31
Aigita ŋic jaŋe nemu aricne, jaŋe ŋic sawa
1 Jei, Aigita ŋic jaŋe bafic‐jopaniŋte jaŋerao hueŋgopieŋ,
jaŋe becâsic â ʒika keretac bocjahare manapie feha
becâsicko rara ŋic sasanaŋ‐jeŋicte erâ
jaŋerao roweckeeŋgopieŋ,
ehuc Israere Tiri rune erao ʒâŋe mi fieŋgopieŋ
â Wofuŋ wira basac mi ecneeŋgopieŋ!
2 Eki ine maŋɋârâŋhec juhuc mume sisipiric fuaekac,
e dâŋticne fâri tâmiric eocte moc mi muekac; aricne,
e sâqocne bapa guru â ŋic sindaŋne bafic‐jopaeŋgopieŋ
jaŋe mâmâc râsi ejareocmu.
3 Aigita ŋic jaŋe Anutu mâcne, jaŋe ŋic sawa,
â becâsicfâc‐jeŋic jaŋe mâro aricne, jaŋe soc biuc sawa.
Wofuŋ e meticne sicneme Israe ŋic bafic‐jopaeŋgopieŋzi biric boroc eniŋmu
â bafic‐jopakicne jaŋe rândiŋkeniŋmu,
jaŋe mâmâc jaha hâmo sipiric eniŋmu hâcne.
4 Wofuŋ e ʒiŋuc nazawec hâcne:
Laioŋ kâcɋene me piticne moc e qowi‐ticne sakarehuc ŋuruŋneha
lama soŋaŋ guru sâko tumaŋnehuc orâŋkepie
ojowa‐jeŋicte mi fâfâreocmu
â fânâŋ‐jeŋicte mi hâwickeocmu
irec sâc Anutu Tâpiri Ɋuŋɋasaŋ Wofuŋzi
Zioŋ tiki botâŋnao ʒika qaocte wahaocmu.
5 Wipe jaŋe furuc furuc qahuc motecfâc‐jeŋic ŋezic‐jopaeŋgopieŋ,
irec sâc jaha Anutu Tâpiri Ɋuŋɋasaŋ Wofuŋzi
Jerusalem ŋezickeocmu,
ŋezickehuc bataraocmu,
â akickehuc bafickeocmu.
6 O Israere ŋicfâc, ŋoŋe Wofuŋ râpeckerâ behe sanaŋkembiŋzi erao mocwâc risieniŋ! 7 Manaŋgopieŋ, meŋeŋiczi nemuɋâŋ siliwa â golzi bahuctecne sâqocne bâfuambiŋ i dameŋ ira ʒeŋgoma qikiŋne behec eniŋmu.
8 “Eme Asiria ŋic jaŋe ʒika kiniŋmu i ŋic ʒika aricne,
â ʒikazi nâcjopaocmu i mâreŋ ŋic jaŋere ʒika aricne,
jaŋe ʒikare hâhâwicte wiseniŋmu
â ŋicmotecfâc‐jeŋic jaŋe kâpâcwâru giere biŋe eniŋmu.
9 Fekicne‐jeŋiczi hâhâwicte erâ omaeocmu
â micnefâc‐jeŋic jaŋe maŋjeŋic gâckeme filac beheniŋmu,”
Zioŋko ʒocticne ʒahuc fokac
â Jerusalemko ʒafe‐ticne ŋekac, Wofuŋ ere dâŋ iŋuc.