MAKUC GAE
Papia irec maŋnao makuc gae 5 fokac. Gae wiac i mo ŋiczi hefuawec i mi mana sanaŋkehuc ʒiŋuc sawa manaŋgopeneŋ: Porofete Jeremiazi Babilonia ŋic jaŋe râsi fisirâ Judaŋic jopahuc Jerusalem hae hetâtierâ ŋic ŋokac ʒikare nâfocne bacjopa rapie hae sesucko mu mamakuc ehuc juwec. Â papia maŋnao Jerusalem hae heroc qâropiekicne irec busâqoc dâŋ bocjaha fokacte â dâŋ izi Jeremiare dâŋ hawari jaha ekacte ʒiŋuc mueŋgopeneŋ: Jeremia eki hâcne he qâreŋ ewec. Ʒâŋe‐ticne ine jâmbomac papia maŋnao basaŋgopeneŋ. Gae wiac i Judaŋic ʒâhec juwefumbiŋ jaŋe Jerusalem hae tâtiewec irec manasuhuc sowa juju hombaŋ‐jeŋicko hejumbieŋ â wose jumbieŋ.
Papia maŋnao makuc gae 5 fokac ine kecʒiŋuc:
Gae 1. Jerusalem hae e hozec iŋucne erâ ki busâqoc faio juhuc makuc bawec. E sesuctac fuarâ foha moczi moc irec busâqoc mi manacnewecte bâbâmiriŋte boc ecneha Anutu wira wâwâsic ecnewec.
Gae 2. Anutu e tiri kimbeŋ‐ticne Judaŋic â Jerusalem hae jaŋere faio hoŋkehuc okacne jareme juju‐jeŋic omaeme râsi jaŋe mu âke sisic ejarepie Wofuŋ mu wâwâsic ecneniŋte irec dâŋ fokac.
Gae 3. Anuture ŋicguru jaŋerao ʒâic busâqoc â aki anonoc mâmâc fuaekac irec dâŋ. Erâ maŋ bâbârisie â Wofuŋ mumuteŋke irec dâŋ i fokac wâc.
Gae 4. Judaŋic jaŋerao wiac buqâqânducnehec fuawec, â Jerusalem omatac fuawec irec makuc gae hâsine.
Gae 5. Kikefuŋ e Wofuŋzi buuruc‐ticnere erâ bafickeme Jerusalem hae mocwâc fuaocte Wofuŋ wira wâwâsic ecnekac.
1
Jerusalem hae sesuctacko makuc bakac
1 Jei, hae keci ŋic ŋokac jaŋe fusucmarâ ŋembiŋ
i weniŋuc erâ niniŋ siarereŋ fuawec fokac?
E mârâc jaha ŋicne ŋicne jaŋere ŋondeŋko kâcɋene ŋeweczi hozec iŋucne ewec,
â haene haene irec fekicne ŋeweczi kiŋaŋ qaqa ewec i!
2 E ŋafeo mâretec kiohuc juha
ʒâŋeuc‐ticne sâke qicmuŋnao wahahuc domakac.
Jorocfâc‐ticne sasawa jaŋeraonec moczi
mu bâmiriŋ moc mi ecneekac.
Âgofâc‐ticne jaŋe e furu jaha beherâ
râsifâc‐ticne embiŋ juŋgopieŋ.
3 Juda mâreŋ rune jaŋe ʒârâ ʒâpâ faio fehuc
kiŋaŋ qaqa erâ kâpâcwâruo rambiŋ;
erâ ŋicne ŋicne jaŋere ŋondeŋko hâhâŋkehuc jueŋgopieŋ,
eme fific guguriŋ faio juhapie fisi‐jarehuc jâpec‐jopaeŋgopieŋ.
4 Zioŋte hata i qoroc hewec fokac
i ŋic moczi moc hombaŋte erâ ira rac warec
mocwâc mi eeŋgopieŋ irec.
Hae sâkore motâc mimiŋ sasawa i ima bakicne mâc fokac;
ehame taha bapafâc‐ticne kio owa eŋgopieŋ
â naru ʒeŋoŋfâc‐ticne jaŋe busâqoc hawari domaŋgopieŋ;
hae e makuc bakac hâcne.
5 Kisâfâc‐ticne jaŋe pepec penaroŋ ehuc juŋgopieŋ,
râsifâc‐ticne jaŋe bubiaŋ manaŋgopieŋ,
i Wofuŋzi sâqocne‐ticne bocjahare erâ ʒârâ hâriŋ bâfuacnewecte;
naru motecfâc‐ticne jaŋe fific guguriŋfâc‐jeŋic
jaŋere maio kâpâcwâruo bacjopa rakicne.
6 Zioŋ otâ‐ticnere ʒâŋe rara biaŋ i omae‐fârewec.
Fekicnefâc‐ticne jaŋe kâte bulimakaozi
kecɋaŋ basaeŋgopieŋ irec sâc;
erâ jâpec‐jopaeŋgopieŋ jaŋere maio
docke betaŋ ehuc wiseeŋgopieŋ.
7 Jerusalem e juwicnaonecteaŋ wiac biaŋne focne warehuc juwec
irec fific guguriŋ â ʒârâ hâriŋ dameŋ‐ticnao manasuekac.
Ŋic ŋokacfâcne jaŋe kisâfâc‐ticne jaŋere meo ferâ
bafic basapie râsi jaŋe hone suŋgiŋ ecnehuc
sisipiric‐ticnere mu ruruc ecnembiŋ.
8 Jerusalem hae e sâqocne boc bawecte mamakâcne ewec;
eme mârâc jaha muac baafec ecnembiŋzi
miŋecgac qaisockeŋgopieŋ,
i biuctac‐ticne honembiŋte.
E jahacne ine kio uu ehuc ʒâŋe mai‐ticne bâsoŋkekac.
9 Ŋaqi‐ticne i wânâŋhec,
e ʒâhec wiac fuacneocmu irec mi manasuwec;
irec waha qawec i hâhâwicne jâmbâŋ,
ehame moczi moc mi bâmiriŋkeha ʒiŋuc mukac:
“O Wofuŋ, râsizi sanaŋkerâ ʒeri ekacte ʒârâ hâriŋ‐nane honec me!”
10 Râsizi boreŋ ʒeŋaŋ‐ticne rofâreocte mene sicnewec;
jâmbomac, ŋicne ŋicne jaŋe tiri ufuŋ‐ticnao
raʒipie honec‐jopawec,
i gore kikefuŋko mi ʒuhuckeniŋte
aka hejaremeŋ jaŋe hâcne.
11 Ŋecjucfâc‐ticne sasawa jaŋe kio huse ehuc nânâ basaŋgopieŋ;
ehuc hâmo sipiric enʒipiŋte boreŋ wiac furi sâko‐jeŋic nânâre râehuc ʒiŋuc mueŋgopieŋ:
“O Wofuŋ, go ʒâŋe fitec wahame honecnuzemec,
no qaisocnukicne hâcne!”
12 “Nowaruŋgopieŋ sasawa ŋoŋe wemocte busâqoc moc mi mana‐nareŋgopieŋ?
Ŋoŋe ʒâŋe fipie wareme honecnuniŋ!
Wofuŋzi kimbeŋ sâko‐ticnere dameŋko bâtiŋnume ʒâic fua‐nareme manakopac,
ʒâic iŋucne ŋoŋe moc manambiŋ me?
13 “E faickonec ʒocbâruŋ tuŋkeme waharâ siec‐naneo raʒiwec.
E kike‐nanere bitiŋ râewec,
eme izi kicnume rârâpe rândiŋkerâ waha qapo;
e ima bacnume dameŋ sâc huc ʒâicko fohuc juekopac hâcne.
14 “Qaqatara‐nane qâtureme tagi‐nane ewec;
e jahacne mezi basanaŋkewec;
erâ fai‐naneo râeme fokac.
Eki bâdocnume tâpiri‐nane weaŋkewec;
Wofuŋ e ŋic bâipiec‐jopaekopac jaŋere meo râecnuwec hâcne.
15 “Wofuŋ e qac momorifâc‐nane jumbiŋ
jaŋe qaisoc‐jopa‐fârewec;
eki hâcne ŋicmotecfâc‐nane sipiric‐jopaocte
râsi hetumaŋ‐jopame fisimbiŋ.
Wofuŋ e waiŋ hândâŋne âte pisickeeŋgopieŋ
irec sâc Judare otâ ʒeŋoŋ âte pisickewec.
16 “No irec hâcne kiohuc jukopac,
â ʒâŋeuc‐nane bocjaha wahahuc domakac.
Bâbâmiriŋ‐nane e maŋnane basanaŋkeocte
tâpiri focnekaczi taicko jukac;
naru motecfâc‐nane sipiric‐jopakicne,
râsizi sanaŋkewec hâcne.”
17 Zioŋ e meticne sicnekac,
mâc bâbâmiriŋ‐ticne ine moc mi jukac;
Wofuŋ e ŋic rârec rârec jaŋe Jakobo
râsi ecneniŋte mujarewec;
ehame Jerusalem e jaŋere ŋondeŋko wiac mamakâcne ewec.
18 “Wofuŋ e wiac enareme sâckewec,
no micdâŋ‐ticne qatarahuc jupo irec.
Ŋic gurune gurune ŋoŋe mananiŋ,
ehuc ʒâic manakopac i honeniŋ!
Ŋic ŋokac socɋârifâc‐nane jaŋe kâpâcwâruo bacjopa rakicne.
19 “No jorocfâc‐nane wira‐jarepo, jaŋe ine eatucnumbiŋ.
Taha bapafâc‐nane â soŋaŋfâc‐nane jaŋe juju‐jeŋic fuaocte
nânâ opâre babasa gie baku
mi haeo hâmo sipiric enʒepieŋ i!
20 “O Wofuŋ, go honecnuc,
no hâhâwic bakopac â bunane herickekac.
No maŋrâŋgeŋhec jupo,
irec maŋnaneo ʒâic serereŋ fuawec fokac.
Hae ʒoŋao ʒika, â ficmaŋko ine huc hâmoc,
wiac izi naru motecfâc‐nane rocjopakac.
21 “No ʒiŋuc kio huse epe manambiŋ: ‘No bâbâmiriŋ‐nane arictac!’
Kisâfâc‐nane jaŋe ʒârâ ʒâpâ‐nanere biŋe mana‐fârembiŋ,
erâ go gahac mutec fua‐narewec
irec bubiaŋ manambiŋ wâc.
Irec dameŋ moc bameŋ i gokizia mutec fuame
jaŋe nore sâc jaha enʒepieŋ.
22 “Eebapa‐jeŋic hehesicne sasawa i gore maio taniŋkezejec.
Eme qaqatara‐nane sasawa irec okacne bazu‐naremeŋ
iŋuc jaha jaŋe bazu‐jarezemec.
Huhuse‐nane i hâhâwicne eha bu heheric enarekac.”