2 Jon
Wen te Jon nikin nyumo raqe aye ur nindiq kin. Nyumo raqe wen ningg Jon ni nikin ninggne “quayi kiyi” puq nand. Di nyumo raqe wen te “nyumbueg ire nikin wo ane” ninde ur nindiq. Ni puq nand kin te beghi nei bab segi te nyumbueg nganye nikin wo ane o ni wute Jisas nei rimbig kin tiqe ire pe ris kin ni ningg kopuqu wand nand. Nyumo raqe wen nde Jon ni simbe nindiny ei ni wute wandoqi kin wand wute bei meny kin ninde mondo, te rite mowi wayequ, di wute aye oyi oyi yawo rirany righe.
1
1-2 Nge quayi kiyi iri nge nyumo raqe wen ur gidiq.
Nge nu nyumbueg God naip kuo ye di nu wo ane nungoqi nde nyumo raqe ur gidiq.* Wute ninge mari ven kopuqu wand: nyumbueg te sios ire di wo te wute sios pe ris kin. Wand nganyene kin ni beghi nde vis di ni vis vis te kin vis ye, pugri bu nge nganyene nungoqi quan nganye yawo kirauq righe. Pudi nge irine nungoqi yawo kirauq righe segi. Wute buagi wand nganyene kin nei rimb ye ni anene nungoqi yawo rirauq righe.
3 Wute yuwon puany, wute yawo putony di umbo yuwon kin te God beghi wuyi di kuwonyimi Jisas Kraist nde pu rindi ye. Yumbo ren kin te ni beghi wand nganyene kin nei bab di wute yawo pirany righe ye beghi nengu.
4 Nge guqod kin te nu wo ninge wand nganyene kin wuyi nari kin pugrine nyinge rire, di nge quan nganye chumbuai gad. 5 Di muq nyumbueg, nge lo aye urupui ur gidiq wundo segi, pudi lo asi Jisas ningg wand putungu urupuine kin tende puayi putungu kin tene. Nge simbe gad kin kari beghi wute aye oyi oyi yawo pirany righe righene. 6 Di wute yawo pirany righe kin taq pugri: Beghi God nari kin pugrine nyinge pare. Nungoqi wute God yawo rirang righe di wute aye yawo rirany righe kin ni nyinge rire ye pugrine nyinge ware. Wand ren kin nungoqi asine wutungu pre.
7 Te pugri wute wandoqi kin nganye buagi ni mari Jisas Kraist ni qi pe nandi wuti nganye nas puq mand segi ye ni qi pe mar ir mo pre. Wute pugri kin ni wute wandoqi mand ye, di ni Kraist ningg veri. 8 Nungoqi rar wat yuwon, eti nungoqi yembe wand kin te ningg oyi nunduq ye yumbo te wateri segi. Pudi nungoqi gre pu yequ, tedi segine yumbo te quan buagine wateri. 9 Wuti iri ni Kraist ningg wand nat vise pudi ni wand te si nare wand aye pe prare no di beghi asi Kraist ningg simbe bidig kin wand te kin pugrine puq nen segi, tedi God ninde nas segi. Wuti wand te kin pugrine puq nen nen nas kin te wuyi wo temi ninde mas. 10 Wuti iri nungoqi nde nondo, muq ni wand ren kin nare nondo segi, nungoqi wutanyi baj pe wo o wari “God nu yuwon nuaw” puq wundig wayequ. 11 Wuti tughe ni wuti te pugri puq nindig ye ni wuti te ni ningg yembe brequ te ghav nindig.
12 Nge wand nungoqi nde ur gad ki rundo ye nganye buagi rise, pudi urne gad kin te nge yambu kari. Nge nei gab kin otiwo nge godo gudoqu di ane quenge quengene wand, ei te beghi quan nganye chumbuai bad.
13 Nu nyumbu God nipiq wuso ye ni wo ren kin nungoqi nde chumbuai kin wand ri rundo.† Wute ninge mari ven kopuqu wand: nyumbu te sios ire Jon ni nas kin te.