâc domambiŋ, jaŋe faharepie sâc mâmâc faharembiŋ. 22 Wiac jujune jaŋere qizec botâŋko wiac hahameŋne moczi qaratierâ qânâ furi sâko iŋucne bâricnehuc fowec. 23 Eme wiac hahameŋnere rurumaŋko fafakec‐jeŋic qaratierâ ʒuʒuhuc embiŋ; ehame wiac jujune jaŋe ru sâc fafakec‐jeŋic jajaheczi ɋoroc‐jopa‐fârewec. 24 Jaŋe rahapie fafakec‐jeŋicte fânâŋ i opâ ɋiɋicnere fânâŋ iŋucne â tâpiri rune ere ɋuŋ parandaŋ fânâŋ iŋucne erâ ŋic guru sâko jaŋere kike fânâŋ iŋucne manapo; jaŋe niniŋkerâ domahuc fafakec‐jeŋic behepie waha doma rawec. 25 Iŋuc doma rahapie faic irecnec dâŋfânâŋ moc qizec botâŋ‐jeŋicko wahame manapo.
26 Eme wiac hahameŋne irec faicnao wiac moc eri ŋeŋe tinac ŋeme honepo; hawarine qânâ furi sâkozi kedanehec iŋucne. Eri ŋeŋe fainao ine moczi ŋic hawari tinac ŋeme honepo. 27 Erâ no gâjoŋ‐ticnaonec wiac moc aeŋ bâbâroŋ iŋucne bâruŋkerâ feha rârec rârec ʒoc fua rame honepo, erâ gâjoŋ‐ticnaonec jaha wiac moc ʒoc iŋucnea wahahame rârec rârec tatamac sâko fuame honepo wâc. 28 Rârec rârec tatamac sâko fuawec i hoere huriri karoracko fuaekac irec sâc.
Wofuŋte huriri qâreŋ irec hawari iŋucne hâcne fuawec. Eme no honerâ mâreŋko hetutuckerâ fohuc ŋic moczi dâŋ mume manapo.