2
Biyomb Ak Mey, Kamb Tep Per Mindeniŋgamb
1 Kun ak tap timey gipim rek kirgiy, yesek apim ak kirgiy, miluk niŋbim ak kirgiy, minim nep apim ak kirgiy, biynimb aŋgjiwpim ak kirgiy ginimimb.
2-3 Ñapan ŋaŋ kisen tikpay gok yomb giniŋg, tiy ñiŋun aŋgiy gos nokom niŋbay. Kun ak rek, nimb biynimb Jiysis nup diy, bi tep yimb aŋgiy niŋbim gok, Gor minim yipund giy ak niŋjun aŋgiy, gos nokom niŋnimimb.
4-5 Kamb par perper mindeniŋgamb ak, biynimb gunap yiruk niŋiy kirpay ak pen; Gor nuk key niŋek tep yimb ayek, korip sap namb biyoŋ ak piŋiy, nimbip kamb siskoy per mindeniŋgambim gok, piŋiy kus kus gisap. Kun ak biynimb tep nuk gok mindiy, nup woŋg giñiyiŋg, yimb nup dand aranyiŋg mindenimimb.
6 Baybol buk ak tikiy aŋgyak:
“Kamb par yip tep gip ak, dand apiy piŋiysipiyn Jerusalem, miñmon Sayon dum apay ak. Biynimb nup chiŋgniŋgambay gok, bi yesek ak chiŋgipun aŋgiy, gospar ma ayniŋgambay aŋgak.”
7 Kun aŋgek, biynimb nup dipim gok, kamb sap kun ak niŋem tep gip. Pen biynimb nup ma dipay gok, Baybol buk ak tikiy aŋgyak:
“Kamb kun ak nup yiruk niŋiy kirgiyak ak pen; miñiy korip sap kilis namb biyaŋ ak mindip aŋgyak.”
8 Pen minim bap aŋgyak:
“Biynimb kamb ar nokom kun ak apyap pikniŋgambay rek, tapin nep apyap pikniŋgambay aŋgyak.”
Gor minim ak ma niŋiy apyap pikpay kun ak, giniŋgamb aŋgak rek nep gey amjap.
9 Pen nimb Gor biynimb nuk yimb. Nimbip key niŋiy dek, biynimb suŋ-tep nuk mindiy, nup Biyomb aŋgiy, aŋgniŋyiŋg mindpim. Nind kisyimnamb okok mindiy, kosyam giraŋgyiŋgipim ak pen; nuk gek, melik tep niŋyiŋg tapim ak, yimb nup dand aranimimb.
10 Nind biynimb nuk ma mindyiŋgipim; pen nimbip simb niŋiy dek, biynimb nuk yimb mindpim.
Gor Ker Mindpim Rek Mindrep Ginimimb
11 Kun ak biynimb tep yand gok. Man ar biy miñmon nimb yipund giy mer; yikop apiy mindpim. Kun ak tap man ar biy ker gok, mindmaŋgiy ay ma gem amnimuŋ. Tap kun gok gos niŋiy gem amek, apyap pikniŋgambim.
12 Biynimb Gor ker ma mindpay gok yip mindpim ak, mindrep yimb ginimimb. Kun gem, ñin gunap nimbip aŋgjiwniŋgambay ak pen; kisen Krays winiŋgamb ñin ak, mindrep gipim rek aŋgyikeniŋgambay, Gor nup yimb ak araniŋgamb.
13-14 Gor biynimb nuk mindpim ak, biyomb man ar biy gok aŋgniŋgiy rek ginimimb. Gapman biyomb yimb ak nup minim ak niŋiy, binuk yokek ap nimbip kond mindpay gok kuyip, minim ak niŋiy ginimimb. Pen biyomb kun gok, biynimb mindrep giniŋgambay gok kuyip diy, biynimb timey giniŋgambay gok kuyip, minim yomb aŋgniŋgambay. Yenen: Gor kuyip woŋg kun ak giniŋgiy aŋgiy, aŋgayak. 15 Pen Gor nup tep giniŋgamb ak; nimb mindrep gem, biynimb gos ma ayak gok nimbip minim yesek aŋgiy, aŋgjiwniŋgiy rek ma ayniŋgamb. 16 Biynimb gunap, key niŋbim rek ginimimb apay ak pen; gos kun ak niŋiy, monmon ma ginimimb. Gor biynimb nuk mindpim ak, yerer giniŋg gos niŋrep giy ginimimb.
17 Biynimb yikop gok biynimb chin aŋgiy, mam ay Krays ker mindpay gok kuyip wasemb ay, gapman biyomb yimb anup biyomb aŋgiy, Gor nup biyomb ak key aŋgiy niŋnimimb.
Jiysis Nup Kindik Giy Miker Apek Ma Pirikjun
18 Nimb biynimb Krays ker, bi gunap kuyip kalambis woŋg rek giñimbim gok; kuyip direp giy, apay rek ginimimb. Mindrep gipay ñin ak nep mer, kalrimey jiwpay ñin ak kunep, girep ginimimb. 19 Pen nimbip monmon geniŋgiy, Gor nup gosimb niŋbim rek, kuyip gos timey ma niŋeniŋgambim; Gor nimbip direp giniŋgamb. 20 Pen timey gem, nimbip monmon giniŋgambay ak ma aspiyn; mindrep gem, nimbip kun giniŋgambay ak aspiyn. 21 Kuyip miker ñey kapkap nep mindeniŋgiy aŋgiy chinup dak. Kun ak Ñinuk chinup aŋgiy yiwur dak gos ak niŋiy, chinup miker ñeniŋgiy, gos yomb ma niŋjun; nuk gip gip rek ginjun aŋgiy, gon amnimuŋ. 22-23 Bi tep kun ak minim yesek ma aŋgyiŋgip; timey ma giyiŋgip; nup aŋgjiwey, kuyip pen ma aŋgjiwak. Nup mon bak biyoŋ ñaŋgrimbikyakniŋ, kuyip minim bap ma aŋgak; Bapiy bi minim yipund giy nep aŋgip ak, kuyip minim kun ak key aŋgniŋgamb aŋgiy, kirgak. 24 Pen chinup aŋgiy aŋgak, “Yand gach kuyip ak diy kumen, kiyk kim amniyaŋ aŋgiy,” kumak. Nuk yiwur yomb dak rek; chin tap siy tap timey gok kirgiy, suŋrep mindonjun rek ayak. 25 Nimb kanj siypsiyp sakiy okok amiy, minduŋ ambay rek mindyiŋgipim ak pen; miñiy Bi chinup kond mindrep gip ak ker opim.