RUTI
Mumutara ŋic jaŋere papia tataranao Israe ŋic jaŋere juju â eebapa sifuc safeckewec, iŋuc honeŋgopeneŋ. Mâc dameŋ ira jaŋerao wiac biaŋne gâcne fuawec wâc, irec binaŋ i RUTIre papiao banârekicne. Papia izi Anuture fuŋne kecʒiŋuc nâzâ nâwotuc ekac hâcne: E naru motecfâc‐ticne dameŋ biaŋnao mecne, sâqocnao mecne mâmâc ehâmo‐jareekac. Eki hâcne bâbâpiaŋ‐nâŋec fuaocte manasuhuc, â irec hata baʒawieocte Ruti Moabi mâreŋkonec Kanaaŋ mâreŋko jowa fisiwec. Ehuc Ruti e qâpuc ŋokaczi Israe ŋic jaŋere Anutu araŋ bacnehuc juhame manacneme sâckeha jambuŋkewec. Iŋuc ecneme Ruti e Dawidire kikefuŋ irec neŋgoc fuŋfuŋ ewec hâcne. Eme bâbâpiaŋ‐nâŋec Jesu Kristo e juku ʒâhec Dawidire kikefuŋkonec fuawec.
Papia bembeŋne irec maŋnao dâŋ forakac ine kecʒiŋuc:
Gaŋ 1:1–6. Mumuʒâwe dâŋ. Judaŋic moc ʒâŋene Elimelec e Juda mâreŋko roroc sâko fuame ŋonâŋ ŋokâfâcne jaŋehec Betelehem hae‐jeŋic beherâ Moabi mâreŋko ra jumbiŋ. Eme ʒâhec mamaczi hâmome ŋokâ jahec‐ticne jahe Moabi ŋokac ŋonâŋ‐jekic rocjofapic. Erâ dameŋ mi ʒoraha hâmopire neŋgoc‐jekiczi mocwâc mame sâko hae‐ticnao risieocte muwec.
Gaŋ 1:7–22. Ira ine Naomi e joŋao jahec‐ticne Moabi mâreŋ‐jekicko ŋenicte ʒoɋac ejacteha moczi ŋewec â Ruti eki ine joŋao‐ticnehec Kanaaŋ mâreŋko raocte ʒoɋac eme rapic.
Gaŋ 2. Irec maŋnao ine Ruti juju â eebapa‐ticnere fuŋne mu qâreŋ ekicne. E jume biaŋkeme Judaŋic moc ʒâŋene Boasi e ere ecnewec.
Gaŋ 3. Ira Ruti e Boasire gieficko ferâ juju‐ticnere wiocnerâ dâŋ okacnere woŋec juwec irec dâŋ fokac.
Gaŋ 4. Ira ine Ruti dâŋticne Judaŋic jaŋere sâcmutâc dâŋte sâcko mutarapie Boasizi ŋonâŋ‐ticne rowec irec binaŋ bakicne. Eme Ruti e motec kiweckerâ rowec ere ʒâŋe Obede mumbiŋ. Obede eki ine Dawidire ŋosa.
1
Ruti â Naomi jahere binaŋ
1 Mumutara ŋic jaŋe soŋaŋ gie bambiŋ dameŋ ira Juda mâreŋko roroc fuarâ fowec. Ehame Betelehem hae Juda mâreŋko ŋewec irecnec ŋic moc e Moabi mâreŋko jaba juocte ŋonâŋ‐ticne â ŋokâ jahec‐ticne mâmâc rambiŋ. 2 Ŋic ʒâŋe‐ticne Elimelec â ŋonâŋ‐ticnere ʒâŋe Naomi, erâ ŋokâ jahec‐ticne jahere ʒâŋe ine Maloŋ â Kilioŋ. Jaŋe Efarata ŋic, Betelehem hae Juda mâreŋko ŋewec irecnec. Jaŋe Moabi mâreŋko raʒirâ ira jusanaŋkembiŋ. 3 Juku ine Naomi ŋowe‐ticne Elimeleczi hâmowec. Ehame Naomi e ŋokâ jahec‐ticne jahehec buc juwec. 4 Eme motec jahe Moabi ŋokac ŋonâŋ jahec‐jekic rocjofapic. Eme ŋokac moc ere ʒâŋe Orapa â moc ere ʒâŋe ine Ruti. Jaŋe mâreŋ ira hâcne juhapie jara 10 wiac tarawec. 5 Tarame Maloŋ â Kilioŋ jahe iŋuc jaha hâmopic. Irec ŋokac e ŋokâ jahec‐ticne â ŋowe‐ticne mâmâc hâmopie buc mac juwec.
6 Eme juku Wofuŋ e ŋicfâc‐ticne mai ejarehuc mâriri bâfua‐jareme Naomizi biŋe manarâ joŋao jahec‐ticne jahehec Moabi mâreŋkonec risieniŋte ʒawiembiŋ. 7 Ehuc joŋao jahec‐ticne jahehec mâreŋ jumbiŋ i beherâ Juda mâreŋko risie rambiŋ. 8 Ehuc hatao Naomizi joŋao jahec‐ticne ʒiŋuc jasawec: “Neŋgoc jahec‐ŋekic jaherao risienic. Eme hâmombiŋ â no jauŋ bacnâpopic sâc ijaha Wofuŋzi ehâmo‐ŋactezejec. 9 Wofuŋzi maname sâckeme ŋowe jahec‐ŋekic ɋâricne mocwâc bâfuac‐jofapire wamao junʒepieŋ.” Iŋuc muhuc muduc‐jofame mâretec kiopic. 10 Kiohuc ʒiŋuc mupic: “Aricne, nâhe gohec mâmâc wiacfâcge jaŋerao ranaŋmu.” 11 Eme Naomizi muwec: “Risienic joŋao jahec‐mae, wemocte nohec mâmâc ranaŋmu? Norao wemocko motec mocwâc fuarâ sokapire ŋohe rocjofanicmu. 12 Joŋao jahec‐nane, ŋohe risierâ ranic. No ŋokac raŋɋazi wemocko ŋic mocwâc ropemu. Me wemocko ʒiŋuc muzapo: Sifu eene mecne ekac. Erâ miŋecgac jaha ŋic moc rope motec fuapire muzac 13 ŋohe jahe sokanicte woŋec sâcne juzapic? Joŋao jahec‐nane, iŋuc aricne, Wofuŋzi bawahacnukacte nore tagizi boc kidapec‐ŋofaocmu.” 14 Iŋuc mume jahe ʒuhuckerâ mâretec kiopic. Eme Orapazi joŋao‐ticne muduckerâ mâzockewec â Ruti e ine erao qohota sanaŋkewec.
15 Iŋuc eme Naomizi Ruti ʒiŋuc âzâcnewec: “Manakic, borâge e wiacfâcne â nemufâc‐ticne jaŋerao mocwâc risiekac. Irec go wâc risierâ borâge bâjâpec.” 16 Eme Rutizi muwec: “Behecgurâ risiepemurâ ʒoɋac boc mi enarec. Go ira me ira racmu no ijaha bâjâpecgupemu, goki jucmu no ijaha jupemu, gore âgofâc jaŋe nore âgofâc jaha, gore Anutu i nore Anutu jaha wâc. 17 Irec go juku hâmocmu no ijaha hâmopemu, eme ijaha wâc ducnunʒepieŋ. Hâmoczi sawa bârâwiŋ‐nâfozejec, i Wofuŋ Anutu ere maio mujomirekopac.” 18 E iŋuc muhuc mâmâc ranicte mupaŋkewecte Naomizi mocwâc mi fotariecnewec.
19 Eme jahe mâmâc jaha rahuc juku Betelehem haeo fisipic. Fisipire hae rune jaŋe honec‐jofarâ bujeŋic fahareme ŋokac jaŋe mumbiŋ, “Hâc, e Naomi me?” 20 Eki ine ʒiŋuc jazawec: “Nore ʒâŋe Naomi i beherâ Mara munareniŋ. Bapafâre e wiac hâhâtâne bocjaha bâfua‐narewec hâcne. 21 No mâririhec rapo, eme Wofuŋzi hapetac bârisiecnukac. Wofuŋ bapafârezi fific guguriŋ â busâqoc fuŋne fuŋne bâfua‐narewec. Irec wemocte nore ʒâŋe mocwâc Naomi muniŋmu?”
22 Eme padi ɋa roro dameŋ maickeme Naomi â joŋao‐ticne Ruti, Moabi ŋokac hâcne, jahe Moabi mâreŋkonec Betelehem haeo fisipic.