1 Tesalonayka
Pol Minj Nind Ak Tesalonayka Kuyip Tikak
Minim Nind Niŋep
Pol Tesalonayka kuyip minim tep aŋgñak ñin ak, Jiwda gunap, biynimb Jiwda mer gok Pol minim nup ak nep niŋsipay aŋgiy nup miluk niŋeyak, Tesalonayka kirgiy am Biriya biynimb kuyip minim aŋgñak. Kisen am Koriyn mindek Timotiy apiy, Tesalonayka biynimb Krays ker mindpay gok mindrep gipay aŋgak minim ak sek, minim aŋgniŋyak gunap sek aŋgñek niŋiy, kuyip minj kun biy tikak.
Minim Ar Keykey Mindip Rek:
Minim nind aŋgak ak mindip, chapta 1:1.
Tesalonayka biynimb mindrep giyak rek, Pol nup tep gak minim ak mindip, chapta 1:2–3:13.
Biynimb suŋ-tep nuk mindenimimb aŋgak minim ak mindip, chapta 4:1-12.
Krays andkind winiŋgamb minim ak mindip, chapta 4:13–5:11.
Minim aŋg jiwniŋg gos rek winjikak minim ak mindip, chapta 5:12-22.
Minim aŋg jiwak day won ak mindip, chapta 5:23-28.
1
Chin Pol, Salas, Timotiy nimbip Tesalonayka biynimb Gor Biyomb chin apiymiŋay ak ker mindpim gok, minj tiksipun.
Gor apiymiŋay nimbip simb niŋiy direp ger, mindrep ginimimb.
Tesalonayka Biynimb Gor Nup Gosimb Niŋiy Mindrep Giyak
Chin per Gor nup aŋgniŋniŋg nimbip sakiy ma gipun, gos niŋmindiy, nup tep aŋgyiŋg kuyip maŋgiysek kond mindrep ginimin apun. Pen nimb Gor nup gosimb niŋiy, aŋgip rek giyiŋg, biynimb gok kuyip wasemb ay direp giyiŋg, Biyomb chin Jiysis Krays andkind winiŋgamb aŋgiy kond mindem amjap ak; Bapiy Gor nup aŋgniŋyiŋg tep apun.
Chin niŋbun: nimb mey, mam ay Gor wasemb ay dak gok mindpim. Pen chin Gor ker mindiy mindrep gipun rek, kiyk kunep mindeniŋgiy aŋgiy, minim tep ak dand amiy Kawnan nuk ak chinup gos ñek, nimbip minim yipund giy yimb ak aŋgñon niŋiy dipik. Diy mey, Biyomb chin gip miñ ar ak sek, chin key gipun miñ ar ak sek kisen gipim. Gipim kun ak, biynimb Krays nup gosimb niŋbay Akaya propens ak sek, Masedoniya propens ak sek niŋiy kunep gipay.
Pen nimb Biyomb ak nup gosimb niŋem, nuk gek mindrep gipim minim ak; miñmon okok kunep amjap. Miñmon gunap amjakon, biynimb kun okok key kesim diy apay, “Tesalonayka biynimb kuyip minim tep ak aŋgñenbik, nimbip direp giy, tap yesek aŋgniŋyiŋgipay gok kirgiy, Biyomb permindep ak nup nep aŋgniŋiy, direp giyiŋg, 10 Ñinuk kumek Nop gek tikjakak ak andkind asaw aŋgiy, kond mindpay apay.” Jiysis kun ak nep chinup kond mindip rek, yiwur yomb ak ma diniŋgambun.
Pol Tesalonayka Mindiy Woŋg Gak