17
Mikazi ɋâŋ qâqâtâc araŋ bajarewec
1 Eferaim tiki mâreŋko ŋic moc juwec ʒâŋene Mika. 2 Eki neŋgoc‐ticne ʒiŋuc âzâcnewec: “Siliwa moneŋ dâkâne 1100 goraonec rokicne, eme irec sâwecdâŋ mutec manapo i noni rorâ bajukopac.” Iŋuc mume neŋgoc‐ticnezi ʒiŋuc âzâcnewec: “Motec‐nane, Wofuŋte eehâmozi gorao fozejec.” 3 Iŋuc âzâcneme motec‐ticnezi siliwa dâkâne 1100 i bârisiecnewec. Ehame neŋgoc‐ticnezi muwec: “No moneŋ i motec‐nanere manasurâ bâtirihuc Wofuŋte biŋe râekopac. I ɋâŋ moc jâc â siliwazi baniŋte iŋuc ekopac. Iŋuc ehuc bârisie‐garekopac.” 4 Iŋuc mume moteczi moneŋ i neŋgoc‐ticne bârisiecnewec. Ehame neŋgoc‐ticnezi siliwa dâkâne 200 i rorâ ɋâŋ qâqâtâc bapa ŋic moc râcnewec. Eme eki ɋâŋ moc jâc â siliwazi bawec. Bafâreme Mikazi wiac i ficticnao heme ŋewec. 5 Ehame Mikare nemuɋâŋ ufuŋ moc ŋewec ira qoqonaŋ ŋaqi â metâ moc barâ râewec. Ehuc ŋokâfâcne jaŋeraonec moc taha bapa‐ticne erâ juocte mufiriewec. 6 Dameŋ ira Israe ŋic jaŋerao ŋicwofuŋ moc mi juwec. Irec ŋic jaŋe maŋjeŋiczi wiac manapie sâckewec sâc erambiŋ.
7 Eme Juda mâreŋko Betelehem hae ŋewec ira ŋic socɋâri moc Lewire guruoneczi Judaŋic jaha juwec. E hae ira jaba juwec. 8 Juku ŋic e Betelehem hae beherâ hae mâreŋ moc bâfuarâ juocte rawec. Rahuc juku Eferaim tiki mâreŋko Mikare haeo fisiwec. 9 Fisime Mikazi wiocnerâ muwec: “Go wenirec warekomec?” Eme eki dâŋ ʒiŋuc bâtikiecnewec: “No Lewire guruoneczi Betelehem haeo juekopac. Erâ no hae mâreŋ moc bâfuarâ ira jaba jupemurâ warekopac.” 10 Iŋuc mume Mikazi ʒiŋuc âzâcnewec: “Go nohec juhuc mamac enarerâ taha bapa‐nane juzemec. Erâ go nohec juhaŋtec jara sâc siliwa dâkâne 10, erâ ŋaqi qoruc â nânâ opâ sâcne bâfua‐garepemu. Iŋuc mume maname tarawec.” 11 Eme ŋic e Mikahec juocte maname sâckeme ŋokâfâc‐ticne jaŋere sâc erâ juwec. 12 Ehame Mikazi ŋic e hâcne taha bapa‐ticne erâ juocte mufirieme ficticnao juwec. 13 Iŋuc ecnerâ muwec: “Ʒi Lewire guruonec moczi taha bapa junarekacte Wofuŋzi ehâmo‐nareocmu hâcne.”