15
KalaisiꞋa ago fali-mainefiti eteno heti-maine.
NafuꞋnagana-gatama YisasiꞋa hulatenea kanale mono kema huhaleꞋna tamahapai-mainoa kea nagoꞋene huꞋna tamakesa ali hao hugahe nehue. Mani kea havitama tamakupi maletama tamametiti hutetama ago hetitama mainae Ani kanale kea atafa hulinesageno AnumayamoꞋa tamaku tamamena aligatigahianagi afaꞋa amega tamaugafaletiꞋma “Yisasifena naguꞋa aminoe.” hutama hisayana tamaku tamamena aliokatigahie.
AnumayamoꞋa nahapaigeꞋna havimainoa kemoꞋa uhagoteno agase-mainea kea mage huꞋna tamahapai-mainoe Anumayamo avopi kae-malenea kate KalaisiꞋa kefo yama humainona yatefene huno fali-maine. FaligeꞋya hevaitageno tole yupa komufinaga hanetegeno tagufa (3) kanale avopima kae-malenea kate maleno Anumaya KotiꞋa avale heti-maine. Eteno hetiteno Pita aule evaꞋyi huteno haenagaꞋa agaiꞋa aleveniꞋa (11) anagatela vaꞋyi humaine. VaꞋyi higeꞋya faefu hataletiꞋa (500) alitalu humainaya tafu-taganate evaꞋyi humaine. Ani veala osiꞋa falitageno kasagoꞋya veala ofaliꞋya afaꞋa mainae. Anile Yemesi mainele evaꞋyi huteno haenagaꞋa mukiꞋa Aposolo vayatela evaꞋyi higeꞋya age-mainae.
8-9 NaꞋa huteno haenagalafa nagaitela evaꞋyi humaine. Kalaisina akave nehaya veala nagaya tusiya huꞋna ali haviya humatenoafe Aposolo kano maisua yafena onatenegi mukiꞋa Aposolo vayala nagaila nagasegeꞋna osi vaya kana huꞋna maigeꞋna aꞋmoꞋa kanaꞋa omalegeno nafaꞋne atea kava huno Anumaya KotiꞋa agaiꞋa nafaꞋne nategeno KalaisiꞋa faliteno nagaitela evaꞋyi humaine. 10 Anumaya KotiꞋa agaiꞋa kayone yamaꞋa namineafe Aposolo kanoa mainoe. Kayone yamaꞋa naya higeꞋna nagoꞋa Aposolo vayaꞋmoꞋya aliꞋyama ali-mainaya aliꞋyana amakaseꞋna neꞋaluanagi nagaya omagi Anumaya Koti kayone yamaꞋamo naya higeno nagaiꞋene haneafe ali-mainoa aliꞋyamoꞋa amakase-maine. 11 NagoꞋa Aposolo vayaꞋmoꞋyao nagayao tamahapauna kea lagaya mukiꞋamogata nagoke kegeꞋya huhaleta humainona kele havitama tamakupina malenae.
HaenagaꞋa mukiꞋa fali-mainaya veala hetigahae.
12 “KalaisiꞋa ago fali-mainefiti heti-maine.” huta nehunagi naꞋa higetama nagoꞋa veaꞋmogatama “Fali-mainaya veala eteꞋya heotigahae.” hutama nehae? 13-14 Fali-mainaya veaꞋma he-otinaleꞋasine AnumayamoꞋa KalaisiꞋenena fali-mainefitila ali heti-oꞋateleꞋasine. Kalaisina fali-mainefitiꞋma ali heti-oꞋateleꞋasina nagayama nehua kea afa ke kana higetama tamakaya afa yafe tamakupina maletama tamametitia haleꞋasine. 15 Anumaya KotiꞋa Kalaisina alino heti-oꞋatenesina tagaya “Anumaya KotiꞋa Kalaisina alino hetitene.” huta nehuna kemoꞋa Anumaya Kotife havige huteꞋasine. Anumaya KotiꞋa fali-mainaya veaꞋma alino heti-oꞋamateleꞋasina KalaisiꞋenena alino heti-oꞋateneleꞋasine. 16 Tamage Anumaya KotiꞋa veaꞋma fali-mainafiti ali heti-omateneleꞋasina KalaisiꞋenena aniꞋa huno alino heti-oꞋateneleꞋasine. 17 Nagi AnumayamoꞋa Kalaisima ali heti-oꞋatenesina tamakupi maletama tamameti nehaya yamoꞋa afa ya kana higeno kefo yama nehaya yatamimoꞋa aigagilamateno lamatafa hileꞋasine. 18 Kalaisife haviꞋya amakupi maleteꞋya fali-mainaya veaꞋmoꞋya haniꞋmo aguꞋafi agola amakata aiya no maileꞋasine. 19 Kalaisife havita tagupi malona yana ma mopale mainona kanafikeꞋya taya hileꞋasina haenaga faliteta hetita ikapinaga ohauteꞋasina Kalaisife havita lakupi malenona yamoꞋa afa ya kana huleꞋasinagi haenagama vaꞋyima hisia yafe tamage huta lametitia nehune.
20 Tamage AnumayamoꞋa Kalaisina fali-mainefiti ago alino hetiteneane. Hoyafi kaveꞋmoꞋma hagoteno nena hia avamete huno Kalaisina hagoteno ali hetiteneanagino haenagaꞋa fali-mainaya veala alino hetimategahie. 21 Nagoke kanomoꞋa, Atamu, kefo yama humainea yateti fali yana ali falote humaineanagi nagoke kanomoꞋa, KalaisiꞋa, fali-mainea yateti aniꞋa huno tagaya veaꞋmogata heti yana ali falote humaine. 22 MaꞋa humaine Atamu mukiꞋa nelafa maineafe mukiꞋamogata agayama humainea kava huta nefalunanagi KalaisiꞋenema aigaꞋmaeta mainona veaꞋmogata agayama humainea kava huta eteta hetita haegafa veaꞋne maigahune. 23 Anumaya KotiꞋa malenea kanaꞋale KalaisiꞋa hagoteno heti-maineafe agayama eteno esia yupa mukiꞋa Kalaisife haviꞋya amakupi malenaya veaꞋmoꞋya fali-mainesafiti hetigahae. 24 Hetitesageno ani kanafi mukiꞋa yana haꞋno hisigeno KalaisiꞋa mukiꞋa ma mopale kava vayaꞋene Anumaya Koti kame vayaꞋaene Kefo yamo tokiyama hanea AvamuꞋyagaene KalaisiꞋa amakaseno ani vayaꞋmogamina ali haꞋno humaleteno Anumaya Kotina kava yagaisiafe Nefa ayapi mukiꞋa amategahie. 25 KalaisiꞋa yagaime yagaime haino mukiꞋa kame vayaꞋa amakaseno aiyafinaga alino amategahie. 26 KalaisiꞋa kame yana ali haꞋno humaleteno haenagalafa veaꞋma nefaluna yana heno fanane hutalegahie. 27 “Kava yagaisiafe mukiꞋa yana Anumaya KotiꞋa Yisasi aiyafi malene.” huno kae-maleneane. Mani kea “MukiꞋa yana malene.” huno humainea kea Anumaya KotiꞋa, kava yagaisiafe mukiꞋa yana Yisasi aiyafi malenea kanomofe ohune. 28 Ani kavala humaleteno mukiꞋa yana agaseno kava yagai-mainea kano Kalaisina, Anumaya KotiꞋa aiyaꞋafi ateteno Anumaya KotiꞋa mukiꞋamoꞋya hagote kava kano maigahie.
29 YisasiꞋa fali-mainefitila heotineleꞋasina nagoꞋa veaꞋmoꞋya fali-mainaya veafena amakesa haviꞋya mono tima nefalayana na kanale ya falote hugahie? Fali-mainaya veala heotisayana naꞋa hinageꞋya fali-mainaya veafena haviꞋya tina nefalae? 30 Tagaya Anumaya Koti kea huhaleta nehunageꞋya mukiꞋa kanafina kaꞋyo kevea lamigeta falisuna kavala nehune. VeaꞋma heotisayana naꞋa higeta ani hu nelataya kavala afaꞋa neꞋalune? 31 NafuꞋnagana-gatama tamagelafa nehue mukiꞋa kanafina kaꞋyo keve namigeꞋna faligahe huanagi Yisasi Kalaisi AnumayatimoꞋene ailokaeꞋna maineꞋna agai kema tamahapaugetama havimainaya yafena aluya huꞋna musena nehue. 32 Ma mopafi yafekeꞋya nagesa nehaviꞋna Efesusi kumate mainaya vayala, kaveꞋage afela afu kana nehaya vayaꞋene keleti tua nehuanagiꞋya fali-mainesaya veaꞋma heotisayana ani kavaꞋma hunenataya yamo anonaꞋa hanaꞋa huꞋna alisue? Falimainesaya veala heotisayana veaꞋmoꞋya nehaya kea “Ega falisupi afaꞋa maineta tiꞋene kaveꞋene neta kanaleꞋya huta maigahune.” huꞋya nehaya kemona akave malegetao.
33 Havigema nehaya veaꞋmogami kea ohaviho. Fatago veaꞋmoꞋya kefo yama nehaya veaꞋnene maisayana ali haviya hulamategahagi kaꞋyetama maiho. 34 Tamakesa hao hinagetama kefo yama nehaya yana ataleho. NagoꞋamogatama Anumaya Kotifema ohaviya yafena tamakaye hino huꞋna nehue.
Faliteta hetisuna taugafa haote ya kana hugahie.
35 NagoꞋa veaꞋmogatama mage hutama nahavi-negae “HanaꞋa huꞋya fali-mainesaya veala hetigahae? Fali-mainesaya veaꞋma hetisayana hana augafa amaugafa hanesigeꞋya evaꞋyi hugahae?” hutama nahavi-negae. 36 Nahavi-negaya veaꞋmogatama havigu ke nehae. Avina yama mopafi fai-malenageno falino numayu ohisigenoꞋa ohagegahie. 37 Hageno vaꞋyi higetamahena fai-malenaya avina kana ohunegi osi avina alaga kanoꞋa viti avinafi alu avina yapi osi kanoꞋa fai-nemalae 38 Fai-malenageno Anumaya KotiꞋa agesa haviteno haiya kava huno avina yana alu augafa alu augafa amigeno nehage. Anima nehagea avamete huno Anumaya KotiꞋa fali-mainesaya veala alu amaugafa amamiteno ali hetimategahie.
39 MukiꞋa yamona nagoke augafa okaline. Veala alu laugafa kali-maigeno afu kalamogamina alu amaugafa kali-maigeno namayaga-mona alu amaugafa kali-maigeno noyameyaga alu amaugafa kali-maine.
40 Ikapinaga yana alu amaugafa kali-mainegi ma mopafi veala alu amaugafa kali-maine. Mopale veala konagali yaꞋamia haneanagi ikapinaga veala aluꞋa konagali yaꞋami hane. 41 YagemoꞋa alu konagali yamaꞋa hanegeno ikamoꞋa alu konagali yamaꞋa hane. KaꞋnefiꞋyagamona alu konagali yamaꞋa haneanagi nagoꞋa kaꞋnefiꞋmona alu konagali yamaꞋa haneanagi nagoꞋa kaꞋnefiꞋmoꞋya alu konagali yaꞋamiꞋa hane.
42 Fali-mainaya veala faligeꞋya hevaimataya amaugafa kasalisia amaugafa haneanagi eteꞋya hetisaya amaugafa agola hanege hanege huno fanane ohisia amaugafa hanegahie. 43 Hevaimatesaya amaugafa amakaye hisia amaugafa haneanagi eteꞋya fali-mainesafiti hetisayana tokiya hale yamaꞋa hanesia amaugafaene hetigahae. Hevaimatesaya amaugafamona tokiyaꞋa omalenea amaugafa haneanagi eteꞋya hetisaya kanafina tokiyaꞋa hanesia amaugafaene hetigahae. 44 Hevaimatesaya amaugafa mopa amaugafa hanegeno hetisaya amaugafa ikapinaga amaugafa falote hugahie. Mopale maisuna taugafama hanesiana ikapinaga maisuna taugafaene falote hugahie. 45 NaꞋa humainea yafe Anumaya Koti avopina mage huno kae-maleneane
“Hagote kanoa, AtamuꞋe, haimula hanea kano falote humaine.” huno kae-maleneane.
Kae-maleneanagi haenagama falote humainea AtamuꞋa, YisasiꞋe, ikapinaga maige maige hisaya hamaimula amamisia kano maine. 46 Hagoteno ikapinaga maisuna taugafa falote ohunegi mopale taugafa hagoteno falote huteno haenaga ikapinaga maisuna taugafa falote hugahie. 47 Hagote kanoa, Atamuna, mopaleti aye kakali-feno talo huteneanagino haenaga falote humainea kanoa, YisasiꞋa ikapinagati emaine. 48 Mopale mainaya veala mopaleti talo humalenea kanomo avamete huꞋya mainagi ikapinagama visaya veala ikapinagati emainea kanomo avamete huꞋya maigahae. 49 Menia mopaleti talo humalenea kanomo augafa kali-mai veaꞋne mainonanagi haenagaꞋa ikapinagati emainea kanomo augafa kali-mai taugafa hanegahie.
50 NafuꞋnagana-gatama tamahanepauve mopafi taugafamoꞋa Anumaya Koti kava yagai-mainea kumatela oꞋugahianagino kasalino fanane hisia taugafamoꞋa agola maige maige nehaya kumatela oꞋutafa huno oꞋugahie.
51 Anumaya Koti kema falakino hanea kea tamahapaigahugi haviho. MukiꞋa Yisasife haviꞋya amakupi malenaya veaꞋmogata ofalita afaꞋa mainesunageno aupaꞋa mukiꞋa laugafamoꞋa alino aluꞋa hu taugafa hapaegahie. 52 AupaꞋa aulumaya koꞋnelia auꞋava kava huno haenagalafa kepiti ufe kalafa kemoꞋa nehigeno YisasiꞋa ikapinagatila efalote hisigeno agoꞋma fali-mainaya veala hetiteꞋya agola maige maige hisaya amaugafa alitesageta ofalita afaꞋa mainesuna veala anile maige maige hisuna taugafa hapaegahie. 53 Mopafima mainona taugafamoꞋa negasalianagi haenagaꞋa okasalisia taugafa falote hugahie. Falisuna taugafa haneanagi haenagaꞋa ofalita agola maige maige hisuna taugafa falote hugahie.
54-55 Negasalia taugafamoꞋa fanane hutenageno okasalisia taugafa falote hugahie. Fali yamoꞋa fanane hinageno ofalisuna yana falote hisigeno ma ma Anumaya Koti humainea kemoꞋa falote huno tamage hugahie. Mage huno kae-maleneane
“Maige maige hisuna yamoꞋa falisuna yamona agasetafa humaine. Nefaluna yamoga tagasesana tokiyakaꞋa hanate hane? Fali yamoga veala amaugafa akafu anika henefalina tokiyakaꞋa hanate hane?” huno kae-maleneane.
56 Kahegi kea akave omalonafe kefo yana nehune. Kefo yama nehuna yana akafu amanino veaꞋne hefalisia ya hane. 57 Haneanagi Anumayati Yisasi KalaisiꞋa hulatenea yamo falisuna yana ago agase-maineafe Anumaya Koti agia alisaga huta muse hisune.
58 Nahau-mainea nafuꞋnagana-gatama Yisasifena tamakuꞋa ami hetofa hutama mai-lokiya vaitama etetama alu katela oꞋviho. Anumaya Koti aliꞋyamoꞋa afa ya kana ohuno kanale anonaꞋa alisaya aliꞋya haneafenagitama mukiꞋa kanafina Anumayamo aliꞋyana tokiyaꞋage vaitama aliho.