6
1 O ŋokac hawari biaŋ mocjaha,
joroc biaŋge e wena rawec?
Joroc biaŋge e hata wenimoira rawec
i nâzâtec baficguhuc basanʒepeneŋ.
2 Joroc biaŋ‐nane e ʒariŋ gie‐ticnao ʒineŋjâc domakacko ira hurâ rawec,
e ira rac warec ehuc aŋac manaocte â ʒariŋ âsu biaŋ ro qâzuc eocte iŋuc ewec.
3 No joroc biaŋ‐nanere biŋe, â joroc biaŋ‐nane e nore biŋe,
e lamafâc‐ticne ʒariŋ ŋondeŋko soŋaŋ‐jopaekac hâcne.
Ŋic e ŋokac biŋe‐ticne mumbiaŋkekac
4 O joroc biaŋ‐nane, go Tiriza hae biaŋne irec sâc jaha,
â Jerusalem hae aŋac baŋacne iŋucne,
ehuc ŋifec ine momori ŋic jaŋere manapene
hâhâwicne eekac irec sâc wâc ekomec.
5 Ʒâŋe jahecgezi maŋ bâsifuc enarekopirecte
boc mi honecnuzemec.
Qizec susucge ʒoricne i noniŋ jaŋe Gileade heâŋkonec
kiwae raʒic wefuc ehuc wahaeŋgopieŋ irec sâc ekac.
6 Micsiecge i lama neŋgocne jaŋe opâ ruarâ wefueŋgopieŋ
irec sâc qaŋqaŋ jâmbâŋ ekac.
Jaŋe motecfâc‐jeŋic funʒuŋ fâri sasawa,
motec tâmiric moc mi jueŋgopieŋ.
7 Mauc jahecge ŋifec â ŋifec i rurufa maŋnao
bojazaŋ iŋucne bâruŋkerâ fokac.
8 Ŋokac fekicne 60 â ŋokac mamare 80
erâ naru ŋokac wowosec‐jopane tâmiric iŋuc juŋgopieŋ.
9 Ehame ine joroc biaŋ‐nane mocjahazi sawa âgo biaŋ‐nane jukac,
e neŋgoc‐ticnere otâ mocsâkoazi neŋgoc roro‐ticne araŋ bacnehuc juekac.
Naru ŋokac gâcne jaŋe e honerâ mu ʒeri ecneeŋgopieŋ,
erâ ŋokac fekicne â ŋokac mamare jaŋe iŋuc jaha ehuc mumbiaŋkeeŋgopieŋ.
10 “Furic tatamac â mosa ʒoaŋ erâ bâpiŋ jaŋere
tatamacte sâc jaha tamaekac e mo?”
11 No wâneŋko wiac ârinehec fuaekac
i hone aŋac epemurâ kaŋa gieo hupac.
Erâ wâc waiŋzi biac fiekac â bojazaŋzi âri qakac me mâcne
i mâmâc honepemurâ ira hupac hâcne.
12 Eme mamanasu‐nanezi ututuŋ jaha jowacnu rarâ
joroc biaŋ‐nanezi keretacko ŋewec ira râecnuwec.
13 O Sulam naru ŋokac,
go foforisietec hone warec egarenaŋ!
Hâc, ŋoŋe Sulam naru ŋokaczi
gae wowo ŋic jaŋere ŋondeŋko gae wohuc rac warec eha
wemo wiac mo honeniŋmu?