JOSUA
Josuare papia qâreŋkewec qâreŋŋic e Mose hâmome Josuazi Israe ŋicguru micne bajarehame Kanaaŋ mâreŋko raʒimbiŋ irec binaŋ bakacte papia ʒâŋene JOSUA mukicne. Papia qâreŋkewec ŋic ʒâŋene ine mi manaŋgopeneŋ. Josuazi Israe ŋic micne bajarewec dameŋ ira hâcne Wofuŋ Anuture mumupaŋ dâŋ fâri fideteŋnehec ewec. Anutu e juwicnao Israe ŋic mimiŋnefâc‐jeŋic jaŋe mâreŋ biŋe qajarewec i Josuazi micne bajarehuc juha ro rauc embiŋ hâcne. Eme papia ʒirec maŋnao weniŋuc erâ ro rauc embiŋ, â Josuazi weniŋuc erâ bâtâc bajarewec, erâ ŋeŋezic hae 6 bâwosâec‐jopambiŋ â Lewiŋic hae 48 jarembiŋ irec binaŋ sasawa qâreŋkekicne fokac. Eme Israe ŋic jaŋe dameŋ ira weniŋuc ehuc juhapie wiac ʒârâ ʒâpâne bocjaha fua‐jarewec, erâ ŋifec Anutuzi ŋezic‐jopahuc bafic‐jopawec irec dâŋ i mâmâc qâreŋkekicne fokac hâcne.
Josuare papia bâfâuckepene dâkâne jahec â moc fuakac.
Gaŋ 1—12. Izi dâkâ namba 1 ekac. Gaŋ wiac irec maŋnao Israe ŋic jaŋe Jordâŋ opâ fotâcnerâ Kanaaŋ mâreŋ rauckembiŋ irec binaŋ fokac.
Gaŋ 13—22. Izi dâkâ namba 2 ekac. Eme irec maŋnao binaŋ kecʒiŋuc forakac: Josuazi mâreŋ bâtâc bajareme Israe ŋic gurune gurune jaŋe ru sâc ro rauc embiŋ.
Gaŋ 23—24. Izi dâkâne namba 3 ekac. Eme irec maŋnao ine Josuazi Israe ŋic mâzoc‐jopahuc dâŋ gâcne jaza qâmoc ewec, â Sikem haeo tutumaŋ sâko fuawec irec dâŋ mecne, erâ Josua hâmoc‐ticnere binaŋ i mâmâc qâreŋkekicne fokac.
Josuare dâŋ fârine moc gaŋ 24:15 tataranao kecʒiŋuc fuame woseŋgopeneŋ: “No â wiacfâc‐nane nâŋe ine Wofuŋ kiŋaŋ qacnenaŋmu.”
1
Kanaaŋ mâreŋ roniŋte ʒawiembiŋ
1 Wofuŋte kiŋaŋŋic Mose e hâmohame Wofuŋzi Nuŋte ŋokâ Josua, Mose babafic‐ticne hâcne, e ʒiŋuc âzâcnewec: 2 “Kiŋaŋŋic‐nane Mose e hâmowec. Irec go â ŋic ŋokac sasawa ŋoŋe faharerâ Jordaŋ ocniŋucnao raʒiniŋ, mâreŋ i hâcne Israe ŋic ŋoŋe ŋarekopac. 3 Mâreŋ sasawa kike‐ŋeŋiczi âteniŋmu i Mose mupaŋkecnepo irec sâcko ŋarekopac hâcne. 4 Mâreŋ burocnaonec fuŋkerâ wareku Lebanoŋ mâreŋ ʒira fisirâ raku Eufrata opâ sâkoo mickekac, erâ wâc ʒoaŋ huhunao Hâwec Sâkoopec mâreŋ forakac, Hitiŋic jaŋere mâreŋ sasawa hâcne, i ŋoŋere efâreocmu. 5 Juju dameŋ fogareocmu sâc ŋic moczi sâcne mi bawahacguocmu. Mosehec jupo irec sâc jaha gohec jupemu. No behecgupe bekâ mâsiŋ moc mi ecmu. 6 Go sanaŋkerâ hâbige roc. No mimi ŋosafâc‐ŋeŋic mupaŋke‐jarehuc mâreŋ biŋe qajarepo i jarepe ro rauc eniŋte bâtâc bajarezemec. 7 Mocjaha, go sanaŋkerâ hâbihec ezemec. Â Mose kiŋaŋŋic‐nanezi mumupaŋ dâŋ râehuc mutâcne‐garewec irec sâc aimuŋ juhuc wiac ebac ezore manasuzemec, ehuc fâreopec me qanaopec moc mi qâsoriezemec. Iŋuc ehuc gie i me i batec fârine biaŋne fuaocmu. 8 Papia qizec ʒirec maŋnao sâcmutâc dâŋ fokac i gore micko hati fuahuc fozejec, â ʒoaŋko me ŋafeo irec manatâc qâtâc ezemec. Ehuc wiac sasawa qâreŋkekicne fokac irec sâcko jucmurâ manasuzemec. Go iŋuc ehuc jucmuo ine giege fârinehec eocmu. 9 Go sanaŋkerâ hâbige rocmurâ mi gazapo me? Irec hâwicgume maŋge mi gâckezejec. Wofuŋge Anutu no jucmu sâc gohec jupemu.”
10 Eme Josuazi ŋic ŋokac micnefâc‐jeŋic kecʒiŋuc mutâcne‐jarewec: 11 “Ŋoŋe teuŋ sâc fotâcnehuc ŋic ŋokac ʒiŋuc jazaniŋ: ‘Ŋoŋe nânâ‐ŋeŋic rike bâmoc efâreniŋ. Eme ʒoaŋ jahec â moc ehame Jordaŋ opâ ʒi fotâcnerâ Wofuŋ Anutu‐ŋeŋiczi mâreŋ ŋarekac i ro rauc eniŋte raʒinʒepieŋ.’ ”
12 Eme Rubeŋ â Gade jahere ɋâricfâc â Manasere ŋicguru dâkâne jaŋe mâmâc Josuazi ʒiŋuc jazawec: 13 “Wofuŋte kiŋaŋŋic Mose e dâŋ ʒiŋuc muhuc ŋaza qâmoc ewec irec manasunʒepieŋ: ‘Wofuŋ Anutu‐ŋeŋic e ŋoŋe jumananiŋte manahuc mâreŋ ʒi hâcne ŋarekac.’ 14 Mosezi Jordaŋ ʒiŋucnao mâreŋ ŋarewec forakac ira ŋokac naru motec â bulimakaofâc‐ŋeŋic jaŋe junʒepieŋ. Juhapie ŋic sanaŋne tâpirichec ŋoŋe ʒikare ʒawierâ opâ fotâcnerâ ŋifecnao qomâfâc‐ŋeŋic bânie‐jarehuc bafic‐jopanʒepieŋ. 15 Ŋoŋe iŋuc ehuc juhapie, Wofuŋzi ŋoŋe juju mana mâreŋ ŋarewec iŋuc jaha ɋomâfâc‐ŋeŋic jaŋe jareocmu. Eme jaŋe Wofuŋ Anutu‐ŋeŋiczi mâreŋ jareme ro rauc ehapie ŋoŋe wâc risierâ mâreŋ‐ŋeŋicko junʒepieŋ, Wofuŋte kiŋaŋŋic Mosezi Jordaŋ ʒiŋucpec ʒoaŋ wewefunao mâreŋ ŋarewec ira hâcne.” 16 Eme jaŋe Josua dâŋ ʒiŋuc bâtikiecnembiŋ: “Wiac sasawa mutâcne‐nârekomec i efârenaŋmu. Ehuc ira me ira sorec‐nâpotec ranaŋmu wâc. 17 Nâŋe Mose micticne reŋkehuc wiac sasawa mume ebac embeŋ irec sâc jaha gore mic reŋkenaŋmu. Mocjaha, Wofuŋ Anutugezi Mosehec juwec irec sâc jaha gohec juzejec. 18 Moc e wiac i me i ebac eocte mucnetec dâŋge qatarahuc sâcmutâcge râsi ecneocmu e hâmocko râezo. Go ine sasanaŋhec â hâbihec ezemec.”