29
Jakobo e Labaŋtao fisiwec
1 Eme Jakobo e ʒoaŋ wewefunaopec ŋic jumbiŋ jaŋere mâreŋko ju fofo rawec. 2 Raku ʒâŋe fime rame gieo opâ nombâŋ moc honewec. Ira lama guru jahec â moczi fombiŋ. Hae rune ŋic jaŋe opâ nombâŋ irecnec hâcne qowifâc‐jeŋic opâ gumec‐jopa jumbieŋ. Opâ nombâŋ micnao ine qânâ sâko ŋewec. 3 Irec opâ ira lama bulimakao jaŋe qanaŋ tumaŋne‐fârepie ie soŋaŋ jaŋe opâ nombâŋ micnaonec qânâ i qârândiŋkerâ qowi gurune gurune gumec‐joparâ qânâ i mocwâc ŋeŋe‐ticnao hepie ŋejujec.
4 Eme Jakobozi soŋaŋ wio‐jarewec: “Âgofâc, ŋoŋe wenirec?” Jaŋe mumbiŋ: “Nâŋe Haraŋnec.” 5 Eme wio‐jarerâ muwec: “Ŋoŋe Nahore ŋokâ Labaŋ e moc manaŋgopieŋ me?” Jaŋe mumbiŋ: “Ea, manaŋgopeneŋ.” 6 Eme wio‐jarehuc muwec: “E sâcne jukac me?” Jaŋe mumbiŋ: “Sâcne jukac, erâ otâ‐ticne Rahe e kecocna lama bulimakao jowac‐jopa warekac hâcne.” 7 Eki muwec: “Hâc, ʒoaŋ ɋaɋacko lama bulimakao haeo râec‐jopaniŋte dameŋ biac mi maickekac i. Irec motecne sawa opâ gumec‐joparâ mâc râec‐jopapie nânâ nâhuc juniŋ.” 8 Jaŋe mumbiŋ: “I qowi gurune gurune mi ware‐fârehapie sâcne mi enaŋmu. Ware‐fârepie ine nombâŋ micnao qânâ ŋekac i qârândiŋkerâ qowi motecne opâ gumec‐jopaeŋgopeneŋ.”
9 Eme Jakobo jaŋehec dâŋ muc manac eha ehame izia Rahezi mamac‐ticnere lama bulimakao bacjopa ware fisiwec, e irec soŋaŋ juwec hâcne. 10 Eme Jakobo e wawa‐ticne Labaŋ ere otâ Rahe â wawa‐ticnere qowi mâmâc honec‐joparâ ra opâ nombâŋkonec qânâ qârândiŋkerâ wawa‐ticne Labaŋ ere lamafâc opâ gumec‐jopawec. 11 Tarame Rahe muduckehuc fuŋkerâ kisâko kiowec. 12 Erâ e Rahe mamac‐ticnere soctofa â Rebekare ŋokâ juwec irec dâŋ âzâcnewec. Eme eki beherâ ra mamac‐ticne biŋe âzâcnewec.
13 Eme Labaŋ e seŋticnere ŋokâ, Jakobo ere biŋe manarâ gasacke ra bâfuarâ hâpo mumuduc ecnehuc ficticnao jowa fewec. Eme eki binaŋ‐ticne Labaŋ ninic jaha bacnewec. 14 Eme Labaŋzi âzâcnewec: “Go nore biuc â soc jâmbâŋ.” Eme Jakobo e mosa wâŋ ehec juwec.
Jakobo e Lea â Rahe ŋonâŋ jahec‐ticne rocjofawec
15 Eme Labaŋzi Jakobo âzâcnewec: “Go soctofa‐nane jukomeczi wemocko okacmâc kiŋaŋ qanarecmu. Furine wemo rozo mukomec i nazac.” 16 Labaŋte otâ jajahec jupic, mârâc otâ ʒâŋene Lea â ʒâhec otâ ʒâŋene Rahe. 17 Lea e ʒâŋe hândâŋ‐ticne gogowac râmockekicne, Rahe e ine ʒâŋe mai‐ticne â sahac hawari biaŋne. 18 Eme Jakobore maŋzi Rahere domawecte muwec: “No ʒâhec otâge Rahe ere erâ jara 7 kiŋaŋ qagarezepac.” 19 Eme Labaŋzi muwec: “E ŋic furune moc mi râcnehuc go garepe sâcke‐jâmbâŋkeocmu, irec nohec juzemec!” 20 Eme Jakobo e Rahere erâ jara 7 kiŋaŋ qahuc juwec, ehuc ere mâretec ecnewecte jarare maname ʒoaŋ afecne tinac ewec.
21 Eme juku dameŋ i tarame Jakobozi Labaŋ âzâcnewec: “Dameŋ‐nane tarakacte ŋonâŋ‐nane narec, eme no ehec juzepac.” 22 Eme Labaŋ e haeru hefârec‐joparâ tiwâ ʒepec ejarewec. 23 Erâ hae qâhâpoha otâ‐ticne Lea rorâ Jakoborao jowa fewec. Eme ehec fowec. 24 Eme Labaŋ e kiŋaŋ naru‐ticne Silipa e otâ‐ticne Lea kiŋaŋ qacneocte râcnewec. 25 Hae fureme ine Jakobozi honeme mi Lea ezejec i! Eme Labaŋ ʒiŋuc âzâcnewec: “Go wemo mâsi enaremec? No Rahere erâ kiŋaŋ qagarepo i! Go wemocte eatucnumec?” 26 Eme Labaŋzi muwec: “Hae mâreŋ ʒira mârâc naruzi mâc juha ʒâhec naru ŋicko rârâe i mi eeŋgopeneŋ. 27 Irec keci ehec jutec woka moc tarame moc e wâc garepene ere erâ iŋuc jaha jara 7 ʒuhuckerâ kiŋaŋ qanarezemec.” 28 Eme Jakobo e iŋuc hâcne ehuc Leahec jume woka moc tarawec. Eme Labaŋ e otâ‐ticne Rahe râcneme ŋonâŋ‐ticne ewec wâc. 29 Erâ kiŋaŋ naru‐ticne Biliha e otâ‐ticne Rahere kiŋaŋ qaocte râcnewec. 30 Eme Jakobo e Rahe ehec fowec wâc. Eme maŋticne Rahere kâcɋene domaha Leare afecne ecnewec. Ehame jara 7 ʒuhuckerâ Labaŋte kiŋaŋ qahuc juwec.
Jakobore ɋâricfâc fuambiŋ
31 Eme Wofuŋ e, Lea maŋzi mi jauŋkekicne, iŋuc honerâ kiwechec eocte manacneha Rahezi hufiŋne juwec. 32 Eme Lea e motec kiweckerâ rowec, ere ʒâŋe kecʒiŋuc muhuc Rubeŋ muwec: “Wofuŋ e busâqoc‐nane hone manac ehuc baficnuwec, miŋecne ŋowe‐nanezi jâmbomac maŋzi jauŋnuocmu.” 33 Eme faicnao motec mocwâc kiweckerâ rowec. Erâ muwec: “Âgo mi enarekicne no Wofuŋzi mana‐narerâ kecʒi ʒuhuckerâ narewec.” Iŋuc murâ ʒâŋene Simeoŋ muwec. 34 Faicnao motec mocwâc kiweckerâ rowec. Erâ muwec: “No ŋokâ jahec â moc rocjopapo irec ŋowe‐nanezi norao qohotaocmu.” Iŋuc murâ ʒâŋene Lewi muwec. 35 Faicnao motec mocwâc kiweckerâ rowec. Erâ muwec: “Ʒi ine Wofuŋ muteŋkezepac,” iŋuc murâ ʒâŋene Juda muwec. Faicnao ine ʒuhuckerâ motec mocwâc mi rowec.