3
Hosea â ŋonâŋ‐ticne jahere dâŋ
1 Eme Wofuŋzi kecʒiŋuc nazawec: “Go harierâ ra ʒuhuc bâtâc ŋokac sasec‐ticnehec moc erao maŋge râetec fozejec; ine Israe kikefuŋ jaŋe nemu jabane jaŋerao qohotahuc nânâ poroŋ waiŋ hândâŋnehec jare tahac ejumbieŋ irec aŋac‐jopaekac i Wofuŋzi mana‐bipiehuc sifu maŋticne jaŋerao râeme foekac irec sâc.” 2 Iŋuc nazame noni siliwa moneŋ 15 â padi pake 15 jaha izi ŋokac e furine bapo. 3 Erâ âzâcnepo: “Go norao dameŋ ʒora sasec tâmiric juhuc ŋic moctao mi qohotazemec, ehame noni iŋuc jaha gohec mi fopemu.” 4 Israe kikefuŋ jaŋe dameŋ ʒora ŋicwofuŋ tâmiric â ŋic fekicne tâmiric, taha bâzi tâmiric â nemure qânâ wâtuŋ tâmiric, taha bapare qoqonaŋ ŋaqi tâmiric â nemuɋâŋ ficmaŋko dodomane tâmiric jufeniŋmu hâcne. 5 Dameŋ irec faicnao ine Israe kikefuŋ jaŋe risierâ Wofuŋ Anutu‐jeŋic â Dawidi ŋicwofuŋ‐jeŋic wira basac ejactenʒepieŋ, erâ dameŋ tataranao Wofuŋ araŋ fârine bacnehuc buuruc‐ticne honenʒepieŋ.