1 Eme no šâŋe firâ honepo, Lama eki papia sâfâ 7 fowec ine moc bâhockewec. Bâhockeme wiac jujune 4 jaŋeraonec moc e ɋuŋ parandaŋ maracko wirahuc muwec: “Warec.” 2 Mume mi becâsic qaŋqaŋ moc wareme honezepac i¡ Fainao ŋic moc ŋewec e tepe-ticnehec, eme e eri qoqonaŋ râcnepie momori erâ wiac qamase rahuc juwec.

3 Eme Lamazi sâfâ namba 2 bâhockeme wiac jujune namba 2-zi wirahuc muwec, “Warec!” 4 Mume becâsic bâbâroŋ fuawec. Fainao ŋic ŋewec e mâreŋko wama bârârieme ŋic jaŋe qâqâmiziec eniŋte tâpiri râcnekicne. Erâ šika sâko mâmâc râcnekicne.

5 Eme Lamazi sâfâ namba 3 bâhockeme wiac jujune namba 3-zi wirahuc muwec, “Warec!” Eme no šâŋe firâ honehape mi becâsic gâgâpâc warezejec i¡ Ŋic fainao ŋewec e sigeli baŋewec. 6 Eme no wiac jujune jaŋere ŋondeŋko ŋicmarac tinac fuarâ šiŋuc mume manapo: “Padi tase 2 furine 1 kina â jacgoŋ 12 iŋuc jaha furine 1 kina. Erâ saŋ hâmeŋ fâric ine akicketec fuazejec.”

7 Eme Lamazi sâfâ namba 4 bâhockeme wiac jujune namba 4-zi wiwirao muwec, “Warec!” 8 Eme šâŋe firâ honehape mi becâsic moc sahacne gowaekicne warezejec i¡ Ŋic fainao ŋewec šâŋene hâmoc. Erâ hârâckoneczi bâjâpembiŋ. Eme mâreŋko rukec jahec â moc mâc fohame moc ira mume šikazi â roroczi â huc mimicnezi â kâte qowi momorizi ŋic sipiric-jopaniŋte tâpiri râe-jarekicne.

9 Eme Lamazi sâfâ namba 5 bâhockewec. Ehame ŋic Anuture dâŋ bajuhuc biŋe-ticne mutaniŋkepie jopakicne jaŋere maŋ qâqâtâc alata maŋfuŋko fopie honec-jopapo. 10 Jaŋe dâŋ wiwic jaha wirahuc šiŋuc mumbiŋ: “Tiri â mume sasanaŋ Wofuŋ, go wemocte okac dameŋ bâšorahuc socnâŋecte kiŋ ŋic mâreŋko juŋgopieŋ jaŋerao mi batarakic?” 11 Iŋuc mupie ŋaqi qaŋqaŋ ru sâc jare-fârerâ šiŋuc jazambiŋ: “Kiŋaŋ qaqa âgofâc-ŋeŋic gâcne iŋuc jaha jopa qâhâmoc ejarepie šare-jeŋic qosackeocte woŋec piticne junšepieŋ.”

12 Eme wiac šiŋuc honepo: Lama e sâfâ namba 6 bâhockeme homeŋ sâko bawec. Ehame šoaŋ gâpârerâ kuši sahacne iŋucne ewec, â mosa e soc iŋucne ewec. 13 Á bâpiŋ jaŋe mâŋâŋzi nemuja qâmârâŋkeme wahaekac, iŋuc sambâŋkonec mârâŋkerâ wahambiŋ. 14 Á sambâŋ e ine papia bataforieeŋgopeneŋ iŋuc foforierâ sirowewec. Á tiki â nuc jaŋe.ŋeŋe-jeŋic behembiŋ. 15 Wiac iŋucne fuame mâreŋ sâc ŋicwofuŋ â ŋicbomboŋ, erâ momori micnefâc-jeŋic â mafa mâririhec â tâpirihec, ŋic fekicne â wahakicne mâmâc sasawa mâreŋ â qânâ hawecko soŋkerâ tiki â hârâc wâsic-jopahuc šiŋuc mumbiŋ: 16 “Waharâ ŋemac-nâporâ bârârâŋ-nâpopie eri ŋeŋeo ŋekac ere šâŋeo mi henšepeneŋ â Lamare kimbeŋ mi honenšepeneŋ. 17 Kimbeŋ-jeŋicte dameŋ sâko maickekacte ŋic mozi moc juocmu?”