MUQÂQIŊ DÂŊ
Papia irec maŋnao dâŋ qâreŋkekicne forakac i gâcne sâko Salomozi qâreŋkewec, â dâŋ gâcne bocjaha ine ŋic gâcne jaŋe ʒuhuckerâ qâreŋkembiŋ. Dâŋ qâreŋkekicne forakac izi Salomo â ŋic gâcne maŋɋârâŋ‐jeŋicte fuŋne bataniŋkekac. Papia maŋnao maŋɋârâŋ dâŋ bocjaha fokac hâcne. Erâ maŋɋârâŋte fuŋne ʒiŋuc mukicne: “Moc maŋɋârâŋhec juzo murâ Anutu araŋ bacnehuc juzejec.” Salomozi muqâqiŋ dâŋ buc buc mu qâreŋ ewec irec ʒare 3000, erâ i ʒira mi râe‐fârekicne. Erâ dâŋ mufârewec i mitiopec sawa mâcne, ŋic juju â eebapaopec mâmâc rakac.
Papia maŋnao dâŋ forakac i bâfâuckepene biri kâcɋene 5 fuakac, ine kecʒiŋuc:
Biri 1 i Muq 1—9.
Biri 2 i Muq 10—Muq 22:16.
Biri 3 i Muq 22:17—Muq 24.
Biri 4 i Muq 25—29.
Biri 5 i Muq 30—31.
Biri namba 1 irec maŋnao dâŋ forakac ine kecʒiŋuc: Mu qaqazuc â muqâmoc dâŋ sasawa, erâ i dâŋ ʒoʒoricne â oomane. Sasecte â sâqocnere uŋdâŋ, Anutarao qohotahuc maŋhuhuŋ juju, erâ e araŋ babacne â mai eecne irec muqâmoc â babaafec dâŋ hâcne.
Biri namba 2 irec maŋnao ine muqâqiŋ dâŋ fârine â biri ʒora fokac, muqâqiŋ dâŋ buc buc 376 fokac hâcne. Erâ i ŋic jaŋere juju â eebapa honehuc ira iticnerâ mu qâreŋ ekicne. Juju â eebapa kecʒiŋucte muqâqiŋ dâŋ fokac: Ŋic hesarac gie, naru motec mu bâtiŋ eejare, ŋowe ŋonâŋ jujuo ŋonâŋzi jume biaŋkeme ŋowenere eri biaŋ ee, nameŋte fuŋne â tâpiri, wiac sâcti qâtiri ee, ojoŋ jujure dâŋ, âbârâ ŋiczi gie sioc â eeatuc tâmiric bapa, erâ dâŋ wiac gâcne gâcne.
Biri namba 3 irec maŋnao dâŋ forakac i biri 2 ira dâŋ fokac irec âgone jaha. Erâ wâc waiŋ opâ âmbâŋ nânâ, â sasec gie â wiac hâhâwicne fuame sowine mumu irec uŋdâŋ.
Biri namba 4 i Hisikiazi ŋicwofuŋ juhame mu qâreŋ ekicne. Erâ dâŋ forakac irec qizecne ʒiŋuc fokac: Ʒoaŋne wiac ebac eeŋgopeneŋ irec muqâmoc â babaafec dâŋ.
Biri namba 5 ira ŋic moc ʒâŋene Aguru ere muqâqiŋ dâŋ gâcne fokac, erâ ŋokac moczi ŋokâ‐ticne ŋicwofuŋ Masa e uŋsawaŋ â muqâmoc dâŋ ecnekac. Tataranao ine ŋokac moczi ŋowe‐ticnehec jume biaŋkeocmu irec mumuteŋ dâŋ bâfuaŋgopeneŋ.
1
Muqâqiŋ dâŋ i maŋɋârâŋhec jujure dâŋ fâri hândâŋne moc
Dawidire ŋokâ Salomo, Israe ŋicwofuŋ hâcne, ere muqâqiŋ dâŋ sasawa ʒi.
Muqâqiŋ dâŋ ʒizi maŋɋârâŋ â mumutâc dâŋ biaŋne hone mana tarac enaŋte â dâŋ qame hukicne wâc mana taranaŋte bafic‐nâpoocmu. Dâŋ izi hâcne weniŋuc erâ mamanahec juzo â siocmâc tiŋne â biaŋne juju irec fuŋne sâcne qazu‐nâreocmu. Ehuc ŋic babititicne jaŋe jujure fuŋne jaza mutâc eha maŋfârihec eniŋmu â ŋic socɋâri jaŋe wâc mamana â maŋɋârâŋ qazu‐jareocmu. Ehame maŋɋârâŋhec jaŋe dâŋ ʒi wose manac epie mamana‐jeŋic fua ɋârâŋkeocmu â maŋfânâŋhec jaŋe wâc bafic‐jopahuc juju hata biaŋnao jowa qataŋ ejareocmu. Ehame muqâqiŋ dâŋte fuŋne â ŋic maŋɋârâŋhec jaŋere dâŋ herâricne â suŋsuŋne i sâcne mana taraniŋmu.
Ŋic socɋâri jaŋere uŋsawaŋ dâŋ
Wofuŋ araŋ babacne izi maŋɋârâŋte hata fufuŋkene ekac. Ŋic mutuc matacne jaŋe maŋɋârâŋ dâŋte manapie wawahane eha mananiŋte takic‐jopaekac.
Motec‐mae, go mamacgezi dâŋ gaza qazuc eekac i manazemec, â neŋgocgezi dâŋ muekac irec hazec wâc râezemec. Iŋuc ehuc jahere dâŋte manatec qizecgere eridu â upegere qoqonaŋ ezejec. 10 Motec‐mae, go ŋic sindaŋne jaŋe esâicgupie mi docke‐jarezemec. 11 Jaŋe ʒiŋuc mecne gazaniŋmu: “Ajoc, go waretec ra ŋic maŋhumuc e me e bâfuarâ qâhâmonaŋ. Nâŋâc ŋic biaŋne fuŋne tâmiric mâc qâhâmonʒepeneŋ. 12 Jaŋe biaŋne â ɋiɋicne juhapie bâfuac‐joparâ jopapene hâmorâ foranʒepieŋ. 13 Ehame moneŋ mafa wiac‐jeŋic fuŋne fuŋne bâfuarâ ficnâŋecko râe guruc epene fusucmazejec. 14 Irec ware qâtec‐nâpoc, eme wiac fiuc ronaŋmu sâc bâtâc banʒepeneŋ.”
15 Motec‐mae, go ŋic iŋucne jaŋehec mi juhuc dic bajarezemec. 16 Jaŋe wiac hehesicne eniŋte ʒoɋac erâ ʒikare goŋgoricne heeŋgopieŋ. 17 Jaŋe ʒoaŋko wipe jaŋe honec‐jopahapie ufic fârepie mi jowaniŋmu. 18 Ŋic iŋucne jaŋe burec ehuc jaŋe jaŋacne bitiŋ râepie kicjopaocmu. 19 Ŋic ʒika qahuc wiac fiuc roniŋmu jaŋe ʒikare biŋe jaha eniŋmu, fiuc roro jaŋe iŋuc hâcne fua‐jareocmu.
Maŋɋârâŋhec jujure fânoc hehe dâŋ
20 Manaŋgopieŋ, maŋɋârâŋzi ŋic baafec‐jopaekac jaŋe hata upeo me hae ʒoŋao maŋɋârâŋ dâŋ mueŋgopieŋ. 21 Erâ haesac motâcko â ŋic tutumaŋko maŋɋârâŋ dâŋ musokaeŋgopieŋ wâc.
22 O ŋic mutuc matacne! Ŋoŋe mutuc‐ŋeŋic i mo dameŋko moc omaeocmu? Me mamana sâkore mu âke sisic ehuc mamana qiqikiŋ i wezimucko moc beheniŋmu? 23 Ŋic maŋɋârâŋhec jaŋe mu bâtiŋ eŋarepie dâŋjeŋic mananʒepieŋ, jaŋe hâcne uŋ sawaŋ biaŋne eŋarehuc ŋoŋe wâc mamanahec eniŋte dâŋ ŋazaeŋgopieŋ. 24 Jaŋe wira hefârec eŋarembiŋ, ehame ŋoŋe ine dâŋjeŋicte hazec mi râembiŋ, â mejeŋic sicne‐ŋarepie mi rombiŋ. 25 Ŋoŋe uŋsawaŋ dâŋjeŋic qâsuahuc mu bâtiŋ eŋarezo mupie takic‐ŋopame qikiŋnembiŋ. 26 Irec sisipiric fua‐ŋareme honec‐ŋoparâ gâwie‐ŋareniŋmu, â wiac hâhâwicnezi fai‐ŋeŋicko feme mu âke sisic eŋareniŋmu wâc. 27 Wiac izi mâŋâŋ ɋicwânʒâŋnehec iŋucne fisi‐ŋarehuc ʒâic fâro â ʒârâ hâriŋ bâfua‐ŋareme iŋuc hâcne eŋareniŋmu. 28 Iŋuc fua‐ŋareme maŋɋârâŋte wira wâwâsic epie arictac eocmu. Ehuc ira me ira maŋɋârâŋ bâfuaniŋte basa‐bipieniŋmu hâcne. 29 Ŋoŋe dameŋ sâc maŋɋârâŋte manapie wiac wawahane eha Wofuŋ araŋ bacneniŋte takic‐ŋopame qikiŋnembiŋ. 30 Ŋoŋe uŋsawaŋ dâŋjeŋicte moc mi eŋareha mu bâtiŋ eŋarezo mupie râŋgeŋkembiŋ. 31 Irec ŋoŋe juju bapa‐ŋeŋicte fârine rohapie wiac ebac embiŋ irec okacne fisi‐ŋareocmu hâcne. 32 Ŋic mamana tâmiric jaŋe maŋɋârâŋ dâŋ qikiŋneeŋgopieŋte hâmoniŋmu, â ŋic mutuc matacne jaŋe manabâc tâmiric kosa jueŋgopieŋte sipirickeniŋmu. 33 Maŋɋârâŋ dâŋ mana maŋ eocmu ŋic eki ine hâhâwic tâmiric wama faio juhâc qâhâmoocmu.