ƷEKARIA
Ʒekaria e Hagaire âgo. Jahe dameŋ ijaha juhuc gie‐jekic bapic. Ine Judaŋic jaŋe Babilonia mâreŋkonec Jerusalem hae sesucko risierâ hae heɋârehuc taha ufuŋ bambiŋ dameŋ ira hâcne. Jahe Jerusalem haeo juhuc porofete gie babaficko bapic. Ehuc Wofuŋtaonec dâŋ fua‐jacteme sâc ŋic ŋokac mufua‐jarehuc maŋjeŋic baafeckepic. Eme kikefuŋzi Wofuŋ manasiŋkehuc ʒoɋac â sasanaŋ bâfuarâ gie‐jeŋic aijakic bambiŋ.
Ʒekaria e taha bapa jaŋere guruonec, mamac‐ticnere ʒâŋe Berekia. Wofuŋtaonec dâŋ i jara 520–518 B. C. dameŋ ŋondeŋ ira fuacnewec. Mâc gie‐ticne i dameŋ ŋondeŋ ira sawa mi mecne bawec. Ʒekaria e Hagaizi Israe ŋic jaŋere bahac honewec ijaha honewec, ine kecʒiŋuc: Jerusalem hae rune jaŋe taha ufuŋ heɋârehuc baniŋte ʒoɋac sâko mi embiŋ, izi bâbâpiaŋ fifisire aka hewec. Eme irec hâcne taha ufuŋ i ʒoɋac erâ baniŋte bufahac dâŋ jazame giere ʒoɋac â sasanaŋ bâfuarâ ufuŋ‐jeŋic bâpiaŋkerâ baku bâzickembiŋ. Jaŋe sâqocne qikiŋnerâ Anutu weniŋuc ehuc mai ecnerâ kiŋaŋ qacnepie sâckeocmu irec dâŋ musoka‐jarewec wâc. Ehuc Anuture fuŋne i kecʒiŋuc mutaniŋkewec: Anutu e sambâŋ â mâreŋ â ŋic erâ wiac sasawa fuŋnaonecteaŋ fowefuwec irec Wofuŋ â guriŋ bapa. E hâcne sâqocne bapa okacne bazu‐jareekac â ŋicfâc‐ticne jaŋe ine âgo ejarehuc ŋondeŋ‐jeŋicko juocte muekac.
Ʒekaria dâŋticne i dâŋ fârine jaha, erâ sifu porofete gâcne sâko dameŋ juwicnao dâŋ mu qâreŋ embiŋ irec sâc jâmbâŋ mi ekac. E â porofete âgofâcne gâcne jaŋe ʒiŋuc manahuc dâŋjeŋic mu qâreŋ embiŋ: Mesia fisiocmu i ine Judaŋic jaŋere buc fisirâ Wofuŋ ejareocmu.
Papia bâfâuckepene dâkâne jajahec fuakac. Moc i gaŋ 1–8 â moc i gaŋ 9–14. Erâ honepene ʒiŋuc tinac ekac: Dâkâne 1 maŋnao dâŋ forakac i Ʒekaria ere porofete dâŋ sasawa, erâ i dâŋ soŋne titinac, mocwâc mi mana‐hâmoŋgopeneŋ. Â gaŋ 9–14 ira dâŋ qâreŋkekicne forakac i Ʒekariazi mâcne, ŋic moczi me ŋic gâcne jaŋe ʒâhec juhuc ʒuhuckerâ mu qâreŋ embiŋ.
Gaŋ 9:9 ira juku Mesiazi fuarâ weniŋuc ehuc Jerusalem haeo feocmu, irec findaŋdâŋ qâreŋkekicne. Eme aposolo Jesure binaŋ qâreŋkembiŋ jaŋe ira iticnehuc “Jesu e Jerusalem haeo fewec” irec binaŋ qâreŋkembiŋ hâcne.
Dâkâne 1:
Gaŋ 1:1–6. Ira mumuʒâwe dâŋ â mâŋ bâbârisiere muqâmoc dâŋ fokac.
Gaŋ 1:7—6:15. Ira porofete e maŋʒâŋe‐ticne ŋerisieme hawari wiac 8 honewec irec dâŋ mecne, erâ Jerusalem haeonec micne bapa sâko Serubabe giere mufiriekicne irec binaŋ i mâmâc qâreŋkekicne fokac.
Gaŋ 7—8. Ira ine sowa jujure dâŋ gâcne qâreŋke rakicne.
Hawari 1. Anuture maio becâsic 4 fuambiŋ, i Anutuzi Zioŋ hae maŋjauŋ ecnehuc qâpuc jaŋe aaric mana‐jareocte ʒoɋac ewec irec sâsâc.
Hawari 2. Qowi ʒuŋene 4 â aeŋzi wiac bapa 4 izi Israe â Judaŋic râsifâc‐jeŋic jaŋere tâpiri irec sâsâc, erâ Anuturaonec okacne fisi‐jareocmu irec findaŋdâŋ.
Hawari 3. Ŋic moczi mucsâc bajuwec, izi Jerusalem hae sâcticne weniŋuc fuaocmu irec sâsâc.
Hawari 4. Ŋic moc ʒâŋene Josua e taha bapa sâko erâ juocmu irec findaŋdâŋ.
Hawari 5. Lambe sâko oliwa jâc jajahec jahere ŋondeŋko domane honewec. Izi Wofuŋ e taha bapa Josua â micne sâko Serubabe jahehec juhame Judaŋic jaŋere dameŋ biaŋ fuarâ foocmu irec sâsâc.
Hawari 6. Papia foforiŋkekicnezi furuc furuc qame honewec. Izi fiuc roro â burec â eeatuc ŋic sâwec‐jeŋic irec sâsâc.
Hawari 7. Ŋokac sâqocne moc Babe haeo barakicne. Izi ŋic sindaŋnezi Anutu tâmiric juju jaŋere sâsâc.
Hawari 8. Ʒika keretac 4 jaŋe ŋicne ŋicne juwic â faic, erâ ŋifec â ŋifec jurambiŋ jaŋe okacne bazu‐jareniŋte rapie honec‐jopawec. Izi Anuturaonec okacne fifisi irec sâsâc.
Dâkâne 2:
Gaŋ 9—14. Maŋnao dâŋ forakac irec qizecne ʒiŋuc honeŋgopeneŋ: Anutuzi mâreŋko ŋic gurune gurune tâpirihec jaŋe qâhuc‐jopame Mesiare Wofuŋ qâreŋ fua taniŋkeocmu.
Tataranao ine dâŋ ʒuhucne jajahec fokopirec. Dâŋ ʒuhucne namba 1 i ʒiŋuc: Mesiare uucmaŋ fuame wama ŋicwofuŋzi Zioŋ haeo ŋec juc eocmu. Erâ dâŋ moc ʒiŋuc: Anutu e ŋicfâc‐ticne jambuŋ‐jopahuc râsifâc‐ticne bâsirowec‐jopaocmu.
Dâŋ ʒuhucne namba 2. Ira ine Wofuŋte dameŋ sâkoo Juda ŋicguru â Jerusalem hae rune jaŋe weniŋuc erâ juniŋmu irec findaŋdâŋ fokac. Wofuŋte dâŋ fârine moc gaŋ 13:9 ira fokac, kecʒiŋuc: “Ehuc mupemu: ‘Jaŋe ŋicfâc‐nane’, iŋuc mupe muniŋmu: ‘Wofuŋ e Anutu‐nâŋec.’ ”
1
Wofuŋtao ririsie irec dâŋ
Dariusi e ŋicwofuŋ erâ juhame jara 1 â mosa 7 tarawec. Ehame mosa namba 8 ira Berekiare ŋokâ â Idore ŋosa, porofete Ʒekaria hâcne, erao Wofuŋte dâŋ kecʒiŋuc fuawec: “Wofuŋ e mamacfâc‐ŋeŋic jaŋere boc aarickewec. Irec ʒiŋuc muhuc jazawec: Anutu Tâpiri Ɋuŋɋasaŋ Wofuŋ eki kecʒiŋuc mukac: Ŋoŋe norao risiepie noni maic‐ŋopapemu. Anutu Tâpiri Ɋuŋɋasaŋ Wofuŋ nore dâŋ iŋuc. Ŋoŋe kâcɋenefâc‐ŋeŋic jaŋere sâc mi junʒepieŋ, mârâc jaha porofete jumbiŋ jaŋe dâŋ ʒiŋuc jaza jumbieŋ: ‘Ŋoŋe hata‐ŋeŋic hehesicne â eebapa‐ŋeŋic sâqocne i moc behenʒepieŋ.’ Jaŋe ine dâŋnane mana rereŋ mi embiŋ, Wofuŋ nore dâŋ iŋuc. Mamacfâc‐ŋeŋic jaŋe weni? Â porofete jaŋe juju sanaŋ moc jueŋgopieŋ me? Kiŋaŋ qaqafâc‐nane, porofete hâcne, uŋsawaŋ â dâŋsanaŋ‐nane jazapo i mamacfâc‐ŋeŋic jaŋerao fâri fideteŋnehec ewec. Eme jaŋe maŋjeŋic bârisierâ mumbiŋ, Anutu Tâpiri Ɋuŋɋasaŋ Wofuŋ e juju â eebapa‐nâŋecte sâcko wiac enâreocte muwec irec sâc enârewec hâcne.”
Porofete e maŋʒâŋe‐ticne ŋerisieme becâsic honec‐jopawec
Dariusizi ŋicwofuŋ juhame jara 2 tarazo eha mosa namba 11, ʒâŋene Sebata i maickewec. Eme mosa irec ʒoaŋ gie bapa 24 ira Idore ŋosa Berekiare ŋokâ, porofete Ʒekaria hâcne, erao Wofuŋte dâŋ fuawec. Fuacneme eki kecʒiŋuc muwec: “Manaŋgopieŋ, no ŋafeo maŋʒâŋe‐nane ŋerisieme ŋic moc becâsic bâbâroŋko ŋehame honepac. E wâneŋko jâc dutu jaŋere ŋondeŋko domahame râpefuŋ‐ticnao becâsic gâgâpâc â bâbâroŋ erâ qaŋqaŋ domahapie honec‐jopapac. Iŋuc honerâ ʒiŋuc wiopac: ‘O bomboŋ‐nane, jaŋere fuŋne weniŋuc?’ Iŋuc wiope aŋelo nohec dâŋejec eki ʒiŋuc nazajec: ‘No fuŋne‐jeŋic gaza gowatuc epemu.’ 10 Eme jâc dutu jaŋere ŋondeŋko domajec ŋic eki ʒiŋuc nazajec: ‘Wofuŋzi mâreŋ sâko mâreŋ irec fuŋne hone manac eniŋte sorec‐jopawec jaŋe hâcne.’ 11 Eme jaŋe Wofuŋte aŋelo jâc dutu jaŋere ŋondeŋko domajec e ʒiŋuc âzâcnembieŋ: ‘Manakic, nâŋe mâreŋ sâko mâreŋ fotâcnehuc ʒiŋuc honembeŋ: Mâreŋ e qiriŋmâc fokac.’ 12 Iŋuc mupie Wofuŋte aŋelozi kecʒiŋuc mujec: ‘O Anutu Tâpiri Ɋuŋɋasaŋ Wofuŋ, go Jerusalem â Juda hae ŋerakac jaŋe aaric mana‐jarehuc juhaŋtec jara 70 tarawec, irec mo dameŋko busâqoc moc mana‐jarecmu?’ 13 Eme Wofuŋzi aŋelo nohec dâŋejec e aki wama â bâbâmiriŋ dâŋ âzâcnejec. 14 Âzâcneme aŋelozi ʒiŋuc nazajec: ‘Go hahaŋne bahuc muc: Anutu Tâpiri Ɋuŋɋasaŋ Wofuŋ e kecʒiŋuc mukac: No Jerusalem â Zioŋ kikefuŋ ŋoŋere bunane boc bâruŋkekac. 15 Ŋicne ŋicne manabâc tâmiric jueŋgopieŋ jaŋe ine kimbeŋ hâhâwicne qajarekopac; jaŋe hâcne kimbeŋ afecne qaŋarehape sisipiric hâhâwicne fai‐ŋeŋicko râepie fewec. 16 Irec hâcne Wofuŋzi ʒiŋuc mukac: No busâqoc manahuc Jerusalem mocwâc maickepo, irec ufuŋ‐nane mocwâc heɋârerâ bapie fuazejec, erâ mucsâc i Jerusalem haeo fârenʒepieŋ, Anutu Tâpiri Ɋuŋɋasaŋ Wofuŋ ere dâŋ iŋuc. 17 Erâ harierâ hahaŋne bahuc ʒiŋuc muzemec: Anutu Tâpiri Ɋuŋɋasaŋ Wofuŋ e kecʒiŋuc mukac: Hae‐nane ŋerakac ira mazuc mâriri mocwâc fuarâ fozejec, ehame no Zioŋ bâmiriŋkehuc Jerusalem hae mocwâc bâwosâepemu.’ ”
Porofete e ʒuŋe 4 â aeŋ bapa ŋic 4 honec‐jopawec
18 Eme no ʒâŋe fipe feme mi ʒuŋe 4 honec‐jopazepac i! 19 Ehuc aŋelo nohec dâŋewec e ʒiŋuc muhuc wiocnepo: “Wiac keci jaŋere fuŋne weniŋuc?” Mupe muwec: “Ʒuŋe keci jaŋe hâcne Juda â Israe erâ Jerusalem qâtâtiec‐jopambiŋ.” 20 Eme Wofuŋ e aeŋ bapa ŋic 4 nowatuwec. 21 Eme mupo: “Jaŋe wemo gie baniŋte warembiŋ?” Mupe muwec: “Ʒuŋe 4 keci jaŋe Juda kikefuŋ bâtâtiec‐jopa‐jâmbâŋkepie mocwâc turerâ juniŋte eipiembiŋ. Aeŋ bapa ŋic 4 jaŋe ine Juda kikefuŋ qâturec‐jopaniŋte warembiŋ, ehuc ŋicne ŋicne jaŋe kikefuŋ bâtâtiec‐jopaniŋte ʒuŋe‐jeŋic bâfeŋnembiŋ i hâcne hezu henʒaŋ eniŋte warembiŋ.”