1 Go dâŋ heɋâre-jarehuc jazatec ŋic jaŋe kia gawamaî â fekicne araŋ bajarehuc dâŋjeŋic reŋkenšepieŋ, erâ gie biaŋne fuŋne fuŋne fokac irec afeckerâ banšepieŋ. 2 Erâ mumusoriŋ â dâŋ mumuc mi enšepieŋ. Aricne, wamane juhuc ŋic maŋuruc ejare-fârenšepieŋ. 3 Nâŋâc mârâc jaha iŋuc jaha maŋmutuc erâ râŋgeŋne juhuc qac qâsoric ejumbeneŋ. Erâ sasec fuŋne fuŋne irec kiŋaŋ qahuc sindaŋ â iiŋguuŋ bâfuarâ mamakâcne erâ kikisuec ejumbeneŋ. 4 Izi šâhec ine bâbâpiaŋ-nâŋec Anutu uruc jauŋ â buafec-ticne fua tâcneme 5 eki nâŋâc tiŋne juhuc gie moc bambeŋte mâcne, buuruc-ticnere erâ juju ɋârire opâzi â Tiri Mâroraonec fufua ɋâricnezi bâpiaŋ-nâpowec. 6 E bâbâpiaŋ-nâŋec Jesu Kristore erâ Tiri Mâro afecne mi qoŋgiŋke-nârewec. 7 I nâŋâc Kristore aki anonocte erâ kiŋnâŋec fâsâeme juju sanaŋte mamanac juku rauckenaŋte iŋuc enârewec.

8 Dâŋ i jâmbomac, eme go ɋicwânšâŋ erâ âkendâŋnetec Anutu manasiŋkeeŋgopieŋzi eehâmo gie baniŋte šoɋac enšepieŋ. I wiac biaŋne, i epie ŋic jauŋ bacjopaocmu. 9 Á mugufuc dâŋ jawane â fuŋne qaqa dâŋbiri â sâcmutâc dâŋte mu qaqatarac â bac bârisic ine geŋkezemec. I wiac racne â fârimâc. 10 Ŋic hâme âkefâucne moc uŋdâŋ mocjaha me jajahec âzâcnetecne qikiŋneme behetec buc juzejec. 11 Go manakic, ŋic iŋucne e qaqaharicne, maŋnezi mumu hehec ecne-bipieha sâqocne baekac.

12 No Atema me Tikiko sorepe gorao fâ fisime biac Nikopoli haeo ware bâfuacnuzemec, no hae ira hâcne hoemaŋko juzo mukopac. 13 Sâcmutâc mamana ŋic Ʒena â Apolo jahe miti kiŋaŋ ranicte nânâ mafa wiac bâmocke-jactetec wiac mi basahuc bititiezepirec. 14 Ŋicfâc-nâŋec jaŋe wâc eehâmo gie baku maŋjeŋic ezejec, eme sahacte dope babasa fuaocmu sâc jauŋ gie bapie miti-jeŋiczi fârinehec ezejec. 15 Ŋic nohec jueŋgopieŋ jaŋe sasawa go manasu-gareŋgopieŋ. Mitio âgo enâreeŋgopieŋ jaŋe manasu-jareŋgopeneŋ irec wâc jazazemec. Aki anonoczi sâcŋopa-fârezejec.