91
Femicne ere mumucko juju
1 Moc e Femicne sâkore sâsâocko juekac,
â Bapafâre ere mumucko ŋec foc eekac,
2 e Wofuŋ ʒiŋuc âzâcneocmu: “Qânâuŋ‐nane â huec‐nane,
Anutu‐nane, no gorao roweckekopac.”
3 Eki wosaŋeŋ bapare bitiŋkonec bataracguocmu,
â huc sâqocnezi rocguzacte ŋezicguocmu.
4 E suhuc‐ticnezi bâsoŋguocmu,
â fakec rurumaŋ‐ticnao sâsâoc bâfuaocmu;
jauŋ fâri‐ticnezi maro maruku egarekac.
5 Go ŋafeo sisipiric wiacte mi hâwicguocmu,
â ʒoaŋko tepe motec fisiekac irec mi mezacguocmu.
6 Ŋafere huc hâmocte mi gâgâmârâcmu,
â ʒoaŋko ima fuaekac irec manabâc mi ecmu.
7 Gâjoŋgao ŋic wâŋ tauseŋ farazo murâ faraniŋ,
mefâregao teŋ tauseŋ hâmozo murâ hâmoniŋ,
ehame sifu sisipiriczi go mi rocguocmu.
8 Go ʒâŋezi sawa firâ honehaŋtec,
ŋic sindaŋne jaŋe okacne roniŋmu.
9 Go Wofuŋzi huecge eocte bâwosâemeŋte,
â Femicne sâkozi hae sanaŋge eocte sakaremeŋte,
10 sisipiricte wiac moczi mi bâfuacguocmu,
â ʒârâ ʒâpâ moczi ficbozege mi bâqiŋkeocmu.
11 E aŋelofâc‐ticne mutâcne‐jareme,
hata jucmu sâc hone soŋaŋ egareniŋmu.
12 Jaŋe mefaio bahucgupie
qânâzi kikege moc mi hezejec.
13 Go laioŋ faio â qotâ faio âtecmu,
ehuc laioŋ motec â homa âtemac‐jofacmu.
14 “E norao qohotakacte no e ŋezickepemu;
e ʒâŋe‐nane manakacte no e sâockepemu.
15 E wira‐nareme no micnao ropemu,
ʒârâ ʒâpâ fuacneme no e qâtepemu,
â sisipirickonec batarahuc ʒâŋe biŋe bâfuacnepemu.
16 No juju‐ticne bâʒoracnepe juku gapeckezejec,
erâ bâbâpiaŋ‐nane jâutupe honezejec.”